Salmos 137 - Wuj Pa K'ubultzij

Chi taq raqana re i Babilonia

¹ Chila kojkub'i wi chi taq raqana re i Babilonia, kojo'ik are kk'un i tinimit Sion chqak'ux.

² Keqatzayb'a qa-arpa che taq u'ab' i che' so'os chi je o chila pa tinimit.

³ Are oj o chila, i je oj k'amawnaq b'i prexil, xaq i je anawnaq k'ax chqe xkib'ij chqe, ¡Chi kqab'ixaj b'ix re i Sion ru' kikotemal!

⁴ ¿Xatab'a kqab'ixaj i b'ix re kojb'al u'ij Ajwal, che jun ulew chi qe yoj taj?

⁵ ¡We xuriqa jun ij katsach chink'ux Jerusalén, chchaqij ni uri in-ab' wiqab'im!

⁶ ¡Chnak'i ni utzam wa' pinchi' we katk'un ti chink'ux, we kinnimarsaj ti a'ij Jerusalén ru' inkikotemal.

⁷ Ajwal, chk'un chak'ux ni'pa je aj Edom, are xwulij i tinimit Jerusalén, xkib'ij: “¡Chichupu uwach, chichupu uwach xaq chib'oqo ukub'ib'al i kachoch!”

⁸ ¡Yet Babilonia, lik kchupsax ni awach! ¡Utz re ire chi ku'an ni uk'exel chawe rumal i xa'an chqe yoj!

⁹ ¡Utz re i jun chi keuchap awak'al xaq keuxa' ni chwach nimaq taq ab'aj!