Salmos 138 - Wuj Pa K'ubultzij

Lapanik ru' i Ajwal re utioxixik che

¹ Kintioxij ni chawe Ajwal ru' ronojel ink'ux, lik chkiwach i dios kinb'ixaj ni b'ix chawe.

² Kinxuki na, kintzun b'i pusuk' i lo'laj awachoch; kink'amwaj kintioxij ni chawe rumal i k'axnab'al ak'ux xaq i atzij chi lik saq laj tzij. Man animarsam ab'i xaq i atzij puwi ronojel taq b'iroxik.

³ Are xinch'aw chawe, Yet xala' uwach chwe, xaq xanimarsaj incho'ab'.

⁴ Konojel i ajawinelab' chwach i jyub' ta'aj, kkikoj ni a'ij, are kkita i asujunik.

⁵ Kkib'ixaj ni Ajwal, chrij pacha uch'ob'om, man i u'ij xaq i uchomal lik nim.

⁶ Tupu i Ajwal lik k'a chikaj loq o wi, xwiri kril tob'al uwach i winaq chi ajaj chwach Ire, xaq chinaj kril li jun chi k-on nim che rib'.

⁷ Are in o chwach i jalajuj taq k'ax, Yet kaya ink'aslemal; kaqajsaj acho'ab' pinwi, xaq kinato man kinawesaj chkiwach i je ajch'oj chwij.

⁸ I Ajwal ku'an chwe yin pacha uch'ob'om. I k'axnab'al ak'ux, Ajwal, lik ronojel ij saq uwach, ¡Mawo'taj u'anik i chak chi ajeqom u'anik!