NÚMEROS 21 - Wuj Pa K'ubultzij

Kich'akik aj Horma

¹ I ajawinel aj Canaán re i tinimit Arad chi jeqel chila pa Neguev, are xuta kb'ixik chi aj Israel je petnaq che i b'e re Atarim, are uri x-e chu'anik ch'oj chkij, xaq xtiki chkichapik keb' oxib' chke aj Israel le.

² Are uri aj Israel lik xkib'ij che i Ajwal: Yet we kojato chuch'akik i tinimit le, yoj lik kqachup uri uwach ronojel ni'pa i tinimit le.

³ Are uri i Ajwal xuya chke aj Israel pacha xkitz'onoj, rumali xeuto chkich'akik aj Canaán, ike xkichup kiwach konojel aj Canaán xaq ronojel kitinimit, rumali i k'ijib'al le xkiya pub'i Horma.

I kumatz anch'ich'

⁴ I aj Israel xe'el chila che i jyub' Hor xe'e pusuk' i Mar Kaq, xesutin chrij i tinimit Edom, man xya' ti chke chi keik'aw chila; are ketijin che i b'e i winaq xb'a'krij kik'ux,

⁵ xkijeqo chi k'ax kech'aw chrij i Dios xaq chrij ma Moisés, xkib'ij i tziji: —¿B'uchak xojiwesaj li yix pa Egipto? ¿Kamsab'al b'ari qe waral pa tz'inilik jyub' chaqij ki'ano? Man nti qaya', nti qawa, kmuluw chik qak'ux chutijawik cha jun chi ti'b'alil.

⁶ Are uri i Ajwal xutaq li k'iyal b'enen laj taq kumatz chi kekich'opij aj Israel, rumali je k'i chke xekamik.

⁷ Are uri konojel aj Israel xe'e ru' ma Moisés, xkib'ij che: —Yoj oj makunnaq man k'ax xojch'aw chrij i Ajwal xaq chawij yet. Chatz'onoj che i Ajwal chi cheresaj b'i kumatz qu'. Are uri ma Moisés xutz'onoj che i Ajwal chi chukuyu ni kimak aj Israel.

⁸ I Ajwal xub'ij che ma Moisés: Cha'ana jun kumatz pacha i jub'an le xaq kaya an tzam che', man xapachin kch'opix kumal i kumatz, xwi kutaqej an i kumatz chi o tzam che' le, kkam ti uri.

⁹ Are uri ma Moisés xu'an jun kumatz re anch'ich' xuya an chutzam jun che', man xapachin kch'opix rumal jun kumatz, xwi kutaqej an i kumatz re anch'ich' chi o tzam che' kkam ti uri.

Aj Israel kesutin chrij i tinimit Moab

¹⁰ Are uri aj Israel xkimaj chub'i kib'e, are xeupon chila pa Obot xe'uxlanik.

¹¹ Are xe'el chila pa Obot xe'uxlan chik k'a pa Ije-abarim, chila pa tz'inilik jyub' chaqij pusuk' i relb'al ij, k'a chuchi' kulew aj Moab.

¹² Xe'el chila pa Ije-abarim, xe'e chwa ta'aj Zered.

¹³ Te'uri xkimaj chub'i kib'e xe'ax ch'aqap che i raqana Arnón. I raqana le kik'aw pa tz'inilik jyub' chaqij, are atawnaq uxol kulew aj Moab ru' kulew aj Hamor.

¹⁴ Rumali kub'ij uwujil i ch'oj re i Ajwal: “Chi xeik'aw naqaj che uchi' i Mar Kaq, xaq chuchi' i raqana chi je o pa Arnón,

¹⁵ xaq xojik'aw chuchi' i raqana chi kupon k'a chila pa Ar, chi xaq kupon k'a chuchi' ulew Moab.”

¹⁶ Are uri aj Israel le xe'el chik chila chi raqana Arnón, xe'e k'a pa Beer. Chila chi k'otom le i Ajwal xub'ij che ma Moisés: Chamolo kichi' konojel aj Israel man kinya kiya'.

¹⁷ Are uri aj Israel xkib'ixaj i b'ixi: ¡Chatel loq, ya! ¡Yoj katqab'ixaj na!

¹⁸ I aj-atzil xatkiwor ru' i atb'al tzij chi o pki'ab'; chi xaq xatkiwor ru' i kich'amiy i kiwi kijolom i tinimit. Are xkib'ixaj aj Israel ile. Te'uri xe'el chik chila pa tz'inilik jyub' chaqij, xkimaj chub'i kib'e xeupon k'a che ulew Matana.

¹⁹ Kelik chila pa Matana xe'e che ulew Nahaliel, xe'el chik chila Nahaliel le, xe'e che ulew Bamot;

²⁰ Kelik chila che ulew Bamot, xe'e chwa ta'aj Moab, te'uri xe'el b'i chwi jyub' Pisga, puwi jyub' le lik k-aljin ronojel i tz'inilik jyub' chaqij.

I aj Israel xekich'ak aj Sehón

²¹ I aj Israel xekitaq b'i jub'an achiyab' ru' ma Sehón, chi ajawinel ke aj Hamor, chub'ixkil i tziji:

²² “Rumali kqatz'onoj chawe chi chaya chqe chi kojik'aw pawulew; kojik'aw ti puwi achak xaq kojik'aw ti chupam atikon ipa o wi a-uva; xaq kqatu' ti ya chupam ak'otom. Lik suk'ulik koj-e ni che i nim laj b'e k'a kojel ni chupam awulew.”

²³ Xwiri i ajawinel re i tinimit Sehón xuya ti chke aj Israel chi keik'aw chupam rulew: I ajawinel le xumol kichi' konojel i uwinaq, x-e chu'atixik chkiwach je aj Israel chila pa tz'inilik jyub' chaqij, are xeupon che ulew Jahaza, xu'an ch'oj chkij.

²⁴ Xwiri aj Israel xkito kib' che i ch'oj xaq xekich'ak ike le xaq xkik'am kan kulew chke chi xjeqan b'i uchi' chila che i raqana Arnón, xupon k'a chila che i raqana Jaboc, ke'eloq chi k'a chuchi' kulew aj Amón, chi sutim rij ru' tapial chi nim uwach.

²⁵ Are uri aj Israel xkik'am kan i tinimit Hesbón rachi'ilam ronojel ukomon chi ke aj Hamor xaq xejeqi chwach.

²⁶ Hesbón are i tinimit ipa jeqel wi te'eq ma Sehón, chi ajawinel ke aj Hamor. I ma Sehón le u'anom ch'oj ru' i ajawinel chi o te'eq puwi i Moab xaq umajom kan ronojel ulew che chi kupon uchi' k'a che i raqana Arnón.

²⁷ Rumali kkib'ij ajb'inel chomiq taq tzij: “¡Chixpet yix iwonojel pa tinimit Hesbón chi are i tinimit ipa o wi i ajawinel ma Sehón! ¡Chiyaka chik xaq chikub'a chik i tinimit le!

²⁸ I a' xujeq b'i uk'atik i tinimit Hesbón, chi are utinimit ma ajawinel Sehón, chila xwinaqir wi i a' chi xuk'at b'i tinimit Ar chi o chila che ulew Moab, xaq xk'at b'i jalajuj taq jyub' chi re i jyub' Arnón.

²⁹ ¡To' awach, yet, ulew Moab! ¡Lik at kamnaq chik, chi at utinimital i tiox Quemos! I tiox le xuya chke achiyab' chi xe'anmajik, xaq xuya chke ixoqib' chi xetzaq pu'ab' i ajawinel Sehón.

³⁰ Xqajsax ucho'ab' u'atb'al tzij Hesbón, xaq i Dibón xaq i Nofa, lik ronojel is xk'atik; i a' xupon k'a pa tinimit Medeba.”

Aj Israel xekich'ak ma Og chi ajawinel re i tinimit Basán

³¹ Are uri aj Israel xekanaj chwach kulew aj Hamor.

³² Xaq ma Moisés xeutaq b'i jub'an achiyab' chrilik i tinimit Jazer, are uri aj Israel xetiki kan chuk'amik i jalajuj taq tinimit chi je o chrij chwach i Jazer le, xaq xekesaj b'i konojel aj Hamor chi je jeqel te'eq chila.

³³ Chrijil chik ile aj Israel xetzalij li pusuk' i tinimit Basán, xwiri i ma Og, chi ajawinel re i tinimit Basán le, xeuk'am li konojel uwinaq chi je yij che i ch'oj, man kki'anb'ej ch'oj chkij ike chila che i k'ijib'al chi Edrei ub'i.

³⁴ Are uri i Ajwal xub'ij che ma Moisés: “Maxij awib' che man Yin kinya ni pa'ab' junam ku' konojel uwinaq xaq ronojel i rulew, xaq ka'an ni che pacha xa'an che ma Sehón, chi ajawinel ke aj Hamor, chi jeqel te'eq pa tinimit Hesbón.”

³⁵ I aj Israel keje ukamsaxik ma Og, ile xki'ano junam ku' rak'al xaq konojel uwinaq. Mijun xkik'asb'a kanoq, konojel is xekikamsaj xaq xkik'am kan rulew.