NÚMEROS 1 - Wuj Pa K'ubultzij

Kajlaxik aj Israel chila Sinaí

¹ I Ajwal xlapan ru' ma Moisés pa ja re riqb'al ib' ru' i Dios chila pa tz'inilik jyub' chaqij Sinaí, che i nab'e ij re ukab' ik' re ukab' junab', chrijil chik i kelik li aj Israel pa Egipto. Xub'ij che:

² Cheiwajlaj konojel aj Israel pa taq tzob'ajil xaq pa taq alk'uwalil man keje ile ketamaxik wach kib'i xaq ketamaxik je ni'pa achiyab' konojel.

³ Chab'ij che ma Aarón chi katuto chkajlaxik xaq chutz'ib'axik kib'i konojel i achiyab', chi o chik juwinaq junab' chke chi je yij che i ch'oj.

⁴ Rajwaxik chi o ni jun aj-atzil chke i alk'uwalil, keje ile chke konojel i tzob'ajil aj Israel.

⁵ Are kib'i aj-atzil iri chi rajwaxik kixkito na: Ma Elisur chi uk'ojol ma Sedeur ke utzob'ajil ma Rubén.

⁶ Ma Selumiel chi uk'ojol ma Zurisadai ke utzob'ajil ma Simeón.

⁷ Ma Naasón chi uk'ojol ma Aminadab ke utzob'ajil ma Judá.

⁸ Ma Natanael chi uk'ojol ma Zuar ke utzob'ajil ma Isacar.

⁹ Ma Eliab chi uk'ojol ma Helón ke utzob'ajil ma Zabulón.

¹⁰ Ma Elisama chi uk'ojol ma Amiud ke utzob'ajil ma Efraín chi uk'ojol ma José; ma Gamaliel chi uk'ojol ma Pedasur ke utzob'ajil ma Manasés.

¹¹ Ma Abidán chi uk'ojol ma Gedeoni ke utzob'ajil ma Benjamín.

¹² Ma Ahiezer chi uk'ojol ma Amisadai ke utzob'ajil ma Dan.

¹³ Ma Pagiel chi uk'ojol ma Ocrán ke utzob'ajil ma Aser.

¹⁴ Ma Eliasaf chi uk'ojol ma Deuel ke utzob'ajil ma Gad.

¹⁵ Ma Ahira chi uk'ojol ma Enán ke utzob'ajil ma Neftalí.

¹⁶ Are aj-atzil ile chke i jutaq tzob'aj chi xe'ul chkixol aj Israel man chkijujunal kkok'aj utzam kitzob'ajil.

^17-18 Che i nab'e ij re ukab' ik' re i junab' le, i ma Moisés xaq i ma Aarón xkimol kichi' achiyab' chi xe'ul rumal i Dios chkixol aj Israel, chkijujunal pa taq tzob'ajil xaq pa taq alk'uwalil xtz'ib'ax kib'i man keje ile ketamaxik je ni'pa achiyab' chi o chik juwinaq (20) junab' chke.

¹⁹ I ajlanik le x-an chila che i tz'inilik jyub' chaqij chi Sinaí ub'i, chrij pacha xub'ij i Ajwal che ma Moisés.

^20-21 Are xutzin u'anik i ajlanik pa taq lemajil, pa taq tzob'ajil, pa taq alk'uwalil, pa taq jujunal xtz'ib'ax kib'i, konojel achiyab' chi o chik juwinaq (20) junab' chke, uk'iyal xe'eloq are iri: Che ulemajil ma Rubén chi nab'e rak'al ma Israel, je jo'winaq waqlajujmo' jo'chiy (46,500) achiyab' chi je utz chik re i ch'oj.

^22-23 Che ulemajil ma Simeón xe'ajlax, jo'winaq wajxaqmo' wuqchiy (59,300) achiyab'.

^24-25 Che ulemajil ma Gad xe'ajlax, lajuj kawinaq kajlajujmo' jo'chiy (45,650) achiyab'.

^26-27 Che ulemajil ma Judá xe'ajlax, lajujwinaq waqmo' b'elejchiy (74,600) achiyab'.

^28-29 Che ulemajil ma Isacar xe'ajlax, waqlajujmo' waqchiy (54,400) achiyab'.

^30-31 Che ulemajil ma Zabulón xe'ajlax, lajujwinaq oxmo' wuqchiy (57,400) achiyab'.

^32-35 Che ulemajil ma José xe'ajlax jo'winaq jumo' jo'chiy (40,500) achiyab' chi je re ulemajil ma Efraín, xaq xe'ajlax lajujwinaq kajchiy (32,200) achiyab' re ulemajil ma Manasés.

^36-37 Che ulemajil ma Benjamín xe'ajlax lajujwinaq wajxaqmo' kajchiy (35,400) achiyab'.

^38-39 Che ulemajil ma Dan xe'ajlax jo'lajujwinaq waqlajujmo' wuqchiy (62,700) achiyab'.

^40-41 Che ulemajil ma Aser xe'ajlax jo'lajujwinaq oxmo' jo'chiy (41,500) achiyab'.

^42-43 Che ulemajil ma Neftalí xe'ajlax lajujwinaq oxlajujmo' waqchiy (53,400) achiyab'.

⁴⁴ Are xetamax ile are xe'ajlax konojel aj Israel rumal ma Moisés xaq rumal ma Aarón, xaq kumal i kab'lajuj kaj-atzil aj Israel chi je are ike keok'aw utzam chke kitzob'ajil xaq i kalk'uwal.

⁴⁵ Konojel i achiyab' chi o chik juwinaq (20) junab' chke chi je utz chik che i ch'oj,

⁴⁶ i kik'iyal i winaq xe'eloq konojel, je lajuj wuqlajujwinaq wajxaqmo' jo'lajujchiy oxt'ub' (603,550)

Uya'ik Kipatan aj Leví

⁴⁷ I aj Leví xe'ajlax ti chkixol i lemajil ke i katit kimam,

⁴⁸ Man i Ajwal ub'im che ma Moisés:

⁴⁹ Are keawajlaj konojel aj Israel keawajlaj tu b'i ulemajil ma Leví.

⁵⁰ I aj Leví rajwaxik kaya chkiqul u'anik i chak pa ja re riqb'al ib' ru' i Dios chila ipa o wi intrat, xaq are ike o chkiqul ronojel ni'pa i chapb'al chi o chila pa lo'laj k'ijib'al re i Dios. Xaq je are ike ke'atsaw i ja re riqb'al ib' ru' i Dios, xaq je are kek'amaw nu b'i ronojel ni'pa o chila pa ja le, kki'an ni kimujb'al chrij chwach i ja re riqb'al ib' ru' i Dios.

⁵¹ Are ke'e chik che jun k'ijib'al, are ike uri ketorow b'i i ja re riqb'al ib' ru' i Dios xaq are ike keyijb'aw chik are keupon che i k'ijib'al le. Jun winaq chi aj Leví taj, we ktejeb' ru' i ja re riqb'al ib' ru' i Dios le, saq laj tzij, lik kkam na.

⁵² I jub'an chik aj Israel kkok'aj ni kib' pa taq tzob'ajil, pacha kki'an achiyab' chi je yij che i ch'oj, chkijujunal chila pa kik'ijib'al, chuxe' i k'ul chi kuk'ut u'ij jun tzob'aj.

⁵³ Konojel aj Leví kki'an ni kimujb'al chrij chwach i ja re riqb'al ib' ru' i Dios re intrat xaq re chajb'al re, man keje ile i Ajwal kpe ti roywal chke aj Israel.

⁵⁴ I aj Israel xki'an ronojel chrij pacha xub'ij i Ajwal che ma Moisés.