NEHEMÍAS 11 - Wuj Pa K'ubultzij

I winaq aj Jerusalén

¹ I aj-atol tzij re i tinimit, xejeqi pa Jerusalén; i jub'an chik winaq xki'an jun sakinik chkiwach man keje ile jun alk'uwal chke konojel tzob'ajil chi o lajuj alk'uwalil chke, k-e ni pa jeqelem chila Jerusalén, chi are jun lo'laj tinimit, tz'aqat i b'elejeb' chik alk'uwalil, kekanaj kan che i jub'an chik tinimit.

² Te'uri konojel i winaq chi xekanaj kan pa tinimit xkitz'onoj utzil chomal che i Dios pkiwi i jub'an chik winaq chi nti xetaqaw b'ik chi lik kitukel xkaj enam pa jeqelem chila Jerusalén.

³ Are i aj-atzil chi xe'ejeqi pa Jerusalén xaq che ronojel i ulew Judá je are iri: Aj Israel, ajsujul sipon, aj Leví, ni'pa kki'an kipatan prachoch i Dios, xaq kimuq kixikin aj-anol kipatan chrij ma Salomón, chkijujunal xejeqi pkitinimit xaq chwach kulew.

⁴ Jujun aj Judá xaq jujun aj Benjamín chi xejeqi pa Jerusalén chi je utzob'ajil ma Judá je are iri: Ma Ataías, chi uk'ojol ma Uzías, i ma Uzías le uk'ojol ma Zacarías, i ma Zacarías le uk'ojol ma Amarías, i ma Amarías le uk'ojol ma Sefatías, i ma Sefatías le uk'ojol ma Mahalaleel, i ma Mahalaleel le umuq uxikin ma Fares.

⁵ Xaq ma Maasías chi uk'ojol ma Baruc, i ma Baruc le uk'ojol ma Colhoze, i ma Colhoze le uk'ojol ma Hazaías, i ma Hazaías le uk'ojol ma Adaías, i ma Adaías le uk'ojol ma Joiarib, i ma Joiarib le uk'ojol ma Zacarías, i ma Zacarías uk'ojol ma Siloni.

⁶ Konojel ni'pa umuq uxikin ma Fares chi xejeqi kan chila Jerusalén je wajxaqib' oxwinaq jumo' (468) konojel ike le je achiyab' chi je yij che i ch'oj.

⁷ I utzob'ajil ma Benjamín, je are iri: Ma Salú chi uk'ojol ma Mesulam, i ma Mesulam le uk'ojol ma Joed, i ma Joed le uk'ojol ma Pedaías, i ma Pedaías le uk'ojol ma Colaías, i ma Colaías le uk'ojol ma Maasías, i ma Maasías le uk'ojol ma Itiel, i ma Itiel le uk'ojol ma Jesaías;

⁸ i ratz ucha' je are ma Gabai xaq ma Salai, je wajxaqib' waqwinaq kamo' (928) konojel.

⁹ I kaj-atzil ike le are ma Joel chi uk'ojol ma Zicri; xaq ma Judá chi uk'ojol ma Senúa are ukab' aj-atzil che i tinimit.

¹⁰ I je ajsujul sipon, je are iri: Ma Jedaías chi uk'ojol ma Joiarib, i ma Joiarib le uk'ojol ma Jaquín,

¹¹ xaq ma Seraías chi uk'ojol ma Hilcías, i ma Hilcías le uk'ojol ma Mesulam, i ma Mesulam le uk'ojol ma Sadoc, i ma Sadoc le are uk'ojol ma Meraiot, i ma Meraiot le uk'ojol ma Ahitob, chi are nab'e aj-atzil prachoch i Dios;

¹² i kachi'il chi kki'an kipatan prachoch i Dios, je keb' juwinaq kamo' (822) konojel; i ma Adaías chi uk'ojol ma Jeroham, i ma Jeroham le uk'ojol ma Pelalías, i ma Pelalías le uk'ojol ma Amsi, i ma Amsi le uk'ojol ma Zacarías, i ma Zacarías le uk'ojol ma Pasur, i ma Pasur le uk'ojol ma Malquías.

¹³ I kachalal chi je aj-atzil chke alk'uwalil, je keb' kab'lajujwinaq (242) konojel; ma Amasai chi uk'ojol ma Azareel, i ma Azareel le uk'ojol ma Azai, i ma Azai le uk'ojol ma Mesilemot, i ma Mesilemot le uk'ojol ma Imer.

¹⁴ I rachalal chi je yij che i ch'oj je wajxaqib' waqwinaq (128) konojel, i aj-atzil chke are ma Zabdiel, chi uk'ojol ma Gedolim.

¹⁵ I aj Leví, je are iri: Ma Semaías chi uk'ojol ma Hasub, i ma Hasub le uk'ojol ma Azricam, i ma Azricam le uk'ojol ma Hasabías, i ma Hasabías le uk'ojol ma Buni;

¹⁶ i ma Sabetai xaq ma Jozabad je are aj-atzil chke aj Leví, chi xaq je are ike keok'aw utzam i chak chrij chwach i rachoch i Dios;

¹⁷ ma Matanías chi are uk'ojol ma Micaía, i ma Micaía le are uk'ojol ma Zabdi, i ma Zabdi le are uk'ojol ma Asaf chi are aj-ok'al utzam chke jutzob'aj ajb'ix, chi kkib'ixaj i b'ix re tioxb'al are kuriq i or chi kelapan ru' i Dios; ma Bacbuquías chi are ukab' che i alk'uwalil xaq ma Abda chi uk'ojol ma Samúa, i ma Samúa le are uk'ojol ma Galal, i ma Galal le are uk'ojol ma Jedutún.

¹⁸ I kik'iyal aj Leví chi xejeqi pa lo'laj tinimit je kajib' kajlajujwinaq (284) konojel.

¹⁹ I ajchajinel re jalajuj taq uchija, je are iri: Ma Acub, ma Talmón, xaq i kachalal, je kab'lajuj wajxaqwinaq (172) konojel.

²⁰ I jub'an chik aj Israel xaq jub'an chik ajsujul sipon, xaq aj Leví, ike xejeqi che jub'an chik tinimit pa Judá, chkijujunal xek'iji chwach i kulew;

²¹ tupu kki'an kipatan prachoch i Dios, i aj-ok'al utzam chke are ma Ziha xaq ma Gispa, ike le xejeqi pa Ofel.

²² I aj-atzil chke aj Leví chila Jerusalén are ma Uzi, chi uk'ojol ma Bani, i ma Bani le are uk'ojol ma Hasabías, i ma Hasabías le are uk'ojol ma Matanías, i ma Matanías le are uk'ojol ma Micaía, chi je umuq uxikin ma Asaf, chi are keok'aw utzam i b'ix are koksax u'ij i Dios prachoch;

²³ i ajawinel xuya i taqanik chke ajb'ix, chrij wach taq rajwaxik kki'an ij ij.

²⁴ I ajkojol kitzij i winaq chwach i ajawinel are o jalajuj taq kyijb'ax pa tinimit are ma Petaías, chi uk'ojol ma Mesezabeel, chi umuq uxikin ma Zera, chi uk'ojol ma Judá.

I winaq chi xek'iji che jub'an chik k'ijib'al chi o chrij chwach i Jerusalén

²⁵ Jujun chke utzob'ajil ma Judá, xe'e pa jeqelem pa Quiriat-arba, pa Dibón, pa Jecabseel,

²⁶ pa Jesúa, pa Molada, pa Bet-pelet,

²⁷ pa Hazar-sual, pa Beerseba xaq pa taq ukomon,

²⁸ pa Siclag, pa Mecona, xaq pa taq ukomon,

²⁹ pa En-rimón, pa Zora, pa Jarmut,

³⁰ pa Zanoa, pa Adulam xaq pa taq ukomon, pa Laquis xaq chwach ronojel i rulew, pa Azeca xaq pa taq ukomon, ronojel i k'ijib'al le xejeqi i winaq chwach, xjeqan b'i pa Beerseba k'a xupon chwa ta'aj Hinom.

³¹ I utzob'ajil ma Benjamín, xe'ejeqi pa Geba, pa Micmas, pa Aía, pa Bet-el junam ru' ni'pa kikomon; xaq xekanaj jujun che taq tinimiti:

³² Anatot, Nob, Ananías,

³³ Hazor, Ramá, Gitaim,

³⁴ Hadid, Seboim, Nebalat,

³⁵ Lod, Ono xaq xekanaj chila pa Valle ke i aj Artesano.

³⁶ Xwi ta la ile, xaq jujun chke aj Leví xya' kulew chila ku' utzob'ajil ma Judá xaq ku' utzob'ajil ma Benjamín.