Salmos 20 - Wuj Pa K'ubultzij

Lapanik ru' i Dios rumal i ch'akanik

¹ Chatuta ni i Ajwal are at o chupam uyej; lik are ni u-Dios ma Jacob chatuto na.

² Chutaqa na li i tob'al awe k'a chila pa lo'laj k'ijib'al chi Sion ub'i.

³ Xaq chk'un ni ronojel asipon chuk'ux; xaq utz ni uk'amik chu'ana che aporom sipon chi kasujuj chwi sujb'al sipon.

⁴ Chuya ni ronojel wach urayijb'al ak'ux; xaq ch-antaj ni ronojel ni'pa ach'ob'om u'anik.

⁵ Yoj lik kojb'ixan ni ru' kikotemal rumal xatch'akan che i ch'oj, xaq kqayak ni k'ul chi kuk'ut u'ij jun tzob'aj pub'i i Qajwal Dios; ¡I Ajwal chuya ni ronojel ni'pa katz'onoj che!

⁶ Wo'or lik weta'am chi Ajwal kuya ni ch'akanik che i ajawinel chi u'ulum Ire; chi kula' na li uwach che chila che i lo'laj kaj ipa o wi Ire, kuya ni nimaq taq ch'akanik che ru' ucho'ab'.

⁷ Ike le kkiya kik'ux che kich'ich' re i ch'oj, xaq i jub'an chik kkiya kik'ux che kikaway; xwiri yoj kqaya qak'ux che i Qajwal Dios.

⁸ Ike le kb'ustaj pkich'ek, xaq ketzaqik, xwiri yoj kojtzaq taj, lik ko kojtak'i'ik.

⁹ ¡Ajwal Dios, chaya ni ch'akanik che i ajawinel! ¡Chala'a uwach chqe are katqasik'ij!