Salmos 132 - Wuj Pa K'ubultzij

Usujunik i Dios che ma David

¹ Ajwal, chk'un ma David chak'ux, xaq ni'pa ronojel ub'is,

² Chk'un chak'ux wach i sujunik xu'an chawe Yet, che i nim laj u-Dios ma Jacob;

³ “Kinok ti chupam i chom laj wachoch, xaq kinkotz'i ti chwi inch'at che i uxlanem,

⁴ Kinmutz' ti inb'a'wach, xaq mitene jub'i' kinwarik,

⁵ we inriqom ti i ja re i Ajwal, chi nim laj u-Dios ma Jacob.”

⁶ Chila pa Efrata, xqata utzijoxik i kaxa re utrat i Dios, are uri xeqariqa che ulew Jaar.

⁷ ¡Jo' pa lo'laj k'ijib'al re i Ajwal! ¡Chojxukul chila ipa kutak'b'a wi raqan!

⁸ Chatwalijoq Ajwal junam ru' akaxa chi o ucho'ab', xaq chatpet che i k'ijib'al ipa katuxlan wi.

⁹ Chkiwiqa kib' ajsujul sipon ru' i suk'ul laj atb'al tzij, i ni'pa kiya'om kik'ux chawe, chesik'in rumal kikotemal.

¹⁰ Rumal ilb'al tob'al uwach ma David, chi awajpatan, maxutuj xaq maqajsaj u'ij i ajawinel chi a'ulum.

¹¹ I Ajwal, xu'an jun sujunik tzij che ma David chi lik ku'an na: Sujunik tzij chi lik kujalwachij ti chik.

¹² “I awak'al we kki'ano pacha kub'ij intrat xaq we kki'ano pacha kub'ij intaqanik chi kinya chke, xaq i kak'al ike le kek'iji ni uri pakub'ib'al chi o u'ij ronojel ij saq.”

¹³ ¡Man i Ajwal xu'ul i jyub' Sion! ¡Re rachoch Ire!

¹⁴ “Are jyub' ile ipa arewi kwaj wi olem, chila kink'iji wi man lik are inrayijb'al.

¹⁵ Lik kinya ni utzil chomal puwi ronojel ni'pa kkitijo, xaq kinya ni kiwa i nib'a'ib' chi je o chila, keje ile kik'aw ni kinumik.

¹⁶ Keinwiq ni je ajsujul sipon ru' i tonik, xaq kin-an ni chke i ni'pa kiya'om kik'ux che, chi lik kesik'in rumal i kikotemal.

¹⁷ Chila kin-an na chi kpe chik ucho'ab' ma David. Inyijb'am chik jun tzuk'b'al re i ajawinel chi in-ulum.

¹⁸ I je ajch'oj chrij keinya ni pa k'ixb'alil, xwiri ire kinch'uq ni rij ru' u'ij uchomal chi lik kwalch'inik.”