NÚMEROS 2 - Wuj Pa K'ubultzij

Kitusik aj Israel pa kik'ijib'al

¹ I Ajwal xlapan ru' ma Moisés xaq ru' ma Aarón, xub'ij chke:

² Rajwaxik chi aj Israel kkisutij rij i ja re riqb'al ib' ru' i Dios k'a naj pan jub'i', pa taq tzob'ajil kkitzayb'a an kik'ul chi kuk'utb'ej ki'ij, xaq ru' jun k'utb'al re chi kk'utuwik je pachike taq alk'uwalil.

³ Konojel utzob'ajil ma Judá chi je yij che i ch'oj kek'iji ni chuxe' i kik'ul chi kuk'utb'ej ki'ij pusuk' i relb'al ij, achiyab' chi je yij che i ch'oj re ulemajil ma Judá, are kaj-atzil i ma Naasón chi uk'ojol ma Aminadab,

⁴ chrij pacha i ajlanik chi x-anik ike le je lajujwinaq waqmo' b'elejchiy (74,600) achiyab'.

⁵ Junam ku' ike le kek'iji wi achiyab' chi je yij che i ch'oj re utzob'ajil ma Isacar, chi are kaj-atzil ma Natanael chi uk'ojol ma Zuar,

⁶ ike le je waqlajujmo' waqchiy (54,400) achiyab', chrij pacha i ajlanik chi x-anik.

⁷ Xaq ku' ike le kek'iji ni achiyab' chi je yij che i ch'oj re ulemajil ma Zabulón, chi kaj-atzil are ni ma Eliab chi uk'ojol ma Helón,

⁸ ike le je lajujwinaq oxmo' wuqchiy (57,400) achiyab' chrij pacha i ajlanik chi x-anik.

⁹ Keje uri ile chi che i k'ijib'al ipa o wi ma Judá kek'iji ni oxib' tzob'ajil achiyab' chi je yij che i ch'oj, chi je waqmo' oxchiy jut'ub' (186,400) achiyab' konojel, chi lik kenab'ej nu b'i chkiwach aj Israel.

¹⁰ Pa wiqab' kek'iji ni achiyab' chi je yij che i ch'oj chi je o chuxe' i k'ul chi kuk'utb'ej u'ij utzob'aj ma Rubén. I ma Elisur, chi uk'ojol ma Sedeur, kkanaj ni kan pa aj-atzil chke i achiyab' chi je yij che i ch'oj re utzob'ajil ma Rubén,

¹¹ ike le je jo'winaq waqlajujmo' jo'chiy (46,500) achiyab', chrij pacha i ajlanik chi x-anik.

¹² Junam ku' ike le, kek'iji ni achiyab' chi je yij che i ch'oj re ulemajil ma Simeón; chi are kaj-atzil ma Selumiel chi uk'ojol ma Zurisadai,

¹³ ike le je jo'winaq wajxaqmo' wuqchiy (59,300) achiyab', chrij pacha i ajlanik chi x-anik.

¹⁴ Xaq ku' ike le kek'iji ni achiyab' chi je yij che i ch'oj re ulemajil ma Gad, chi are kaj-atzil ma Eliasaf chi uk'ojol ma Reuel,

¹⁵ ike le je lajuj kawinaq kajlajujmo' jo'chiy (45,650) achiyab', chrij pacha i ajlanik chi x-anik.

¹⁶ Keje uri ile chi che i k'ijib'al ipa o wi ma Rubén kek'iji ni oxib' tzob'ajil achiyab' chi je yij che i ch'oj, chi je lajuj kab'lajujwinaq wajxaqlajujmo' wajxaqlajujchiy (151,450) achiyab', konojel ike le keterej nu b'i chkij i jub'an chi je nab'e chik.

¹⁷ Konojel i aj Leví ke'e ni chkixol i kajib' tzob'aj, xaq je are ni ike le kek'amaw nu b'i i ja re riqb'al ib' ru' i Dios. Te'uri kkimaj b'i kib'e, jun tzob'aj kterej b'i chrij jun chik lik keje ile chkajib' tzob'ajil, pacha ki'anom te'eq are je uxlannaq, konojel lik ke'el ti chuxe' i kik'ul chi kuk'utb'ej ki'ij.

¹⁸ Pusuk' uqajb'al ij che i lo'laj ja re molb'al ib' kek'iji ni achiyab' chi je yij che i ch'oj re ulemajil ma Efraín, lik keb'in ni chuxe' i kik'ul chi kuk'utb'ej ki'ij, i kaj-atzil are ni ma Elisama chi uk'ojol ma Amiud,

¹⁹ ike le je jo'winaq jumo' jo'chiy (40,500) achiyab' chrij pacha i ajlanik chi x-anik.

²⁰ Junam ku' ike le kek'iji ni achiyab' chi je yij che i ch'oj re ulemajil ma Manasés; i kaj-atzil are ma Gamaliel chi uk'ojol ma Pedasur,

²¹ ike le je lajujwinaq kajchiy (32,200) achiyab' chrij pacha i ajlanik chi x-anik.

²² Xaq ku' ike le kek'iji ni achiyab' chi je yij che i ch'oj re ulemajil ma Benjamín; i kaj-atzil are ma Abidán chi uk'ojol ma Gedeoni,

²³ ike le je lajujwinaq wajxaqmo' kajchiy (35,400) achiyab' chrij pacha i ajlanik chi x-anik.

²⁴ Keje uri ile chi che i k'ijib'al ipa o wi ma Efraín, kek'iji ni oxib' tzob'ajil achiyab' chi je yij che i ch'oj, chi je jo'winaq lajujmo' oxlajujchiy (108,100) achiyab' konojel, ike le je are urox tzob'aj che i enam.

²⁵ Pa moxab' kek'iji ni achiyab' chi je yij che i ch'oj re ulemajil ma Dan, xaq keb'in ni chuxe' i kik'ul chi kuk'utb'ej ki'ij, i kaj-atzil are ma Ahiezer, chi uk'ojol ma Amisadai,

²⁶ ike le je jo'lajujwinaq waqlajujmo' wuqchiy (62,700) achiyab' chrij pacha i ajlanik chi x-anik.

²⁷ Junam ku' ike le kek'iji ni achiyab' chi je yij che i ch'oj re ulemajil ma Aser; i kaj-atzil are ma Pagiel, chi uk'ojol ma Ocrán,

²⁸ ike le je jo'lajujwinaq oxmo' jo'chiy (41,500) achiyab' chrij pacha i ajlanik chi x-anik.

²⁹ Xaq ku' ike le kek'iji ni achiyab' chi je yij che i ch'oj re ulemajil ma Neftalí; i kaj-atzil are ma Ahira, chi uk'ojol ma Enán,

³⁰ ike le je lajujwinaq oxlajujmo' waqchiy (53,400) achiyab' chrij pacha i ajlanik chi x-anik.

³¹ Keje uri ile chi che i k'ijib'al ipa o wi ma Dan, kek'iji ni oxib' tzob'ajil achiyab' chi je yij che i ch'oj, chi je kajlajujmo' b'elejlajujchiy (157,600) achiyab' konojel, ike le je are ke'e pa k'isb'al re, junam ru' kik'ul chi kuk'utb'ej ki'ij.

³² I ajlanik chi x-an chke konojel i alk'uwalil aj Israel, xe'eloq chi je o lajuj wuqlajujwinaq wajxaqmo' jo'lajujchiy oxt'ub' (603,550) achiyab' chi je yij che i ch'oj.

³³ Xwiri aj Leví xe'ajlax taj are xe'ajlax konojel aj Israel, man keje ile xub'ij i Ajwal che ma Moisés.

³⁴ I aj Israel xki'an ronojel chrij pacha xub'ij i Ajwal che ma Moisés, pa taq tzob'ajil, xaq pa taq alk'uwalil xek'iji chuxe' kik'ul chi kuk'utb'ej ki'ij.