NÚMEROS 10 - Wuj Pa K'ubultzij

Trompeta saq-o'oj

¹ I Ajwal xlapan ru' ma Moisés, xub'ij che:

² Cha'ana keb' trompeta chi lik saq-o'oj, ru' ch'ayb'al kayijb'a wi, man kuriq uchak chawe re kaxut'ij molb'al ke i winaq, xaq kuriq uchak chawe are kimaj chub'i ib'e.

³ Are kxut'ix i keb' trompeta, rajwaxik chi konojel i winaq kkimol ni kib' chawach chila pa okb'al che i ja re riqb'al ib' ru' i Dios.

⁴ Xwiri are xa jun trompeta kxut'ixik xwi i aj-atzil uri ke i jalajuj taq tzob'aj aj Israel, kkimol ni kib' awu'.

⁵ Are kxut'ix i trompeta xaq rachnimam ko laj taq sik', are k'utb'al re uri chi konojel aj Israel chi je o prelb'al ij kkimaj chub'i kib'e.

⁶ Are kxut'ix i trompeta ukamul, are uri kkimaj chub'i kib'e ni'pa je o pa wiqab'. Are kxut'ix i trompeta chi xaq lik ko kesik'in ru' are k'utb'al re uri chi kewalij b'i konojel i winaq.

⁷ Are xwi jun xut' k-ani che i trompeta are k'utb'al re uri chi konojel i winaq kkimol ni kib'.

⁸ Je are uk'ojol ma Aarón chi ajsujul sipon kexut'iw i trompeta le. Ile lik are jun atb'al tzij chi ronojel ij saq uwach chiwe yix xaq chke imuq ixikin.

⁹ Are kek'un ajch'oj chu'anik ch'oj chiwij chwach iwulew, rajwaxik uri chi yix ki'an ni ch'oj chkij ike le. Xwiri rajwaxik chi kixut'ij i trompeta xaq ko chixsik'inoq man keje ile, Yin chi in i-Dios yix kixk'un ni chink'ux, kixinto na xaq kixwesaj ni pki'ab' ajch'oj chiwij.

¹⁰ Xaq kixut'ij i trompeta are ki'an i nima'ij chi inch'ikom, xaq kixut'ij i trompeta are kiporoj i sipon, xaq are kisujuj i sipon re chomb'al ib' chinwach Yin xaq are muqul ik', man keje ile kixk'un ni chink'ux. Yin in Ajwal xinb'ij ile chiwe.

Kelik aj Israel chila Sinaí

¹¹ Che i ij juwinaq (20) re ukab' ik' che ukab' junab' xwalij i sutz' puwi i ja re riqb'al ib' ru' i Dios.

¹² Are uri aj Israel xe'el chila pa tz'inilik jyub' chaqij Sinaí, xkimaj chub'i kib'e xe'e pa tz'inilik jyub' chaqij Parán, man chila xtak'i wi i sutz'.

¹³ Lik pacha xub'ij i Ajwal che ma Moisés.

¹⁴ Xenab'ej b'i achiyab' chi je yij che i ch'oj chi je o chuxe' i k'ul chi kuk'ut ki'ij i tzob'aj re ma Judá. I kaj-atzil ike le are ma Naasón, chi uk'ojol ma Aminadab.

¹⁵ Are ma Natanael, chi uk'ojol ma Zuar, nab'e chkiwach i achiyab' chi je yij che i ch'oj re utzob'ajil ma Isacar.

¹⁶ Are ma Eliab, chi uk'ojol ma Helón, nab'e chkiwach i achiyab' chi je yij che i ch'oj re utzob'ajil ma Zabulón.

¹⁷ Are tortal chik i lo'laj k'ijib'al re i Dios, are uri i je uk'ojol ma Gersón xaq i je uk'ojol ma Merari chi je are ike o chkiqul uk'amik b'i ronojel ile, xkik'am b'ik xaq xkimaj b'i kib'e.

¹⁸ Te'uri xeterej b'i achiyab' chi je yij che i ch'oj chi je o chuxe' i k'ul chi kuk'ut ki'ij i utzob'aj ma Rubén, i kaj-atzil ike le are ma Elisur chi uk'ojol ma Sedeur.

¹⁹ Are ma Selumiel, chi uk'ojol ma Zurisadai, nab'e chkiwach i achiyab' chi je yij che i ch'oj re utzob'ajil ma Simeón.

²⁰ Are ma Eliasaf, chi uk'ojol ma Deuel, nab'e chkiwach i achiyab' chi je yij che i ch'oj re utzob'ajil ma Gad.

²¹ Chkij chik ike le je teren b'i rak'al ma Coat chi je k'amawnaq b'i jalajuj taq chapb'al chi o u'ij. Are keupon i rak'al ma Coat le, lik yij chik i lo'laj k'ijib'al re i Dios.

²² Te'uri xeterej b'i achiyab' chi je yij che i ch'oj chi je o chuxe' i k'ul chi kuk'ut ki'ij i utzob'aj ma Efraín. I kaj-atzil ike le are ma Elisama, chi uk'ojol ma Amiud.

²³ Are ma Gamaliel, chi uk'ojol ma Pedasur, nab'e chkiwach i achiyab' chi je yij che i ch'oj re utzob'ajil ma Manasés.

²⁴ Are ma Abidán, chi uk'ojol ma Gedeoni, nab'e chkiwach i achiyab' chi je yij che i ch'oj re utzob'ajil ma Benjamín.

²⁵ Pa k'isb'al re xeterej chub'i jub'an achiyab' chi je yij che i ch'oj chi je o chuxe' i k'ul chi kuk'ut ki'ij i utzob'aj ma Dan. I kaj-atzil ike le are ma Ahiezer, chi uk'ojol ma Amisadai.

²⁶ Are ma Pagiel chi uk'ojol ma Ocrán nab'e chkiwach i achiyab' chi je yij che i ch'oj re utzob'ajil ma Aser.

²⁷ Are ma Ahira, chi uk'ojol ma Enán, nab'e chkiwach i achiyab' chi je yij che i ch'oj re utzob'ajil ma Neftalí.

²⁸ Keje kicholik aj Israel ile x-anik chi are i achiyab' chi je yij che i ch'oj are kkimaj b'i kib'e.

Ma Moisés kusik'ij b'i ub'aluk ku'

²⁹ O jun ij chi ma Moisés xub'ij che ub'aluk chi are ma Hobab, chi uk'ojol ma Ragüel aj Madián: —Yoj koj-e chwach ulew chi usujum i Ajwal chqe. Jo' qu', yoj lik k'ax ni katqana'o man i Ajwal ub'im chi lik k'ax keuna aj Israel.

³⁰ I ma Hobab xub'ij che ma Moisés: —Kin-e taj, man kwaj kintzalij chik chwach wulew ipa je o wi walk'uwal.

³¹ I ma Moisés xub'ij chik che: —Kuyu inmak ta, mojawo'taj kanoq, man Yet lik aweta'am upam i tz'inilik jyub' chaqij ipa kojuxlan wi. Lik Yet neri katk'amaw b'e chqawach.

³² We kat-e qu' yoj, kqajach uri chqawach ronojel i utz chi kuya i Ajwal chqe —xcha.

³³ I aj Israel xe'el chila tzam jyub' re i Ajwal, xkimaj b'i kib'e, oxib' ij xeb'inik, nab'e i kaxa re utrat i Ajwal chkiwach, kutzukuj ipa ke'uxlan wi.

³⁴ Are pa'ij xaq are k'ate kkijeq i b'e, i sutz' re i Ajwal o pkiwi aj Israel are keb'inik.

³⁵ Arewi are kwalij b'i ukaxa i Ajwal, i ma Moisés kub'ij i tziji: “¡Chatwalijoq, Ajwal! ¡Chekicher nu b'i i ajch'oj chawij! ¡Che'anmaj ni chawach ni'pa ktitat kipam chawe are kkil awach!”

³⁶ Xwiri are ktak'i ukaxa i Ajwal, i ma Moisés kub'ij i tziji: “¡Ajwal, chattzalij chal chkixol i k'iyal taq aj Israel!”