Salmos 2 - Wuj Pa K'ubultzij

Yet at wak'al

¹ ¿B'uchak to' xaqmanal kki'an i winaq chi kkikoj ti i Dios? ¿B'uchak kkich'ob' u'anik b'iroxik chi nti uchak?

² I ajawinelab' xaq i je aj-atol tzij re uwach ulew kekojon ti che i Ajwal, xaqjunam kewalij chu'anik ch'oj chrij xaq chrij i ajawinel chi ultalik.

³ Xaq kesik'in chub'ixkil i tziji: “¡Chqesaj i kikarena chi kikojom chqe! Xaq ¡Chqesaj qib' pki'ab'!”

⁴ I Ajwal chi krajawin chila chikaj, lik keutze'ej,

⁵ are petnaq chik roywal lik keuxib'ij; kub'ij i tziji chke ru' nim laj roywal:

⁶ “Lik inkojom chik ajawinel we Yin puwi i Sion chi are i lo'laj jyub' we Yin.”

⁷ Kintzijoj wach kuch'ob' u'anik i Ajwal: Ire ub'im chwe: “Yet at wak'al; Yin xatink'uwalij wo'or.

⁸ Chatz'onoj chwe chi kinya i nimaq taq tinimit chawe pacha jun kuxtab'al we, xaq chatz'onoj ronojel ni'pa k'isb'al taq rokolaq re uwach i jyub' ta'aj, man Yin kinya ni chawe.

⁹ Ru' ch'amiy ch'ich' ka'an ni ch'aqa taq chke i ajawinelab'; lik ch'aqa taq ka'an chke pacha taq upaxixik jun ulew b'oj.”

¹⁰ I ajawinelab' xaq i je aj-atol tzij re uwach ulew, chita ub'e iri, ¡Lik chixnaw che i k'utuniki!

^11-12 Chikojo u'ij i Ajwal ru' kikotemal xaq lik chixija iwib' che. Chixxuki chwach Ire ru' b'arb'atik, man keje ile kpe ti roywal xaq ksach ti iwach pa taq b'e. ¡Utz ke konojel ni'pa kkikub'a kik'ux che Ire!