Salmos 46 - Wuj Pa K'ubultzij

I Ajwal o qu' yoj

¹ I Dios are tol qe xaq are qacho'ab'; are Ire kojtowik are oj o pa k'ax.

² Rumali kqaxij ti qib' tupu kwulij i jyub' ta'aj, tupu kmuqtaj b'i i jyub' chupam i mar,

³ tupu kjinin upam i mar xaq krojoj uretum i ya; tupu kyikyat i jyub' rumal i roywal.

⁴ Jun raqana chi rumal u'ab' enaq b'ik, lik kukikotsaj utinimit i Dios chi are lo'laj tinimit chkixol utinimit i Nim laj Dios.

⁵ I Dios o chuxol i tinimit le xaq krok'aj na; i Dios kuto na are ksaqirsan che jun chik ij.

⁶ I winaq re i nimaq taq tinimit kesik'inik, i ajawinelab' keyutzyat rumal kixib'rikil, i ulew kwulijik are ktataj uch'awb'al.

⁷ ¡I Ajwal chi ronojel ktiki che lik o qu' yoj! ¡I u-Dios ma Jacob are tol qe!

⁸ Chixpet chrilik i nimaq taq anik chi i Ajwal u'anom chwach i jyub' ta'aj:

⁹ Ire uchupum uwach i ch'oj chwach ronojel i jyub' ta'aj, upatz'om i k'aqb'al ch'ab', u'anom mutmut che i che' ch'ich' utzam, ¡Uk'atom i ch'ich' re anb'al ch'oj!

¹⁰ ¡Chixuxlanoq! ¡Chiwetamaj chi Yin in Dios! ¡Yin in o puwi i nimaq taq tinimit! ¡Yin in o puwi ronojel i jyub' ta'aj!

¹¹ ¡I Ajwal chi ronojel ktiki che lik o qu' yoj! ¡I u-Dios ma Jacob are tol qe!