Salmos 13 - Wuj Pa K'ubultzij

Lapanik ru' i Dios re utz'onoxik tob'al ib' che

¹ Ajwal, ¿K'a junpa nawi kamayij ile chi in sachnaq chak'ux? ¿Xatab'a ronojel ij saq kinsach chak'ux? ¿K'a junpa nawi kamayij ile chi kawuwaj awib' chinwach?

² ¿K'a junpa nawi ile kel i wanima pa k'ax, xaq kumayij ink'ux chi kb'ison ij ij? ¿K'a junpa nawi kin-el pki'ab' i je ajch'oj chwij?

³ Wajwal Dios, chinawila, chala'a uwach chwe; cha'ana che inb'a'wach chi kril ub'e i utz, man keje ile kintzaq ti chupam i kamik.

⁴ Mub'ij taq i ajch'oj chwij: “Xintiki che”, ¡Mkikot taq chwe we xintzaq chupam i utz taj!

⁵ Yin inkub'am ink'ux che i k'axnab'al ak'ux; wanima lik kkikotik man yet kinato.

⁶ ¡Lik kinb'ixaj ni i Ajwal rumal i utz chi u'anom chwe!