Salmos 56 - Wuj Pa K'ubultzij

Ukub'ib'al ink'ux che i Dios xaq kinb'ixaj utzij

¹ Chawila tob'al inwach, Wajwal Dios, man lik je o winaq chi kinkiterb'ej, ronojel ij kech'ojin chwij xaq kinkiya pa k'ax.

² Lik ronojel ij kinkiterb'ej i je ajch'oj chwij, man lik je k'i kech'ojin chwij chi lik kkikoj ki'ij.

³ Are kinxij wib', yin kinkub'a ink'ux chawe.

⁴ Kinkub'a ink'ux che i Dios xaq kinb'ixaj utzij; kinkub'a ink'ux che i Dios xaq lik kinxij ti wib'. ¿Wach taq ku'an uri i winaq chwe?

⁵ Ronojel ij kki'an k'ax chwe ru' i tzij; lik xwi i utz taj kkich'ob' u'anik chwe.

⁶ Lik xaipa kkuwaj wi kib', in kiterb'em ipa kin-e wi, lik koy-em chik wach inkamsaxik kki'ano.

⁷ ¿Xatab'a ke'anmaj chwach i mak atzalal chi kki'ano? Ajwal Dios, chaqajsaj ki'ij i winaq re i jalajuj taq tinimit ru' awoywal.

⁸ Yet aweta'am ni'pa mul in anmajnaq; xaq yet kachaqijsaj ronojel uwa'al inwach. ¿Xatab'a atz'ib'am ti ile chupam awuj?

⁹ I je ajch'oj chwij ke'anmaj na are kintz'onoj intob'al chawe. Yin lik weta'am chi i Dios lik uya'om uwach wu'.

¹⁰ Kinkub'a ink'ux che i Dios, xaq kinb'ixaj utzij; kinkub'a ink'ux che i Ajwal, xaq kinb'ixaj utzij;

¹¹ kinkub'a ink'ux che i Dios, lik kinxij ti wib'. ¿Wach taq ku'an uri i winaq chwe?

¹² Ni'pa i sujunik chi xin-an chawe, Ajwal Dios, lik kinya ni chawe ru' ub'ixaxik a'ij,

¹³ man xinato chwach i kamik, man xaya ti chwe chi kintzaqik, man keje ile o ni jun ch'am laj ink'aslemal chwach i Dios.