Salmos 48 - Wuj Pa K'ubultzij

Unimal i tinimit Sion chi are i nim laj utinimit i Dios

¹ ¡Lik nim u'ij i Ajwal! ¡I qa-Dios lik kmajaw che chi kb'ixax putinimit xaq pa lo'laj ujyub'!

² ¡Lik chom unajtil rij i jyub' Sion, chila chuchi' chi o pa moxab'! ¡Lik are i kikotemal re ronojel uwach i jyub' ta'aj! ¡Lik are utinimit i nim laj Ajawinel!

³ I Dios o chila pa nimaq taq kachoch i ajawinelab' pa tinimit Jerusalén; i Dios uk'utum rib' pacha jun tob'al ib' chi nti xib'in ib' che.

⁴ Man i ajawinelab' xkimol kib' xaqjunam xe'e chu'anik ch'oj chrij i tinimit le.

⁵ Xwiri are xkil i tinimit le, xe'ok il, xkixij kib' xaq xe'anmajik.

⁶ Lik keb'arb'atik, kkipek'ek'ej kib' rumal uk'axk'ol pacha ku'an jun ixoq chi kalanik;

⁷ Pacha i tew chi kpe prelb'al ij, chi ku'an ch'aqa taq che i barco re i tinimit Tarsis chi o chuchi' i mar.

⁸ Chila putinimit i qa-Dios chi Ronojel Ktiki Che, lik qilom pacha xlap chqe: I Dios kukub'a ni i tinimit Jerusalén chi k-e ij saq chrij.

⁹ Ajwal Dios, chupam awachoch kojch'ob'on chrij i nim laj k'axnab'al ak'ux.

¹⁰ Ajwal Dios, lik chwach ronojel uwach i jyub' ta'aj katb'ixaxik chrij pacha kmajaw che ab'i. Ru' acho'ab' ka'an i suk'ul laj atb'al tzij.

¹¹ ¡Chkikot ni i jyub' Sion! ¡Chesak'lin ni che i kikotemal i jalajuj taq tinimit Judá rumal i suk'ul laj a'atb'al tzij!

¹² Chixb'in chrij chwach i jyub' Sion, xaq chiwajlaj ni'pa i tak'taq ja o che.

¹³ Chiwila pe i tapial nim uwach chi sutinnaq chrij xaq chrij i nim laj rachoch i ajawinel, man keje ile kilap ni chke imuq ixikin k-on panoq

¹⁴ chi keje i qa-Dios ile ronojel ij saq. ¡Are Ire kojrok'aj ni ronojel ij saq!