Salmos 49 - Wuj Pa K'ubultzij

I mer kulo' ti ronojel ni'pa kajwax che jun k'aslemal

¹ Chita iri, tinimit xaq iwonojel yix chi ix jeqel chwach ronojel i jyub' ta'aj,

² ni'pa i b'eyomab' xaq i nib'a'ib' lik je xaqjun, xaq lik je xaqjun i nimaq kipatan ku' i je ajaj laj taq winaq.

³ Kinlapan ni ru' nojb'al, xaq kinb'ij ni ronojel ni'pa inch'ob'onik chi kel li pink'ux ru' i b'iwil;

⁴ kinkoj ni retalil ni'pa i tzij chi kb'ixik, xaq ru' usonil i arpa kinb'ixaj ni ni'pa uwam uwach.

⁵ ¿B'uchak kinxij taq wib' pu'ijlal i k'ax, are lik ksutix wij ru' ni'pa i utz taj chi kki'an i je ajch'oj chwij?

⁶ Ike le xa che kib'eyomal kikub'am wi kik'ux, xaq lik kkikoj ki'ij ru',

⁷ xwiri mijun ktiki chuto'ik rib' utukel, mitene kuya taq mer che i Dios man keje ile kuto.

⁸ ¡Lik nti mer chi kulo' taq uk'aslemal jun winaq,

⁹ man keje ile o ni uk'aslemal ronojel ij saq, xaq kel ni chwach i kamik!

¹⁰ Man kqilo chi konojel lik kekamik, kekam ni'pa o kino'oj xaq ni'pa nti kino'oj, ni'pa i kib'eyomal kkiya kanoq i jub'an chik kki'an ke che.

¹¹ Tupu xkiya ni'pa i kulew pkib'i, xwiri i kik'ijib'al ike chi k-e ij saq chrij are ni i jul; ¡Lik chila kekanaj wi ronojel ij saq!

¹² I winaq ronojel ij saq ti uwach uk'aslemal, tupu lik b'eyom, ire xaq kkamik pacha kki'an konojel i chikop.

¹³ Keje kkik'is wi konojel ni'pa kkikub'a kik'ux che kib'; keje ile kkik'is wi konojel ni'pa i kki'an nim che kib'.

¹⁴ Chke i winaq le, i kamik are i yu'unel ke chi keuk'am b'i pa jul, pacha taq je chij. Are ksaqirik Ni'pa i je utz ke'ajawin ni pkiwi ike le; ni'pa i kicho'ab' kok'ilal kk'isik, i kachoch ike le are i jul.

¹⁵ Xwiri i Dios kinuto ni pu'ab' i kamik, man kinuk'am b'i ru' Ire.

¹⁶ Matb'isonik we kawil i jun chi kb'eyomarik, xaq we lik kuwiq i rachoch,

¹⁷ man are kkamik, lik nti kuk'am b'i ru', mitene ni'pa u'ij chi olik kuk'am b'i ru'.

¹⁸ Tupu lik kkikotik are k'a k'aslik, xaq i winaq kkiya u'ij man lik b'eyom,

¹⁹ xwiri kuriq ni ij chi kkamik, lik kk'un ti chik saq chwach.

²⁰ I winaq ronojel ij saq ti uwach, tupu lik b'eyom, ire xaq kkamik pacha kki'an konojel i chikop.