Salmos 146 - Wuj Pa K'ubultzij

B'ix re ronojel ni'pa u'anom i Dios

¹ ¡K'amori che i Dios! Kinb'ixaj ni Ajwal ru' ronojel ink'ux.

² Kinb'ixaj ni Ajwal tz'aqat k'a in k'aslik, kinb'ixaj ni b'ix che in-Dios tz'aqat k'a in k'aslik.

³ Mikub'a ik'ux che i winaq chi lik o u'ij, man jun to' winaq lik kuya ti totajik.

⁴ Man i winaq le are kkamik ktzalij chik puk'aj ulew, xaq lik che i ij le, ksach uwach ronojel uch'ob'onik.

⁵ Utz re i jun chi ktotaj rumal u-Dios ma Jacob, chi o ukub'ib'al uk'ux che i Rajwal Dios.

⁶ Ire xu'an i kaj, ulew, mar xaq ronojel ni'pa o chwach. Ire lik arewi ku'ano pacha i kub'ij.

⁷ Ku'an atb'al tzij chke ni'pa je o pa k'ax kumal i jub'an chik, xaq kuya kiwa ni'pa kenumik. I Ajwal keukir ni'pa i je o prexil.

⁸ I Ajwal, k-on chke i ketzun taj chi ketzun chik, i Ajwal keuyak i je tzaqnaq, xaq k'ax keuna i utz laj taq winaq.

⁹ Ajwal, cheato i winaq chi je aj naj, xaq cheatzuqu i malkanib' xaq i ak'alab' chi nti chik kiqajaw kichuch, xwiri ni'pa i je utz ti laj taq winaq, ku'an chke chi kkisach kib'e.

¹⁰ Yet, Sion, i Ajwal krajawin ni ronojel ij saq; i a-Dios krajawin ni ronojel ij saq. ¡K'amori che i Dios!