Salmos 59 - Wuj Pa K'ubultzij

I Ajwal are i tol qe

¹ Wajwal Dios, chinawesaj pki'ab' i je ajch'oj chwij; chinato pki'ab' ni'pa i kki'an k'ax chwe.

² Chinawesaj pki'ab' i aj-anol i mak atzalal, xaq lik chinato pki'ab' i kamsanel laj taq winaq le,

³ man je o winaq chi nimaq kipatan kkaj chik inkamsaxik. Ajwal, yin in-anom ti qelqel che wib' xaq nti inmak in-anom;

⁴ lik nti jun utz taj in-anom, xwiri lik kkaj chik inkamsaxik, ¡Chk'un saq chawach! ¡Chatpet chink'ulaxik xaq chawila ile!

⁵ Yet, Ajwal, Dios chi Ronojel Kattiki Che, chi at Dios ke aj Israel, chk'un saq chawach xaq chaya utojb'alil chke i winaq le chi kkikoj ti atzij; mawil tob'al kiwach i itzel laj taq winaq le chi xa keb' kipalaj.

⁶ Are kok a'ab' ketzalij loq chi pacha taq tz'i keti'anik, xaq kkisutij rij i tinimit.

⁷ Lik kpuluw kik'axaj pkichi', kkib'ij ru' jun nim laj koywal: “¡Lik mijun kojtawik!”

⁸ Xwiri yet, Ajwal, lik keatze'ej ike le; xaq keayo'ya i winaq chi kkikoj ti atzij.

⁹ Awu' yet kinriq ni tob'al wib', Wajwal Dios, yet at are incho'ab' xaq i tob'al wib'.

¹⁰ I Dios chi k'ax kinuna'o, kpe ni chink'ulaxik, ku'an ni chwe chi kwil kich'akik i je ajch'oj chwij.

¹¹ Lik mawil tob'al kiwach, man keje ile lik kk'un chkik'ux intinimit; chakichersaj b'i kiwach ru' acho'ab' xaq chaqajsaj ki'ij. ¡I Ajwal are i tob'al qib'!

¹² Lik kemakun ru' ni'pa i kkib'ij; ¡lik chetzaq ut chupam kitzaqsab'al rumal u'anik nim che kib' xaq rumal i t'oronik chi kkib'ij!

¹³ ¡Chachupu kiwach, chachupu kiwach ru' awoywal! ¡Chsach ni kiwach! ¡Ch-etamax na chi i Dios are i Ajawinel puwi ma Jacob xaq puwi ronojel uwach i jyub' ta'aj!

^14-15 Are ketzalij li kqaj ij keti'anik pacha taq je tz'i, xaq kkisutij rij i tinimit man kkitzukuj kiwa, lik ketz'uytz'at na man nti o kkiriqo.

¹⁶ Xwiri yin katinb'ixaj na are ksaqirik; lik kinsik'in ni chutzijoxik i k'axnab'al ak'ux xaq acho'ab'. Man yet at are tob'al wib' xaq ipa kinto wi wib' are in o pa k'ax.

¹⁷ Chawe yet kinb'ixaj wi b'ix, Wajwal Dios, man yet at incho'ab' xaq i tob'al wib'; ¡At are i Dios chi k'ax kinana'o!