Salmos 47 - Wuj Pa K'ubultzij

I Dios are i ajawinel puwi ronojel uwach i jyub' ta'aj

¹ ¡Tinimit iwonojel, chipok'pa i ab'! ¡Chib'ixaj i Ajwal ru' i sik' re i kikotemal!

² Man i Ajwal, chi Nim laj Dios, lik kmajaw che kkoj u'ij; lik are i Nim laj Ajawinel re uwach i jyub' ta'aj.

³ Ire xuqajsaj ki'ij i tinimit xaq i nimaq taq tinimit xaq xeuya pqa'ab' yoj.

⁴ Ire u'ulum chik i sipon chi kuya chqe pacha jun kuxtab'al re, yab'al re u'ij ma Jacob, chi lik k'ax xuna'o.

⁵ I Dios xel b'i pukub'ib'al chi o u'ij ru' i sik' re kikotemal, xaq ru' uch'awb'al i trompet.

⁶ ¡Chib'ixaj, lik chib'ixaj i b'ix che i Dios! ¡Chib'ixaj, lik chib'ixaj i b'ix che i Qajawinel!

⁷ ¡Chib'ixaj jun chomalil tzij che i Dios, man Ire are i Ajawinel puwi ronojel uwach i jyub' ta'aj!

⁸ ¡I Dios are i Ajawinel puwi i nimaq taq tinimit! ¡I Dios kul chupam i lo'laj ukub'ib'al chi o u'ij!

⁹ I winaq chi o ki'ij re i nimaq taq tinimit xkijunamsaj kib' ru' i tinimit re i u-Dios ma Abraham.

¹⁰ Man ronojel ni'pa i cho'ab' chi o chwach i jyub' ta'aj lik re i Dios. ¡Are Ire o puwi ronojel!