Salmos 108 - Wuj Pa K'ubultzij

Wanima lik yijilik

¹ Jikil ink'ux chawe in-Dios, jikil ink'ux chub'ixaxik a'ij, ¡Ile lik kinkikot chu'anik!

² Chk'un saq chawach yet chi at arpa xaq yet chi at salterio, man kk'un ni saq chinwach che usaqirb'al re jun chik k'ak' ij.

³ Ajwal, katinb'ixaj ni chkixol i tinimit ch'utiq, xaq chkixol i nimaq taq tinimit.

⁴ Man i k'axnab'al ak'ux lik nim chwach i kaj. ¡I utz i chom laj atzij kupon k'a pa sutz'!

⁵ ¡Wajwal Dios, Yet at o puwi i kaj, xaq i a'ij achomal kuch'uq i jyub' ta'aj!

⁶ Chojato ru' acho'ab', ¡Chala'a uwach chqe! Man keje ile yoj, chi oj atinimit chi k'ax kojana'o, kojtotaj na!

⁷ I Dios ub'im pa lo'laj uk'ijib'al: “¡Yin kinkikot na, kinjach ni Siquem xaq kinpaj ni i ta'aj Sucot!

⁸ We Yin a Galaad, we Yin a Manasés i a Efraín are tob'al injolom; a Judá are inch'amiy re intaqanik.

⁹ A Moab are yab'al ya re ch'ajb'al wib'; chrij a Edom kink'aq wi inxajab'; ¡Kinb'ixaj ni b'ix are kech'aktaj aj Filistea!”

¹⁰ ¿Pachin nawi kink'amaw b'i pa tinimit chi sutim rij ru' tapial? ¿Pachin nawi kk'utuw i b'e chwe chi k-e pa Edom?

¹¹ Yet, Ajwal, oj awo'tam kanoq, man ¡Kat-e ti chik ku' achiyab' qe yoj chi je yij che i ch'oj!

¹² Chojato chkiwach i ajch'oj chqij, man i tob'al chi kkiya i winaq lik nti uchak.

¹³ Ru' utob'al i Dios kqariq ni ch'akanik re nimaq taq b'iroxik; ¡Ire keuya'ya ni i je ajch'oj chqij!