Salmos 147 - Wuj Pa K'ubultzij

Xaqjun ti xu'an chke konojel i nimaq taq tinimit

¹ ¡K'amori che i Dios! ¡Lik utz kb'ixax i b'ix che qa-Dios! Man lik chom xaq kmajawik chi kb'ixax i u'ij i Ajwal.

² I Ajwal, kuyak chik i tinimit Jerusalén, xaq kumol kichi' konojel aj Israel chi to' je kichernaq b'ik.

³ Ire keukunaj i k'ax kanima xaq kupasij i k'ax chi o chke.

⁴ Are Ire kch'ob'owik ni'pa ch'umil ku'ano, xaq chkijujunal kukoj kib'i.

⁵ Lik nim i qa-Dios, xaq nim ucho'ab'; i unojb'al lik nti uk'isik.

⁶ I Ajwal kuyak ki'ij i winaq chi ajaj kik'ux, xwiri kuqajsaj ki'ij i itzel laj taq winaq.

⁷ Chib'ixaj i Ajwal ru' rutzil ik'ux, xaq chib'ixaj ru' i son re i arpa.

⁸ Ire kuch'uq uwach i kaj ru' i sutz', kuyijb'a i jab' re ja'b'al uwach ulew, keuk'iysaj i es chwa taq jyub',

⁹ Kuya kiwa i chikop, xaq kuya kiwa i kak'al i joj are kepich'awik.

¹⁰ Are ti ucho'ab' i kaway, xaq are ti ucho'ab' i winaq kkikot i Ajwal ru'.

¹¹ Ire kkikot ku' i winaq chi kkikoj u'ij, ni'pa kkikub'a kik'ux che i k'axnab'al uk'ux Ire.

¹² Jerusalén, chab'ixaj i Ajwal; tinimit Sion, chab'ixaj a-Dios.

¹³ Ire xu'an ko che i tz'apb'al chi ktz'apiw awachoch, xaq xuya utzil chomal pkiwi awak'al pa tinimit.

¹⁴ Ire kuya i chomb'al ib' chupam awulew, xaq kixunojsaj ru' chomiq taq trigo.

¹⁵ Ire kutaq b'i utzij chwach i jyub' ta'aj, i utzij lik juntir k-e b'i utzijol.

¹⁶ Are Ire k-anaw i solot saqb'ach chi yijinaq che ya chi ktzaq li chikaj chi pacha taq rismal chij, chi xaq kukichersaj b'i tew pacha taq k'ajil.

¹⁷ Ire kutaq li ab'aj ya chi pacha saqb'ach, rumal i tew chi joron kutaq loq, i ya k-on wonwik ab'aj.

¹⁸ Xwiri kutaq li utzij re kujarsaj i ab'aj ya le, kuxut'ij i tew, are uri kb'in i ya.

¹⁹ Ire xuya utzijol che ma Jacob, i u'atb'al tzij, utzij, xaq utaqanik xuya chke aj Israel.

²⁰ Keje ti ile xu'an chke i jub'an chik nimaq taq tinimit, chi lik xketamaj ti utaqanik. ¡K'amori che i Dios!