Salmos 43 - Wuj Pa K'ubultzij

¹ Ajwal Dios, cha'ana i atb'al tzij chwe, ¡Chinato pki'ab' i winaq le chi kkikoj ti a'ij! ¡Chinato pu'ab' i t'oronel, xaq pu'ab' i utz ti laj winaq,

² man yet at in-Dios xaq at tol we! ¿B'uchak in awesam chawach? ¿B'uchak lik kinb'isonik xaq lik in o pa k'ax kumal i je ajch'oj chwij?

³ Chaya i saq xaq i saq laj atzij chwe, man keje ile kkik'ut i b'e chwe chi k-e chila ipa o wi lo'laj ajyub', che i k'ijib'al ipa at jeqel wi yet.

⁴ Man keje ile kinupon uri chwach asujb'al sipon, Ajwal Dios, xaq chila katinb'ixaj na ru' usonil i arpa, man yet Ajwal, lik kanojsaj ink'aslemal che i kikotemal.

⁵ ¿Wach wa rumal kinqajsaj ink'ux? ¿Wach wa rumal kink'achirik? Lik are i Ajwal in o chroy-exik; xaq are Ire k'a kinb'ixaj na. ¡Are Ire Tol we xaq are Ire in-Dios!