Salmos 44 - Wuj Pa K'ubultzij

Lapanik ru' i Dios tz'onb'al i tob'al ib' che

¹ Ajwal Dios, lik qatom ru' i qaxikin xaq qaqajaw qachuch kilapom chqe, ronojel ni'pa xa'an ujer kanoq are k'a je k'as ike,

² lik ru' a'ab' xeawesaj b'i i winaq chi kkikoj ti a'ij, xaya utojb'alil chke i nimaq taq tinimit, xaq chila pkik'ijib'al ike le xeaya wi i qaqajaw qachuch.

³ Man are ti ki'ab' xaq are ti kich'ich' chi o uware k'ulala xyaw i ch'akanik chke; are ti ike xek'amaw kan ulew le. ¡Lik are acho'ab' xtiki che! ¡Lik are a'ij achomal xtiki che, man yet lik k'ax xeana'o!

⁴ ¡Yet at wajawinel, Ajwal Dios! Yet xaya i ch'akanik che atinimit.

⁵ Awumal yet xeqach'ak i je ajch'oj chqij; ¡Lik pab'i yet xeqaya'ya che aqan ni'pa kech'ojin chqij.

⁶ Lik kinkub'a ti ink'ux che inch'ab'; xaq mitene inch'ich' chi o uware k'ulala kuya i ch'akanik chwe;

⁷ Man yet xojawesaj pki'ab' i je ajch'oj chqij, xaq xeaya pa k'ixb'alil ni'pa i kojkiyo'ya.

⁸ Lik arewi kqaya ni a'ij Ajwal Dios, xaq arewi kqab'ixaj ni ab'i.

⁹ Xwiri oj ak'aqom b'ik; oj atzaqsam chupam i k'ixb'alil. Lik kawachnimaj ti chik i qawinaq chi je yij che i ch'oj.

¹⁰ A'anom chqe chi qaya'om i chel qij chke i je ajch'oj chqij; ni'pa i ktitat kipam chqe, lik kki'an ela' chqe.

¹¹ Oj ajachom pki'ab', pacha taq oj chij chi kek'am b'i pa kamsab'al; akichersam b'i qawach chkixol i winaq chi kkikoj ti a'ij.

¹² Lik paqal ti xak'ayij wi atinimit, xwiri lik nti xach'ak che chi xak'ayij b'ik.

¹³ A'anom chqe chi lik oj yo'yo' pkichi'; Ni'pa je o chqij chqawach lik kojkiyo'ya xaq k'ax kech'aw chqij.

¹⁴ A'anom chqe chi ni'pa i kkikoj ti a'ij lik kojkiyo'ya; are kojkilo, lik ketzenik kkisutsa kijolom chqe.

¹⁵ Lik utz ti jub'i' in olik man lik arewi kkiqajsaj in-ij; lik kk'ix inpalaj che,

¹⁶ xa rumal i ajch'oj chwij, chi kraj ku'an uk'exel chwe ni'pa in-anom che, chi ku'an k'ax chwe ru' i tzij xaq kuqajsaj in-ij.

¹⁷ Ronojel ile xqak'ulmaj, xwiri at sachnaq ti chqak'ux, ¡Mitene oj ramtajnaq che atrat chi a'anom qu'!

¹⁸ Qach'ob'om ti awo'taxik, mitene qo'tam i utz laj ab'e.

¹⁹ Xwiri yet, oj aya'yam che aqan pa taq k'ijib'al chi lik ch'am taj. ¡Lik apasim qij ru' jun nim laj equmal!

²⁰ Wetene xatsach chqak'ux, Ajwal Dios, xaq we xqakoj u'ij jun tiox pak'exel yet,

²¹ yet lik kanab'ej te'eq, man lik aweta'am ronojel ni'pa kuch'ob' jun winaq puk'ux.

²² Xwiri awumal yet oj o chwach i kamik; kki'an chqe pacha taq oj chij chi kek'am b'i pa kamsab'al.

²³ ¿B'uchak katwarik, Ajwal? ¡Chatwalijoq, chatwalijoq! ¡Mojaxutuj ronojel ij saq!

²⁴ ¿B'uchak kawuwaj awib'? ¿B'uchak kojsach chak'ux, kawilo chi lik kqatij uyej?

²⁵ Lik oj kosnaq chik xaq kiqajsam qa'ij chqe, to' kqajukekej chik qib' pa taq ulew.

²⁶ ¡Chatwalijoq, chatpet chqato'ik Chojato rumal i k'axnab'al ak'ux!