NEHEMÍAS 5 - Wuj Pa K'ubultzij

Ch'oj chkixol i winaq

¹ Che taq i ij le konojel i winaq re i tinimit, chi achiyab' chi ixoqib', xki'an jun ch'ojinik chkij kach aj Israel,

² man o jujun kkib'ij chi lik je k'i kimi'al, kalk'uwal, rumali chi rajwaxik k'i trigo chke, man keje ile kekam ti rumal i numik;

³ jub'an chik kkib'ij chi rumal nti chik kkitijo, xkiya uwujil kulew pa cha'im, uwujil kitikanb'al, xaq uwujil kachoch,

⁴ jub'an chik kkib'ij chi kichi'mam mer re tojb'al i alkawal che i ajawinel, rumali chi kiya'om uwujil kulew xaq kitikanb'al. Xaq kkib'ij:

⁵ “Yoj xaq i qach aj tinimit oj xaqjun chi lemajil; i qak'al yoj xaq i kak'al ike lik rajwaxik chi junam kilik k-anik man je xaqjun. Tupu, yoj keqaya ni qami'al qalk'uwal chi k-an ni mokom chke chi je o pu'ab' kajaw. Saq laj tzij chi o chik jujun chke qami'al chi je mokom chik, lik nti pqa'ab' chi keqesaj che ile, man i qulew xaq i qatikanb'al ya o chik pu'ab' jun chik.”

⁶ Are xinta chi kkikoj uch'ojil, chi lik qatzij kmajawik chi xaqjun kilik k-anik, are uri lik xpe jun nim laj woywal.

⁷ Chrijil chik uch'ob'ik, xeinyaj i winaq chi nimaq ki'ij xaq aj-ok'al utzam i jalajuj taq tinimit, man, b'uchak i nim laj eqan chi kiya'om chkiqul kach aj tinimit. Rumali xinmol kichi' konojel i winaq chuyijb'axik i ch'ojinik le,

⁸ xaq xinb'ij chke: “Yoj lik qa'anom qakoch' ru' ronojel ni'pa oj tikinaq chu'anik tob'al ke, man oj tikinaq chkelsaxik i qachi'il aj Israel, chi je k'aytal b'i chke tinimit chi kkikoj ti i Dios; ¿Wo'or yix kich'ob' tan chik kik'ayixik? ¿Yoj tan chiki ile keqesaj chaloq?” Ike lik xkila' ti chik uwach man xkiriq ti chik wach xkib'ij.

⁹ Xaq xinb'ij chik chke: “Ni'pa kixtijin chu'anik le lik utz taj.” Puk'exel ile, chik'utu chi kikoj u'ij i qa-Dios man keje ile kojyo'yax ti chik kumal i tinimit chi kkikoj ti u'ij i Dios, chi xaq je ajch'oj chqij.

¹⁰ Ni'pa i je tol we, i je wachalal, xaq yin, qaya'om mer chke pa cha'im xaq i trigo; ronojel ile kkitoj ti chik chqe man kqakuy kimak.

¹¹ Xaq kintz'onoj k'iyal mul utzil chiwe chi lik wo'or chijacha b'i uwujil kulew chke, tikb'al kitikon, tikb'al ki-uva, kachoch, lik mitz'onoj taq i kik'as chke, nti k-ono we mer, o jalajuj taq ch'irajil, xaq we uwa'al uva muqb'am, xaq we aceite.

¹² Ike xkib'ij: “Kqatzalij ni ronojel ile chke, xaq lik nti kqakoj uch'ojil chke. Kqa'an ni ronojel ile chrij pacha i xab'ij.” Are uri xeinsik'ij ajsujul sipon, man lik chkiwach ike kkisaqij ni i winaq le wach xkisujuj u'anik.

¹³ Xwi ta la ile, xinkirka in-u' xaq xinb'ij: “Keje ni u'anik iri chu'ana ni i Dios are keresaj b'i winaq le chi taq kachoch, xaq chwach taq kulew konojel ni'pa i kki'an taj wach taq xkisujuj, keje ile kk'am ni ronojel chke ni'pa o ku'.” Konojel i winaq xkib'ij: “Keje ile ch-antaj na”, xaq xkikoj u'ij i Ajwal. I winaq xki'ano pacha xkisujuj.

Rutzil uk'ux ma Nehemías

¹⁴ Kab'lajuj junab', chi kjeqan b'i che i junab' juwinaq, are xinuya kan ma Artajerjes chi ajawinel, chrok'axik utzam i jalajuj taq tinimit Judá, k'a che i junab' kab'lajuj juwinaq (32) re rajawinik, mitene yin xaq mitene i je tol we xqak'am qajil.

¹⁵ Xwiri, i jub'an chik aj-ok'al utzam i jalajuj taq tinimit chi xek'iji nab'e chinwach yin, ike xkiya jun nim laj eqan pkiwi i tinimit, man ij ij kkitz'onoj kawinaq (40) pwaq saq-o'oj re kiwa xaq re uwa'al ki-uva muqb'am. Xwi ta la ile, xaq i kajchak utz ti kilik i winaq xki'ano. Xwiri yin, xin-an ti keje ile rumal kojb'al u'ij i Dios.

¹⁶ Xwi ti ile xin-ano, xaq xin-an i chak re uyakik i tapial nim uwach re i tinimit xaq xink'am ti ulew rumal ile. Xaq konojel ni'pa wajchakib' xeton chu'anik i chak le.

¹⁷ Xwi ta la ile, xaq xeintzuq lajuj wuqwinaq (150) winaq aj Israel xaq jalajuj taq winaq chi o kipatan ru' i aj-ok'al utzam i jalajuj taq tinimit, je ajlam ti uri ni'pa i jub'an chik winaq chi je o chrij chwach i qatinimit.

¹⁸ Ronojel ni'pa kyijb'ax ij ij re ti'b'alil chi yin kinyawik, are iri: Jun b'oyex, waqib' chomiq taq chij xaq jub'an chik ti'ij chi o kixik'; pa taq lajuj ij o k'iyal uwa'al uva muqb'am. Rumal ti uri ile chi kinch'ojij taq wajil chi kmajaw che jun aj-ok'al utzam i jalajuj taq tinimit, man k'i chik i eqan o pkiwi i winaq le.

¹⁹ ¡Chinakojo pajil, Wajwal Dios, man xin-an i utz chke konojel i winaqi!