NÚMEROS 29 - Wuj Pa K'ubultzij

Nima'ij re i trompeta

¹ Che i nab'e ij re uwuq ik' yix ki'an ni jun lo'laj moloj ib'; che i ij le mijun kchakunik man i ij le are u'ijlal uxut'ixik trompeta.

² Are uri kisujuj ni jun porom sipon re umuyal uk'ok'al chinwach yin, jun ral me', jun chij ma xaq wuqub' ral taq chij aj jujun junab', chi je klis taj.

³ Rajwaxik chi koksax b'i rutzil arin ru' xaq kyot' b'i aceite chupam. I jujun ral taq me' koksax b'i jun almul rutzil arin ru', i jujun chij ma koksax b'i wajxaqib' ral taq k'ox ru',

⁴ xaq i jujun ral taq chij chi aj jujun junab' koksax b'i kajib' ral taq k'ox ru'.

⁵ Xaq ksujux ni jun chab'at ma chi are jun sipon re riqb'al kuyb'al imak.

⁶ Puwi chik i porom sipon re ik' ik', xaq puwi chik i sipon chi ksujux ij ij pa taq usaqirb'al, rachi'ilam i sipon ch'irajil xaq i sipon chi uwa'al uva muqb'am, pacha intaqom u'anik yin. Ile are jun porom sipon re umuyal uk'ok'al kupon chinwach Yin kojb'al re in-ij.

I sipon re u'ijlal i kuyb'al mak

⁷ Xaq che uwuq ik' le xwiri che i lajuj ij yix ki'an ni jun lo'laj moloj ib'. Che i ij le kimayij ni iwa'im man kitz'onoj tob'al iwe chwe yin, xaq mijun kchakunik.

⁸ Are uri kisujuj jun porom sipon re umuyal uk'ok'al chinwach yin, jun ral me', jun chij ma xaq wuqub' ral taq chij aj jujun junab' chi je klis taj.

⁹ Rajwaxik chi koksax b'i rutzil arin ru' xaq kyot' b'i aceite chupam. I jujun ral taq me' koksax b'i jun almul rutzil jok'om trigo ru', i jujun chij ma koksax b'i wajxaqib' ral taq k'ox ru',

¹⁰ xaq i jujun ral taq chij chi aj jujun junab' koksax b'i kajib' ral taq k'ox ru'.

¹¹ Xaq ksujux ni jun chab'at ma re riqb'al kuyb'al mak, puwi chik i sipon re riqb'al kuyb'al mak chi ksujux che i ij re kuyb'al mak xaq puwi chik i porom sipon re ij ij rachi'ilam i sipon ch'irajil xaq i sipon chi uwa'al uva muqb'am.

I sipon are ktijin i nima'ij ke i mujb'al re es

¹² Che i ij jo'lajuj re uwuq ik' yix ki'an ni jun lo'laj moloj ib'. Che i ij le lik mijun kchakunik; xaq lik wuqub' ij ki'an ni nima'ij re kojb'al in-ij.

¹³ Che i nab'e ij kisujuj ni porom sipon re umuyal uk'ok'al chinwach yin. Oxlajuj ral taq me', keb' mama'ib' chij xaq kajlajuj ral taq chij aj jujun junab' chi je klis taj.

¹⁴ Rajwaxik chi koksax b'i rutzil arin ru' xaq kyot' b'i aceite chupam. I jujun ral taq me' koksax b'i jun almul rutzil arin ru', i jujun chij ma koksax b'i wajxaqib' ral taq k'ox ru',

¹⁵ xaq i jujun ral taq chij aj jujun junab' koksax b'i kajib' ral taq k'ox ru'.

¹⁶ Xaq ksujux ni jun chab'at ma re riqb'al kuyb'al mak, puwi chik i porom sipon re ij ij rachi'ilam i sipon ch'irajil xaq i sipon chi uwa'al uva muqb'am.

¹⁷ Chukab' ij ksujux ni kab'lajuj ral taq me', keb' chij mama'ib' xaq kajlajuj ral taq chij aj jujun junab' chi je klis taj.

¹⁸ Xaq ksujux ni sipon ch'irajil xaq i sipon chi uwa'al uva muqb'am chrij pacha kik'iyal i me', chrij pacha kik'iyal i chij mama'ib' xaq chrij kik'iyal ral taq chij aj jujun junab', chrij pacha i taqanik chi xinya yin.

¹⁹ Xaq ksujux ni jun chab'at ma re riqb'al kuyb'al mak, puwi chik i porom sipon re ij ij, rachi'ilam i sipon ch'irajil xaq i sipon chi uwa'al uva muqb'am.

²⁰ Che urox ij ksujux ni julajuj ral taq me', keb' mama'ib' chij xaq kajlajuj ral taq chij aj jujun junab', chi je klis taj.

²¹ Xaq ksujux ni sipon ch'irajil xaq i sipon chi uwa'al uva muqb'am chrij pacha kik'iyal i me', chrij pacha kik'iyal i chij mama'ib' xaq chrij kik'iyal ral taq chij aj jujun junab', chrij pacha i taqanik chi xinya yin.

²² Xaq ksujux ni jun chab'at ma re riqb'al kuyb'al mak, puwi chik i porom sipon re ij ij rachi'ilam i sipon ch'irajil xaq i sipon chi uwa'al uva muqb'am.

²³ Che ukaj ij ksujux ni lajuj me', keb' mama'ib' chij xaq kajlajuj ral taq chij aj jujun junab' chi je klis taj.

²⁴ Xaq ksujux ni sipon ch'irajil xaq i sipon chi uwa'al uva muqb'am chrij pacha kik'iyal i me', chrij pacha kik'iyal i chij mama'ib' xaq chrij kik'iyal ral taq chij aj jujun junab', chrij pacha i taqanik chi xinya yin.

²⁵ Xaq ksujux ni jun chab'at ma re riqb'al kuyb'al mak, puwi chik i porom sipon re ij ij rachi'ilam i sipon ch'irajil xaq i sipon chi uwa'al uva muqb'am.

²⁶ Che ujo' ij ksujux ni b'elejeb' ral taq me', keb' mama'ib' chij xaq kajlajuj ral taq chij aj jujun junab' chi je klis taj.

²⁷ Xaq ksujux ni sipon ch'irajil xaq i sipon chi uwa'al uva muqb'am chrij pacha kik'iyal i me', chrij pacha kik'iyal i chij mama'ib' xaq chrij kik'iyal ral taq chij aj jujun junab', chrij pacha i taqanik chi xinya yin.

²⁸ Xaq ksujux ni jun chab'at ma re riqb'al kuyb'al mak, puwi chik i porom sipon re ij ij rachi'ilam i sipon ch'irajil xaq i sipon chi uwa'al uva muqb'am.

²⁹ Che uwaq ij ksujux ni wajxaqib' ral taq me', keb' mama'ib' chij xaq kajlajuj ral taq chij aj jujun junab', chi je klis taj.

³⁰ Xaq ksujux ni sipon ch'irajil xaq i sipon chi uwa'al uva muqb'am chrij pacha kik'iyal i me', chrij pacha kik'iyal i chij mama'ib' xaq chrij kik'iyal ral taq chij aj jujun junab', chrij pacha i taqanik chi xinya yin.

³¹ Xaq ksujux ni jun chab'at ma re riqb'al kuyb'al mak, puwi chik i porom sipon re ij ij rachi'ilam i sipon ch'irajil xaq i sipon chi uwa'al uva muqb'am.

³² Che uwuq ij ksujux ni wuqub' ral taq me', keb' mama'ib' chij xaq kajlajuj ral taq chij aj jujun junab' chi je klis taj.

³³ Xaq ksujux ni sipon ch'irajil xaq i sipon chi uwa'al uva muqb'am chrij pacha kik'iyal i me', chrij pacha kik'iyal i chij mama'ib' xaq chrij kik'iyal ral taq chij aj jujun junab', chrij pacha i taqanik chi xinya yin.

³⁴ Xaq ksujux ni jun chab'at ma re riqb'al kuyb'al mak, puwi chik i porom sipon re ij ij rachi'ilam i sipon ch'irajil xaq i uwa'al uva muqb'am.

³⁵ Che uwajxaqib' ij xaq ki'an ni jun lo'laj moloj ib' xaq mijun kchakun che i ij le.

³⁶ Are uri kisujuj ni jun porom sipon re umuyal uk'ok'al chinwach yin, jun ral me' jun chij ma xaq wuqub' ral taq chij aj jujun junab', chi je klis taj.

³⁷ Xaq ksujux ni sipon ch'irajil xaq i sipon chi uwa'al uva muqb'am ru' i me', ru' i chij ma xaq ku' i ral taq chij aj jujun junab', chrij pacha i taqanik chi xinya yin.

³⁸ Xaq ksujux ni jun chab'at ma re riqb'al kuyb'al mak, puwi chik i porom sipon re ij ij rachi'ilam i sipon ch'irajil xaq i sipon chi uwa'al uva muqb'am.

³⁹ Ronojel ni'pa ile are i sipon chi kiya ni chwe Yin che taq i ij chi xinb'ij. Puwi chik isipon yix, chi ax i sujum wi, o we lik pik'ux elnaq wi loq. Nti k-ono we are i porom sipon, we are i sipon ch'irajil xaq we are i sipon chi uwa'al uva muqb'am, xaq we are i sipon re chomb'al ib'.

⁴⁰ Are uri ma Moisés xub'ij chke aj Israel ronojel ni'pa xb'ix che rumal i Ajwal.