Salmos 110 - Wuj Pa K'ubultzij

Uya'ik ucho'ab' i ajawinel rumal i Ajwal

¹ Keje iri xub'ij i Ajwal Dios che i ajawinel: “Chatkul pinwiqab'im, k'a keinya ni ajch'oj chawij chuxe' awaqan.”

² Che i jyub' Sion i Ajwal kuya ni ach'amiy k'utb'al re acho'ab', rumali ¡Chaqajsaj ni ki'ij i je ajch'oj chawij!

³ Che taq i ij re i ch'oj, i achiyab' chi je yij che i ch'oj lik ru' ronojel kik'ux kkisujuj ni kib' chato'ik. Chila pkiwi i lo'laj taq jyub', k'a chila ipa kel wi li i ij, xaq i ak'aslemal k-on na chi ij ij ktzalij pa k'ak'alil.

⁴ I Ajwal lik ub'im xaq lik kujalwachij ti utzij: “Yet lik at ajsujul sipon ronojel ij saq, chrij pacha ulemajil ma Melquisedec.”

⁵ I Ajwal o pawiqab'im; ku'an ni tz'ajtz'ik chke i ajawinelab' pu'ijlal i roywal.

⁶ Ku'at ni tzij pkiwi i nimaq taq tinimit xaq keut'ub'a ni i kamnaq, xaq ku'an ni tz'ajtz'ik chke i kijolom i winaq.

⁷ Are kk'atik kutu' ni uya' che i ralaxb'al ya, ile are kyaw chik k'ak' ucho'ab'.