Salmos 149 - Wuj Pa K'ubultzij

I Dios aj-anol i kaj ulew xaq ajawinel

¹ ¡K'amori che i Dios! Chib'ixaj jun k'ak' b'ix che i Ajwal, chikojo u'ij pa komon ke i winaq chi o saqil laj tzij pkik'ux,.

² Chixkikot yix chi ix aj Israel, chi ix aj pa tinimit Sion, man i Dios are Ire xix-anawik xaq are Ire Ajawinel piwi.

³ Chib'ixaj ub'i ru' xajoj, chib'ixaj i b'ix che ru' son re i arpa xaq ru' i chilchil.

⁴ Man i Ajwal kkikot ku' utinimit; kuya i ch'akanik chke i winaq chi ajaj kik'ux.

⁵ Yix chi ix utz laj taq winaq chixkikot ru' i ch'akanik, lik chixb'ixan ru' kikotemal tupu ix o chwi ich'at.

⁶ O ni b'ix re i Dios pkichi', xaq pki'ab' o ni jun ch'ich' chi o uware k'ulala

⁷ re anb'al uk'exel chke i winaq chi kkikoj ti i Dios, xaq yab'al re utojb'alil chke i nimaq taq tinimit,

⁸ re yut'b'al ke i ajawinelab' xaq i winaq chi o ki'ij, ru' nimaq taq karena re ch'ich',

⁹ anb'al re chke pacha i tojb'alil chi tz'ib'talik. ¡Ile yab'al ki'ij konojel i winaq chi o saqil laj tzij pkik'ux! ¡K'amori che i Dios!