Proverbios 31 - Wuj Pa K'ubultzij

Utzij i ma Lemuel

¹ Iri are i tzij chi xb'ix che i ajawinel ma Lemuel aj Masa rumal uchuch:

² At lo'laj wak'al, at uwachinik inch'akul, chi xatya' chwe rumal i Dios man xintz'onoj che; ¿Wach mas kinb'ij chawe?

³ Mak'is acho'ab' ku' ixoqib', man xa kumal ike le ketzaq i ajawinelab'.

⁴ Ma Lemuel, lik utz taj chi ajawinelab' xaq i je atol taq tzij kkitu' i uwa'al uva muqb'am xaq i jub'an chik ya re ab'arik.

⁵ Moqxa rumal ki'ab'arik ksach u'atik tzij chkik'ux, xaq xaqmanal kki'an uri chke i ajaj laj taq winaq.

⁶ Are chaya uwa'al uva muqb'am xaq i jub'an chik ya re ab'arik chke i ya kekamik xaq chke i to' keb'isonik;

⁷ ¡Che'ab'aroq xaq chsach ni kinib'a'il chkik'ux xaq i uyej chi je o chupam!

⁸ Chatch'aw chkij i jub'an chi kkiriq ti ch'awik; ¡Cheato i jub'an chi kkiriq ti uto'ik kib'!

⁹ Ko chatch'awoq xaq cha'ana i suk'ul laj atb'al tzij chke; cheato i nib'a'ib' xaq i ajaj laj taq winaq.

Uya'ik u'ij jun utz laj ixoq

¹⁰ Jun utz laj ixoq chi lik chom uk'aslemal chi xaq lik kukoch'ij rib' chu'ankil i utz, lik k'ax uriqtajik, man lik mas o u'ij chwach i chomiq taq ab'aj chi o k'iyal taq utzunb'al.

¹¹ I rachijil lik ukub'am uk'ux che ire, man lik nti kramtaj che ub'itaq re.

¹² Lik kuya i rajwaxik xaq i kikotemal che i rachijil ronojel ij re uk'aslemal.

¹³ K-e chutzukuxik i lana xaq i lino, xaq ru' ronojel uk'ux ku'an i chak chi ru' u'ab' ku'ano.

¹⁴ Keje pacha jun barco chi ajk'ayinel, chi keuk'ama li i k'ayij k'a naj.

¹⁵ Are kpakpat usaqirb'al kwalijik, keutzuq i rak'al xaq kujach kichak i rajke'elab'.

¹⁶ K-e chrilik jun ulew te'uri kulo'o, xaq ru' ni'pa i mer chi kuch'ako, kutik tikon chwach.

¹⁷ Lik ru' ronojel ucho'ab' xaq ru' ronojel uk'ux kchakunik.

¹⁸ Lik kuk'uxlaj uwach uk'ay man keje ile kel ni utz, xaq lik cha'ab' kchakunik lik pen kwarik.

¹⁹ Ru' u'ab' ku'an i chij xaq i kemanik.

²⁰ Arewi keuto i nib'a'ib' xaq konojel ni'pa o rajwaxik chke.

²¹ Nti kuch'ob' chke i ralk'uwal are kpe i tew joron, man konojel i ralk'uwal o ki'u' re kkikalyej are lik joron.

²² Are ire k-anaw i ch'uqb'al uwi i ch'at chi b'uyuy, xaq lik kuwiq rib' ru' chomiq taq k'ul chi lik paqal rajil.

²³ I rachijil lik etamam uwach pa tinimit, man xaq lik etamam uwach chkixol ni'pa o ki'ij pa tinimit.

²⁴ Ire ku'an i jurjaq taq k'ul, xaq ku'an ximb'al pamaj, te'uri kuk'ayij chke ajyakol k'ayij.

²⁵ Ire kuwiq rib' ru' ucho'ab' xaq ru' u'ij; lik kk'achir ti che i re chweq kab'ij.

²⁶ Xaq lik arewi ru' no'oj kch'awik, xaq ru' k'axnab'al k'uxij ku'an i k'utunik.

²⁷ Ire lik kukoj retalil wach taq rajwaxik prachoch, xaq lik to' ti kutij jun b'iroxik we uch'akom taj.

²⁸ I rak'al xaq i rachijil kkikoj u'ij xaq kkib'ij che:

²⁹ “I utz laj taq ixoqib' je k'i je olik, xwiri yet lik mas at utz chkiwach konojel.”

³⁰ I ixoq chi lik kuwiq rib' ile xa kt'oronik, i chomalil xa ksachik. Xwiri ixoq chi kukoj u'ij i Ajwal lik kmajaw che kya' u'ij.

³¹ ¡Chikojo u'ij chkiwach konojel i winaq re i tinimit! ¡Lik chiya retamaxik ronojel ni'pa u'anom!