NEHEMÍAS 7 - Wuj Pa K'ubultzij

I ma Nehemías kub'ij pachin i keok'aw utzam

¹ Are xutzin uyijb'axik ni'pa utz taj che i tapial chi nim uwach, xoksax uchija, xch'ik kij ajchajinelab' re uxol taq uchija, ajb'ix, xaq aj Leví.

² Are uri xintaq b'i incha' ma Hanani xaq ma Hananías, chi aj-atzil ke ajchajinelab' re i tinimit Jerusalén, man lik kul ink'ux che, xwi ta la ile, xaq lik mas kukoj u'ij i Dios chkiwach i jub'an chik winaq.

³ Xinb'ij chke chi kkijaq ti uchija k'ate kkijaqo are naj chik elnaq b'i ij, xaq k'ate ke'el pkik'ijib'al, are utz chik utz'apixik uchija ki'anom ru' b'alul. Xwi ta la ile, xaq xinb'ij chke chi xin-ul chajinelab' chkixol i winaq aj Jerusalén, chi kechajin chila ipa kechakun wi, xaq jub'an chik kechajin ni chwach i kachoch.

⁴ I tinimit lik nim, xwiri je k'i ti winaq je o chwach, man i ja yijb'am ti ni'pa i utz taj che.

Kitzalijik ni'pa je elsam te b'i pa cho'ab' chwach kulew

⁵ Are uri i Ajwal xuya pink'ux chi kinmol kichi' i winaq chi o ki'ij pa tinimit, xaq i je rajpatanib', man keje ile kink'am upam je ni'pa taq alk'uwalil je olik. Are uri xinriq i wuj chi tz'ib'tal kib'i konojel ni'pa xe'el li ujer pa Babilonia, chi keje iri tz'ib'tal chupam:

^6-7 Iri are kib'i aj Israel, chi je alaxel pa tinimit Judá, chi xe'elsax b'i pa cho'ab' chwach kulew rumal i ajawinel ma Nabucodonosor, chrijil chik ile xetzalij chali pa Jerusalén xaq pa jalajuj taq k'ijib'al pa Judá, lik chkijujunal xe'e pa taq kitinimit: Ma Zorobabel, ma Jesúa, ma Nehemías, ma Azarías, ma Raamías, ma Nahamani, ma Mardoqueo, ma Bilsán, ma Misperet, ma Bigvai, ma Nehum xaq ma Baana.

⁸ I je umuq uxikin ma Paros, je kab'lajuj wajxaqwinaq jo'mo' (2,172);

⁹ i je umuq uxikin ma Sefatías, je kab'lajuj wajxaqlajujwinaq (372);

¹⁰ i je umuq uxikin ma Ara, je kab'lajuj wuqlajujwinaq jumo' (752);

¹¹ i je umuq uxikin ma Pahat-moab, chi je umuq uxikin ma Jesúa xaq ma Joab, je wajxaqlajuj wuqmo' (2,818);

¹² i je umuq uxikin ma Elam, je kajlajuj kawinaq oxmo' (1,254);

¹³ i je umuq uxikin ma Zatu, je jo'ob' kawinaq kamo' (845);

¹⁴ i je umuq uxikin ma Zacai, je wajxaqlajujwinaq jumo' (760);

¹⁵ i je umuq uxikin ma Binúi, je wajxaqib' kab'lajujwinaq jumo' (648);

¹⁶ i je umuq uxikin ma Bebai, je wajxaqib' julajujwinaq jumo' (628);

¹⁷ i je umuq uxikin ma Azgad, je keb' waqlajujwinaq jo'mo' (2,322);

¹⁸ i je umuq uxikin ma Adonicam, je wuqub' oxlajujwinaq jumo' (667);

¹⁹ i je umuq uxikin ma Bigvai, je wuqub' oxwinaq jo'mo' (2,067);

²⁰ i je umuq uxikin ma Adín, je jo'lajuj kab'lajujwinaq jumo' (655);

²¹ i je umuq uxikin ma Ater, chi je umuq uxikin ma Ezequías, je wajxaqlajuj kajwinaq (98);

²² i je umuq uxikin ma Hasum, je wajxaqib' waqlajujwinaq (328);

²³ i je umuq uxikin ma Bezai, je kajib' waqlajujwinaq (324);

²⁴ i je umuq uxikin ma Harif, je kab'lajuj jo'winaq (112);

²⁵ i je umuq uxikin ma Gabaón, je jo'lajuj kajwinaq (95);

²⁶ i achiyab' aj Belén xaq aj Netofa, je wajxaqib' b'elejwinaq (188);

²⁷ i achiyab' aj Anatot, je wajxaqib' waqwinaq (128);

²⁸ i achiyab' aj Bet-azmavet, je keb' kawinaq (42);

²⁹ i achiyab' aj Quiriat-jearim, aj Cafira xaq aj Beerot, je oxib' wuqlajujwinaq jumo' (743);

³⁰ i achiyab' aj Ramá xaq aj Geba, je jun julajujwinaq jumo' (621);

³¹ i achiyab' aj Micmas, je keb' waqwinaq (122);

³² i achiyab' aj Bet-el xaq aj Hai, je oxib' waqwinaq (123);

³³ i je umuq uxikin ma Nebo, je kab'lajuj kawinaq (52);

³⁴ i je umuq uxikin i jun chik ma Elam, je kajlajuj kawinaq oxmo' (1,254);

³⁵ i je umuq uxikin ma Harim, je waqlajujwinaq (320);

³⁶ i achiyab' aj Jericó, je jo'ob' wuqlajujwinaq (345);

³⁷ i je umuq uxikin ma Lod, ma Hadid xaq ma Ono, je jun waqlajujwinaq jumo' (721);

³⁸ i je umuq uxikin ma Senaa, je lajuj waqlajujwinaq b'elejmo' (3,930);

³⁹ I je ajsujul sipon chi je umuq uxikin ma Jedaías, chi je ralk'uwal ma Jesúa, je oxlajuj wajxaqwinaq kamo' (973);

⁴⁰ i je umuq uxikin ma Imer, je kab'lajuj kab'lajujwinaq kamo' (1,052);

⁴¹ i je umuq uxikin ma Pasur, je wuqub' kawinaq oxmo' (1,247);

⁴² i je umuq uxikin ma Harim, je wuqlajuj lajujwinaq kamo' (1,017).

⁴³ I aj Leví chi je umuq uxikin ma Jesúa xaq re ma Cadmiel, chi xaq je umuq uxikin ma Hodavías, je kajlajuj oxwinaq (74).

⁴⁴ I ajb'ix chi je umuq uxikin ma Asaf, je wajxaqib' wuqwinaq (148).

⁴⁵ I kechajiw i xol taq uchija are je umuq uxikin ma Salum, ma Ater, ma Talmón, ma Acub, ma Hatita xaq ma Sobai, je wajxaqlajuj waqwinaq konojel (138).

⁴⁶ I je aj-anol patan prachoch i Dios, je are umuq uxikin ma Ziha, ma Hasufa, ma Tabaot,

⁴⁷ ma Queros, ma Siaha, ma Padón,

⁴⁸ ma Lebana, ma Hagaba, ma Salmai,

⁴⁹ ma Hanán, ma Gidel, ma Gahar,

⁵⁰ ma Reaía, ma Rezín, ma Necoda,

⁵¹ ma Gazam, ma Uza, ma Paseah,

⁵² ma Besai, ma Mehunim, ma Nefisesim,

⁵³ ma Bacbuc, ma Hacufa, ma Harhur,

⁵⁴ ma Bazlut, ma Mehída, ma Harsa,

⁵⁵ ma Barcos, ma Sísara, ma Tema,

⁵⁶ ma Nezía xaq re ma Hatifa.

⁵⁷ I kimuq kixikin i je rajpatan ma Salomón, je are umuq uxikin ma Sotai, ma Soferet, ma Perida,

⁵⁸ ma Jaala, ma Darcón, ma Gidel,

⁵⁹ ma Sefatías, ma Hatil, ma Poqueret-hazebaim xaq re ma Amón.

⁶⁰ I ajchakib' prachoch i Dios xaq i kimuq kixikin i rajchakib' ma Salomón je kab'lajuj b'elejlajujwinaq (392).

⁶¹ I jub'an chi xeupon chila pa Tel-mela, Tel-harsa, Querub, Adón xaq pa Imer, chi xetiki ti chusaqixik we lik je aj Israel xaq we je alk'uwalil, je are iri:

⁶² I je umuq uxikin ma Delaía, ma Tobías xaq ma Necoda, je keb' kab'lajujwinaq jumo' (642)

⁶³ I kachalal i je ajsujul sipon, je are iri: Je umuq uxikin ma Habaía, ma Cos xaq ma Barzilai, chi xk'uli ru' jun chke umi'al ma Barzilai aj Galaad, chi x-e ub'i rixoqil chrij.

⁶⁴ Ire le xtzukux ub'i chupam i wuj ipa tz'ib'tal wi kib'i i alk'uwalil, xwiri xriqtaj taj, rumali chi xoksax ti pajil ku' i ajsujul sipon.

⁶⁵ Xwi ta la ile, xaq i aj-ok'al utzam i jalajuj taq tinimit, xub'ij chke chi kkitij ti ti'b'alil chi jachom pu'ab' i Dios k'a kk'am ni upam rumal jun ajsujul sipon ru' Urim xaq Tumim.

⁶⁶ Je wajxaqlajujwinaq jo'mo' jo'chiy (42,360) winaq kimolom kib',

⁶⁷ xe'ajlax ti kajtaqon, achiyab' ixoqib', chi je wuqlajuj waqwinaq wajxaqlajujmo' (7,337) konojel. Xaq je o jo'ob' kab'lajujwinaq (245) ixoqib' xaq achiyab' chi je ajb'ix.

⁶⁸ Xwi ta la ile, xaq je o waqlajuj waqlajujwinaq jumo' (736) kaway, jo'ob' kab'lajujwinaq (245) mula,

⁶⁹ jo'lajuj juwinaq jumo' (435) kamey xaq waqlajujwinaq waqlajujmo' (6,720) axna.

⁷⁰ Jujun aj-atzil chke alk'uwalil xkijach kisipon re uyijb'axik ni'pa i utz taj che i rachoch i Dios; i aj-ok'al utzam i jalajuj taq tinimit xuya uqasan che i kk'olow i mer re i chak, chi are iri: wuqlajuj pexu ru' lajuj ons an-o'oj, lajuj kawinaq (50) nimaq taq laq xaq quinientas treinta ki'u' ajsujul sipon,

⁷¹ xaq i je aj-atzil chke alk'uwalil xkijach kisipon che i kk'olow i mer re i chak, chi are iri: Oxib' tintal ru' lajuj kawinaq (50) pexu an-o'oj xaq waqib' juwinaq (26) tintal ru' lajuj kawinaq (50) pexu saq-o'oj.

⁷² I jub'an chik winaq re i tinimit xkiya oxib' tintal ru' lajuj kawinaq (50) pexu an-o'oj, kajib' juwinaq (24) tintal ru' jo'ob' juwinaq (25) pexu saq-o'oj xaq wuqub' oxwinaq (67) ki'u' ajsujul sipon.

⁷³ I je ajsujul sipon, aj Leví, i kechajiw xol taq uchija, ajb'ix, i winaq re i tinimit, i aj-anol kipatan prachoch i Dios xaq konojel aj Israel, xejeqi pa taq kitinimit. Are xuriqa uwuq ik', i aj Israel je jeqel chik pkitinimit.