Salmos 145 - Wuj Pa K'ubultzij

Konojel i winaq chkikojo u'ij i Ajwal

¹ Kinnimarsaj ni a'ij in-Dios man Yet at Wajawinel, xaq kinnimarsaj ni u'ij ab'i ronojel ij saq.

² Ij ij kinya ni utzil chomal pawi, kinb'ixaj ni ab'i ronojel ij saq.

³ I Ajwal, lik nim u'ij, xaq kmajaw che chi kb'ixaxik, i unimal u'ij lik ktiki ti qano'oj chuch'ob'ik.

⁴ Chke i qajawxelab' k'a chke i kak'al kkiya ni u'ij ni'pa i anik chi a'anom, xaq kkitzijoj ni nimaq taq anik chi a'anom.

⁵ Xaq klap ni a'ij achomal, xaq yin kinlapan ni chrij i nimaq taq chomalil chi ka'ano,

⁶ Klap ni ronojel ni'pa i nimaq taq anik chi ka'ano, xaq lik b'isb'al, xaq yin kinlapan ni chrij unimal a'ij.

⁷ K-an ni lapanik chrij i nim laj rutzil ak'ux, xaq kesik'in ni chub'ixkil chi Yet lik at suk'ul laj Dios.

⁸ I Dios lik utz man kril tob'al qawach, pen kpe roywal, xaq lik nim i k'axnab'al uk'ux.

⁹ I Ajwal, lik utz ku' konojel i winaq, xaq ru' rutzil uk'ux kuk'uxlaj uwach ronojel ni'pa u'anom.

¹⁰ ¡Ajwal, ronojel ni'pa i je a'anom, chatkib'ixaj na! ¡Chatkib'ixaj ni ni'pa i je suk'ulik chawach!

¹¹ ¡I je suk'ulik chawach chelapan ni chrij u'ij uchomal awajawinik! ¡Xaq chelapan ni chrij ronojel i nimaq taq anik chi a'anom!

¹² ¡Chkiya ni utzijol chke i winaq ni'pa acho'ab', xaq i nim laj u'ij uchomal awajawinik!

¹³ I awajawinik are jun ajawinik ronojel ij saq uwach, xaq a'atb'al tzij lik ronojel ij saq uwach.

¹⁴ I Ajwal keuyak ni'pa i ketzaqik, xaq keuto konojel ni'pa i kk'is kicho'ab'.

¹⁵ I kib'a'wach konojel i winaq at kitaqem Yet, koy-em chi kaya kiwa pa taq u'oril.

¹⁶ Kajaq a'ab' xaq ru' ronojel ak'ux kaya utzil chomal pkiwi konojel i o kik'aslemal.

¹⁷ I Ajwal, lik suk'ulik che ronojel ub'e, lik o rutzil uk'ux che ronojel ni'pa i ku'ano.

¹⁸ I Ajwal naqaj o wi chke ni'pa kkikuxtaj kkinataj ub'i, chke ni'pa kkikuxtaj kkinataj ru' i saqil laj tzij pkik'ux.

¹⁹ Ire kuya urayijb'al kik'ux ni'pa kkikoj u'ij, are kkitz'onoj kitob'al che, keuta xaq keuto.

²⁰ I Ajwal, keuto xaq keumatzej ni'pa i k'ax kkina'o, xwiri lik kuk'is kiwach ni'pa i je utz ti laj taq winaq.

²¹ ¡I inchi' chub'ixaj ni Ajwal! ¡Konojel i winaq chkinimarsaj u'ij i lo'laj ub'i i Ajwal, wo'or xaq ronojel ij saq.