Salmos 120 - Wuj Pa K'ubultzij

Ajwal chinawesaj chkiwach i ajt'oronelab'

¹ Are lik in o pa k'ax, xinb'ij che i Ajwal, Ire xula' uwach chwe.

² Ajwal, chinawesaj chwach i t'oronik chi kel pkichi' ajt'oronel, xaq chwach ronojel ni'pa i qatzij taj.

³ ¿Wach taq wa kuya re chawe katt'oronik xaq kanuk' i tzij chi qatzij taj?

⁴ ¡Xwi kuya chawe katkamsax ru' ch'ab' ke ajch'oj! ¡Xaq ru' a'al re i si' b'aqit!

⁵ ¡To' inwach yin chi pacha in aj naj in o chwach ulew Mesec, chi in o pa taq wu'waq ja k'ul ke aj Cedar!

⁶ Lik k'iyal chik ij in jeqinaq chkixol i winaq chi ktitat kipam che i chomb'al ib'.

⁷ Yin are kinch'ach'a i chomb'al ib', ike kkich'ach'a i ch'oj chwe.