Salmos 53 - Wuj Pa K'ubultzij

Makunik ke i winaq

¹ I je b'uy laj taq winaq kkich'ob' ike chi nti i Dios, konojel je tzaqnaq chupam i mak atzalal, lik xaqmanal kki'ano, ¡Lik nti jun k-anaw i utz!

² I Ajwal k'a chila chikaj keril li i winaq, ilb'al re we o jun o uno'oj xaq we o jun kutzukuj i Dios.

³ Xwiri konojel xe'e chupam i utz ti laj b'e, konojel kki'an i utz taj, lik je tzaqnaq chupam i mak atzalal. ¡Nti chik jun k-anaw i utz, lik mitene jun olik!

⁴ I utz ti laj taq winaq lik nti kino'oj, chi kkitij b'i intinimit chi pacha taq utijawik wa re trigo k-ani che, ike le xaq kkikuxtaj ti ub'i i Ajwal;

⁵ Tupu nti puwi kkixij kib', xwiri ike lik keb'arb'at ni rumal kixib'rikil, man i Dios kukichersaj b'i kib'aqil ni'pa i je ajch'oj chrij. Lik ketzaq ni pa k'ixb'alil man i Dios keuxutuj.

⁶ ¡Lik utz te'eq wetene kpe i tob'al ke aj Israel chwi jyub' Sion! Are keuk'am chub'i utinimit i Ajwal pkik'ijib'al, lik kekikot ni umuq uxikin ma Jacob xaq konojel i tinimit Israel.