Salmos 122 - Wuj Pa K'ubultzij

B'ix re i Jerusalén

¹ ¡Lik kinkikotik are kkib'ij chwe: “Koj-e prachoch i Ajwal”!

² Ktijin chik utak'alem i qaqan che uxol uchija re i Jerusalén.

³ Jerusalén tinimit chi lik utz u'anik antalik, ipa kkimol wi kib' i winaq.

⁴ Chila pa Jerusalén le kek'un wi utzob'ajil i Ajwal, re kkib'ixaj ub'i, chrij pacha i taqanik yatal chke aj Israel.

⁵ Xaq chupam i tinimit le o wi kikub'ib'al i atol tzij, chi are kikub'ib'al i atol tzij re rachoch i Ajawinel ma David.

⁶ Iwonojel yix chib'ij ru' ronojel ik'ux: “Lik ch-ol ni chomb'al ib' chawe yet tinimit Jerusalén, lik che'el ni chisaq konojel ni'pa i k'ax katkina'o.

⁷ Lik ch-ol ni chomb'al ib' chupam i tinimit chi sutim rij ru' tapial nim uwach; xaq lik nti xaqmanal kk'ulmax chupam i nim laj awachoch, utz na che'oloq.”

⁸ Wo'or kumal i watz incha' xaq i je wamiy, kinb'ij na: “Ch-ol ni chomb'al ib' chawe yet.

⁹ Xaq rumal k'axnab'al re i rachoch i Qajwal Dios, kintzukuj ni u'anik i utz chawe yet Jerusalén.”