NÚMEROS 28 - Wuj Pa K'ubultzij

Sipon re ij ij

¹ I Ajwal xlapan ru' ma Moisés, xub'ij che:

² Chab'ij chke aj Israel chi kkimayij ti usujuxik kisipon chinwach pacha usuk' chi are i lejom wa re trigo xaq i porom sipon che i jalajuj taq nima'ij, man i sipon le are jun sipon re umuyal uk'ok'al chwe yin.

³ Xaq chab'ij chik chke chi are sipon iri chi kporox ni chinwach kojb'al in-ij: Ij ij ksujux ni kakab' ral taq mama'ib' chij chi aj jujun junab' chi je klis taj.

⁴ Jun kporox ksaqirik xaq jun chik kporox kqaj ij.

⁵ I sipon ch'irajil koksax b'i kajib' ral taq k'ox rutzil arin ru' xaq yot'tal b'i oxib' ral taq k'ox aceite chupam chi elsam che Olivo.

⁶ Are i sipon ile chi xtaq uporoxik arewi chila puwi i jyub' Sinaí, chi are i sipon re umuyal uk'ok'al re i Ajwal.

⁷ I sipon chi are i uwa'al uva muqb'am koksax b'i oxib' ral taq k'ox ru' i jujun chij. I uwa'al uva muqb'am le, rajwaxik ktix ni pa lo'laj k'ijib'al re i Dios kojb'al re in-ij.

⁸ I ukab' chij le ksujux na are kqaj ij, xaq koksax b'i jun sipon ru' chi ch'irajil, xaq jun sipon chi uwa'al uva muqb'am, pacha x-ani che i sipon re usaqirb'al chi are jun sipon re umuyal uk'ok'al chi kporoxik kojb'al u'ij i Ajwal.

I sipon re i ij sábado

⁹ Che taq i ij sábado arewi ksujux kakab' chij chi aj jujun junab' chi xaq lik je klis taj, xaq wajxaqib' ral taq k'ox arin chi lik rutzil chi xaq kyot' b'i aceite chupam, ile are jun sipon ch'irajil; xaq rajwaxik chi k-e uwa'al uva muqb'am ru'.

¹⁰ I porom sipon le ksujux che taq i ij sábado junam ru' i sipon chi uwa'al uva muqb'am, chrijil chik i sipon chi ksujux ij ij.

I sipon chi kya' ik' ik'

¹¹ I nab'e ij che ik' ik' ksujux ni porom sipon chinwach yin, keb' ral taq torib', jun chij ma xaq wuqub' ral taq chij aj jujun junab', chi lik je klis taj

¹² Ru' jujun ral taq torib' koksax b'i jun almul rutzil arin ru' xaq kyot' b'i aceite chupam xaq ru' i jujun chij ma koksax b'i wajxaqib' ral taq k'ox rutzil arin ru' xaq kyot' b'i aceite chupam;

¹³ xaq ru' jujun ral taq chij koksax b'i kajib' ral taq k'ox rutzil arin ru' xaq kyot' b'i aceite chupam. Ile are jun porom sipon chi lik muy kporoxik kojb'al u'ij i Ajwal.

¹⁴ Waqib' ral taq k'ox uwa'al uva muqb'am koksax b'i ru' jujun ral taq me'; kajib' ral taq k'ox uwa'al uva muqb'am koksax b'i ru' jujun chij ma; oxib' ral taq k'ox uwa'al uva muqb'am koksax b'i ru' jujun ral taq chij. Are sipon ile re umuyal uk'ok'al chi ksujux ni ik' ik' chwach i Ajwal che jun junab'.

¹⁵ Chrijil chik i sipon re umuyal uk'ok'al chi ksujux ij ij, rajwaxik ksujux chik jun chab'at ma chinwach re i mak xaq koksax b'i uwa'al uva muqb'am ru'.

I sipon are ktijin i nima'ij Pascua

¹⁶ Che i ij kajlajuj re i nab'e ik' k-ani ni nima'ij re i Pascua re kojb'al re in-ij, chi are i nima'ij Pascua.

¹⁷ Che i ij jo'lajuj re i nab'e ik' le, k-ani i nima'ij re i wa re trigo chi nti kunb'al ru', lik wuqub' ij ktijaw i wa re trigo le chi nti kunb'al ru'.

¹⁸ Che i nab'e ij, k-an ni jun lo'laj moloj ib', rumali chi mijun kchakun che i ij le.

¹⁹ Ksujux ni porom sipon chwach i Ajwal: Keb' ral taq me', jun chij ma xaq wuqub' ral taq chij aj jujun junab', chi je klis taj.

²⁰ Junam ru' i porom sipon le rajwaxik chi koksax b'i rutzil arin ru' xaq kyot' b'i aceite chupam. I jujun ral taq me' koksax b'i jun almul rutzil jok'om trigo ru', i jujun chij ma, koksax b'i wajxaqib' k'ox ru',

²¹ xaq i jujun ral taq mama'ib' chij chi aj jujun junab', koksax b'i kajib' ral taq k'ox ru'.

²² Xaq ksujux ni jun chab'at ma chi are jun sipon re riqb'al kuyb'al imak.

²³ Ronojel ile ksujux ni puwi chik i sipon chi ksujux ij ij pa taq usaqirb'al.

²⁴ Keje ile k-ani ni che ronojel i wuqub' ij re i nima'ij. Ile are jun porom sipon chi lik muy kupon chinwach yin. Xaq koksax b'i sipon ru' chi uwa'al uva muqb'am, puwi chik i sipon chi ksujux ij ij pa taq usaqirb'al.

²⁵ Che i k'isb'al ij re i wuqub' ij, k-ani chik jun lo'laj moloj ib' kojb'al re in-ij. Che i ij le mijun kchakunik.

I sipon re i nab'e taq uwach i tikon

²⁶ Are kuriq i ij chi kimol uwach i nab'e taq tikon, kijeq u'anik i nima'ij re i k'iyal taq seman chrijil chik i nima'ij Pascua. Che i ij le k-ani ni jun lo'laj moloj ib' kojb'al in-ij yin, rumali chi mijun kchakunik,

²⁷ xwi ksujux ni jun porom sipon chinwach Yin re umuyal uk'ok'al, keb' ral taq me', jun chij ma xaq wuqub' ral taq chij aj jujun junab'.

²⁸ Rajwaxik chi koksax b'i rutzil jok'om trigo ru' xaq kyot' b'i aceite chupam. I jujun ral taq me' koksax b'i jun almul rutzil arin ru', i jujun chij ma koksax b'i wajxaqib' ral taq k'ox ru',

²⁹ xaq i jujun ral taq chij chi aj jujun junab' koksax b'i kajib' ral taq k'ox ru'.

³⁰ Xaq ksujux ni jun chab'at ma chi are jun sipon re riqb'al kuyb'al imak.

³¹ I porom sipon le koksax b'i sipon ru' chi ch'irajil xaq i uwa'al uva muqb'am puwi chik i sipon chi ksujux ij ij pa taq usaqirb'al. I jalajuj taq chikop chi kesujuxik rajwaxik chi je klis taj.