Salmos 136 - Wuj Pa K'ubultzij

I k'axnab'al uk'ux i Dios nti uk'isik chke aj Israel

¹ Chitioxij che i Dios man Ire lik utz; man i k'axnab'al uk'ux lik ronojel ij saq uwach.

² Chitioxij che i Dios chi lik xwi Ire mas nim chkiwach i jub'an chik dios, man i k'axnab'al uk'ux lik ronojel ij saq uwach.

³ Chitioxij che i Ajwal ke i ajwal, man i k'axnab'al uk'ux lik ronojel ij saq uwach.

⁴ Xwi Ire k-anaw i nimaq taq chomalil, man i k'axnab'al uk'ux lik ronojel ij saq uwach.

⁵ Chitioxij che i jun chi x-anaw i kaj ru' nim laj nojb'al, man i k'axnab'al uk'ux lik ronojel ij saq uwach.

⁶ Xaq are Ire xli'aw b'i uwach ulew puwi i ya, man i k'axnab'al uk'ux lik ronojel ij saq uwach.

⁷ Chitioxij che i x-anaw i ij xaq i ik', man i k'axnab'al uk'ux lik ronojel ij saq uwach.

⁸ I ij re ktzun pa'ij, man i k'axnab'al uk'ux lik ronojel ij saq uwach.

⁹ I ik' xaq i ch'umil re ktzun cha'ab', man i k'axnab'al uk'ux lik ronojel ij saq uwach.

¹⁰ Chitioxij che i xkamsaw i nab'e taq i kak'al konojel aj Egipto, man i k'axnab'al uk'ux lik ronojel ij saq uwach.

¹¹ Chitioxij che i xe'elsaw li aj Israel pa Egipto, man i k'axnab'al uk'ux lik ronojel ij saq uwach.

¹² Ru' i nim laj ucho'ab' xuyak u'ab' chikaj, man i k'axnab'al uk'ux lik ronojel ij saq uwach.

¹³ Chitioxij che i x-anaw keb' che i mar kaq are xu'at pa nik'aj, man i k'axnab'al uk'ux lik ronojel ij saq uwach.

¹⁴ Are Ire chi xerik'awsaj i aj Israel chupam i mar, man i k'axnab'al uk'ux lik ronojel ij saq uwach.

¹⁵ Chitioxij che i xmuquw b'i ma Faraón chupam i Mar Kaq junam ku' uwinaq chi je yij che i ch'oj, man i k'axnab'al uk'ux lik ronojel ij saq uwach.

¹⁶ Chitioxij che Ire chi xuk'am b'i utinimit pa tz'inilik jyub' chaqij, man i k'axnab'al uk'ux lik ronojel ij saq uwach.

¹⁷ Chitioxij che Ire chi xkamsaw i nimaq taq ajawinelab', man i k'axnab'al uk'ux lik ronojel ij saq uwach.

¹⁸ Chitioxij che i xelsaw kik'aslemal i ajawinelab' chi lik nimaq ki'ij, man i k'axnab'al uk'ux lik ronojel ij saq uwach,

¹⁹ chitioxij che Ire chi xkamsaw ma Sehón, chi ajawinel ke aj Hamor, man i k'axnab'al uk'ux lik ronojel ij saq uwach.

²⁰ Chitioxij che i xkamsaw ma Og, chi ajawinel ke aj Basán, man i k'axnab'al uk'ux lik ronojel ij saq uwach.

²¹ Chitioxij che i xjachaw ulew chi ke te'eq i ajawinelab' le, man i k'axnab'al uk'ux lik ronojel ij saq uwach,

²² ile xuya che utinimit Israel pacha kuxtab'al, man i k'axnab'al uk'ux lik ronojel ij saq uwach.

²³ Chitioxij che Ire chi kojk'un chuk'ux are kojb'isonik, man i k'axnab'al uk'ux lik ronojel ij saq uwach.

²⁴ Chitioxij che i kojtow chkiwach i ajch'oj chqij, man i k'axnab'al uk'ux lik ronojel ij saq uwach.

²⁵ Chitioxij che i kyaw kiwa i winaq xaq i jalajuj taq chikop, man i k'axnab'al uk'ux lik ronojel ij saq uwach.

²⁶ ¡Chitioxij che i Dios aj chikaj, man i k'axnab'al uk'ux lik ronojel ij saq uwach!