Salmos 45 - Wuj Pa K'ubultzij

Chomalil tzij re uk'ulankil i ajawinel

¹ Chomiq taq tzij keik'aw pinjolom; inchi' keje pacha jun utz'ib'anb'al jun ajtz'ib'. ¡Kinb'ij ni inchomalil tzij chwach i ajawinel!

² ¡Lik are yet mas at chom chkiwach konojel i achiyab'! ¡Lik chomiq taq tzij ke'el pachi'! Rumali i Dios xuya utzil chomal pawi chi k-e ij saq chrij.

³ ¡Yet chi lik ko awach, chaya i ch'ich' chi o uware k'ulala chwi awa' ru' a'ij achomal!

⁴ I a'ij achomal are uriqik i ch'akanik, Kakoch'ij awach rumal i saq laj tzij xaq u'anik i suk'ul laj atb'al tzij chke i je ajaj laj taq winaq; ¡I a'ab' wiqab'im ku'an i nimaq taq anik!

⁵ I winaq ketzaq pulew chwach awaqan, nim laj ajawinel; i je ach'ab' lik jutz utzam xaq kech'api chwach kik'ux i je ajch'oj chawij.

⁶ I ajawinik Ajwal Dios, lik k-e ij saq chrij, xaq lik are jun ajawinik chi lik suk'ulik.

⁷ K'ax kana i utz, xwiri tzel kawil i utz taj. Rumali at u'ulum i Dios, chi a-Dios yet, xaq uya'om jun nim laj kikotemal chawe chwach i kikotemal ke i awachi'il.

⁸ Ronojel a'u' lik muy ksiqawik rumal umuyil i mirra, áloe xaq i canela; ru' usonil i arpa lik katkikot pa nim laj awachoch chi antal ru' marfil.

⁹ Chkixol i ixoqib' chi je o pak'ijib'al, lik je chomiq taq altom chi kimi'al i ajawinelab'; pa wiqab'im che akub'ib'al chi o u'ij o ati ajawinel chi wiqtal ru' i rutzil an-o'oj.

¹⁰ Chata pe, inmi'al: Chakojo retalil che wach kinb'ij chawe: Mach'ob' chik awalk'uwal xaq i awinaq,

¹¹ man i ajawinel lik katraj rumal achomal; Ire are awajaw, xaq lik rajwaxik katkojon che.

¹² Umi'al i ajawinel aj Tiro, i winaq chi lik je b'eyomab' re i tinimit lik kek'un ni chawach ru' kisipon chutzukuxik i rutzil ak'ux.

¹³ ¡Waral kok b'i umi'al i ajawinel ru' ronojel uchomal! ¡I u'u' lik t'isom ru' i an-o'oj!

¹⁴ Lik wiqom ru' chomiq taq k'ul, kk'am b'i chwach i ajawinel, je teren b'i i altom chrij chi keyaw u'ij, i ni'pa i rachi'il keuk'am nu b'i chawe.

¹⁵ Ktijin kuponik ru' jun nim laj kikotemal; lik kekikotik ke'ok b'i pa nim laj rachoch i ajawinel.

¹⁶ Ni'pa i awak'al, nim laj ajawinel, lik kekanaj ni kan pkik'exel i awatit amam pa kub'ib'al chi o u'ij, xaq ka'an ni chke kerajawin chwach ronojel i jyub' ta'aj.

¹⁷ Yin kin-an na chi kkuxtax ab'i pa taq lemajil ronojel ij saq, xaq i winaq katkib'ixaj ni ronojel ij saq.