NÚMEROS 33 - Wuj Pa K'ubultzij

Kib'e aj Israel

¹ I aj Israel are xe'el li pa Egipto, lik ketususik pacha i achiyab' chi je yij che i ch'oj, are ma Moisés xaq ma Aarón je nab'e chkiwach.

² I ma Moisés kutz'ib'aj ub'i i jalajuj taq k'ijib'al ipa ke'el wi xaq ipa keupon wi. Arewi keje ile xu'ano ipa ke'el wi xaq ipa keupon wi; chrij pacha kb'ix che rumal i Ajwal. Are xeik'aw wi iri are xkimaj b'i kib'e:

³ I aj Israel xe'el b'i Ramesés che i ij jo'lajuj re i nab'e ik', jun ij chrijil i nima'ij Pascua. Lik ru' nim laj ucho'ab' i Ajwal, xe'el li tusus chkiwach konojel aj Egipto.

⁴ Tz'aqat aj Egipto le ketijin chumuqik konojel i nab'e taq kak'al chi xekamsax rumal i Ajwal, man ru' ile, i Ajwal xu'at tzij pkiwi kitiox ike.

⁵ I aj Israel xe'el chila pa Ramesés, xeupon k'a Sucot.

⁶ Xe'el chik chila pa Sucot xeupon k'a pa Etam, chuchi' i tz'inilik jyub' chaqij.

⁷ Xe'el chik chila pa Etam, xwiri xetzalij chal chkij, xek'un k'a pa Pi-hahirot chi o pusuk' i relb'al ij che i Baal-zefón, chila xe'uxlan wi chwach Migdol.

⁸ Xe'el chik chila pa Pi-hahirot, xki'axuj i Mar Kaq, xeupon k'a pa tz'inilik jyub' chaqij. Oxib' ij xeb'in pa tz'inilik jyub' chaqij chi Etam ub'i, xe'uxlan chila pa Mara.

⁹ Xe'el chik chila pa Mara, xeupon k'a pa Elim, chila xe'uxlan wi ipa o wi kab'lajuj ralaxb'al ya xaq lajuj oxwinaq (70) uche'lal palma.

¹⁰ Xe'el chik chila pa Elim, xeupon k'a naqaj che i Mar Kaq.

¹¹ Xe'el chik chila naqaj che i Mar Kaq, xeupon k'a pa tz'inilik jyub' chaqij Sin.

¹² Xe'el chik chila pa tz'inilik jyub' chaqij Sin, xeupon k'a pa Dofca.

¹³ Xe'el chik chila pa Dofca, xeupon k'a pa Alús.

¹⁴ Xe'el chik chila pa Alús, xeupon k'a pa Refidim, chila i winaq lik nti ya xkiriqo re tu'ik re.

¹⁵ Xe'el chik chila pa Refidim, xeupon k'a chila pa tz'inilik jyub' chaqij Sinaí.

¹⁶ Xe'el chik chila pa tz'inilik jyub' chaqij Sinaí, xeupon k'a pa Kibrot-hataava.

¹⁷ Xe'el chik chila pa Kibrot-hataava, xeupon k'a pa Hazerot.

¹⁸ Xe'el chik chila pa Hazerot, xeupon k'a pa Ritma.

¹⁹ Xe'el chik chila pa Ritma, xeupon k'a pa Rimón-peres.

²⁰ Xe'el chik chila pa Rimón-peres, xeupon k'a pa Libna.

²¹ Xe'el chik chila pa Libna, xeupon k'a pa Rissa.

²² Xe'el chik chila pa Rissa, xeupon k'a pa Ceelata.

²³ Xe'el chik chila pa Ceelata, xeupon k'a puwi i jyub' Sefer.

²⁴ Xe'el chik chila puwi i jyub' Sefer, xeupon k'a pa Harada.

²⁵ Xe'el chik chila pa Harada, xeupon k'a pa Macelot.

²⁶ Xe'el chik chila pa Macelot, xeupon k'a pa Tahat.

²⁷ Xe'el chik chila pa Tahat, xeupon k'a pa Tara.

²⁸ Xe'el chik chila pa Tara, xeupon k'a pa Mitca.

²⁹ Xe'el chik chila pa Mitca, xeupon k'a pa Hasmona.

³⁰ Xe'el chik chila pa Hasmona, xeupon k'a pa Moserot.

³¹ Xe'el chik chila pa Moserot, xeupon k'a pa Bene-jaacán.

³² Xe'el chik chila pa Bene-jaacán, xeupon k'a che i jyub' Hor chi ukwenta ulew Gidgad.

³³ Xe'el chik chila che i jyub' Hor, chi ukwenta ulew Gidgad, xeupon k'a pa Jotbata.

³⁴ Xe'el chik chila pa Jotbata, xeupon k'a pa Abrona.

³⁵ Xe'el chik chila pa Abrona, xeupon k'a pa Ezión-geber.

³⁶ Xe'el chik chila pa Ezión-geber, xeupon k'a pa tz'inilik jyub' chaqij Zin, chi xaq Cades ub'i.

³⁷ Xe'el chila pa tz'inilik jyub' chaqij Zin, chi xaq Cades ub'i, xe'e puwi i jyub' Hor, chi chuchi' chik i Edom,

³⁸ Rumal utaqanik i Ajwal, i ma Aarón, chi ajsujul sipon, xel b'i puwi i jyub' Hor, chila xkam wi che i nab'e ij, re ujo' ik' che i junab' kawinaq (40) che i kelik li aj Israel pa Egipto.

³⁹ Are xkam ma Aarón chila puwi i jyub' Hor, o oxib' waqwinaq (123) junab' che.

⁴⁰ I ajawinel aj Canaán chi krajawin puwi i tinimit Arad, chi jeqel te'eq pa Neguev ukwenta i jyub' Canaán, ire xretamaj chi keupon aj Israel.

⁴¹ Xe'el chik chila che i jyub' Hor, xeupon k'a pa Zalmona.

⁴² Xe'el chik chila pa Zalmona, xeupon k'a pa Punón.

⁴³ Xe'el chik chila pa Punón, xeupon k'a pa Obot.

⁴⁴ Xe'el chik chila pa Obot, xeupon k'a pa Ije-abarim chuchi' chik i Moab.

⁴⁵ Xe'el chik chila pa Ije-abarim chuchi' chik i Moab, xeupon k'a pa Dibón-gad.

⁴⁶ Xe'el chik chila pa Dibón-gad, xeupon k'a pa Almón-diblataim.

⁴⁷ Xe'el chik chila pa Almón-diblataim, xeupon k'a puwi i jyub' Abarim chi o chwach i jyub' Nebo.

⁴⁸ Xe'el chik chila che i jyub' Abarim, xeupon k'a chwa ta'aj Moab, chuchi' i raqana Jordán, chwach i Jericó.

⁴⁹ I aj Israel are xek'iji chila chuchi' i raqana Jordán, xjeqan b'i kichi' che i Bet-jesimot, xupon kichi' k'a Abel-sitim, chila chwa ta'aj re Moab.

Atb'al tzij re uk'amik xaq ujachik ulew Canaán

⁵⁰ I Ajwal xlapan ru' ma Moisés chila chwa ta'aj re i Moab, chutzal i raqana Jordán chwach i tinimit Jericó, xub'ij che:

⁵¹ “Chab'ij iri chke aj Israel: Are ki'axuj i raqana Jordán xaq are kixok b'i pa tinimit Canaán,

⁵² cheiwesaj nu b'i konojel i winaq chi je o chila che i tinimit le xaq chisacha kiwach ronojel kitiox chi ki'anom; tiox ab'aj, tiox ch'ich', xaq chiwulijsaj ronojel ni'pa i k'ijib'al chi ki'anom chwi taq jyub' re kojb'al u'ij kitiox le.

⁵³ Chik'ama ulew le xaq chix-ol chwach, man Yin kinjach ni chiwe yix iwonojel re kixk'iji chwach.

⁵⁴ Xwiri lik ru' i sakinik kijach ni ulew le chke konojel alk'uwal ke i jalajuj taq tzob'ajil, i alk'uwal chi lik je k'i lik nim ni ulew kya' chke, xaq i alk'uwal chi je k'i taj xaq xa jub'i' ulew kya' ni chke, chkijujunalil kya' ni kulew chrij pachike kkich'ako,

⁵⁵ man we yix keiwesaj tu b'i i winaq chwach ulew le, ike le kixkich'ich'a na, je keje na pacha taq jun xuruk' chi lik kjuch'uch' uk'axk'ol pib'a'wach xaq pacha jun k'ix chi kch'apch'at che ich'akul, are kixjeqi chwach ulew le.

⁵⁶ Lik kin-an ni uri chiwe yix pacha inch'ob'om u'anik chke ike.”