NAHUM 2 - Wuj Pa K'ubultzij

¹ Chata pe' tinimit Nínive, i ajsachanel ktijin u'enam chawij yet. ¡Chayijb'a i awajchajinel che i k'ijib'al re ukowib'al i tinimit! ¡Chak'ak'alij i b'e! ¡Chaxima i ach'ich' re ch'oj xe apam! ¡Chayijb'a acho'ab' che i ch'oj!

² Man i Ajwal kuyak tan chik u'ij i ma Jacob, xaq u'ij i tinimit Israel, pacha te'eq u'anom ujer are k'amaja kkel-aj b'i ub'itaq re, are xkikanaj kanoq pacha taq jun che' nti u'ab'.

³ I ch'ich' re tob'al kib' i uwinaq chi je yij che i ch'oj lik kaq ktzunik xaq lik kaq i ki'u'. ¡Lik je yij chik che i ch'oj! I kich'ich' re kib'inb'al lik keje ktzunik pacha i a'; i kikaway lik kek'achirik.

⁴ I ajch'oj je o pa taq b'e chupam i kich'ich' re kib'inb'al, lik kkich'ij b'e rumal koywal, lik to' ke'e k'ulala chi taq k'eb'al, lik je keje pacha antorcha tzijom, keik'awik pacha utzunb'al ray.

⁵ I ajawinel keusik'ij i rajpatanib', ike kkitakij kaqan che i ch'ich' xaq che i tapial are ke'e pa'anem, che i tob'al kib' chi yij chik.

⁶ I tz'apb'al uchi' i raqana kejaqtaj na, i nim laj ja re i ajawinel ktzaq na li pulew.

⁷ Kelsax b'i ati ajawinel pa cho'ab' chwach rulew; junam ku' i rajtaqon, lik kejilawik pacha i palomax xaq lik ke'o'ik kkich'ay uwach kik'ux ru' ki'ab'.

⁸ Keje pacha i ya chi o atb'al re xwiri xa o tel che i atb'al re, keje ile ke'anmaj i winaq aj Nínive. “¡Chixtak'al loq! ¡Chixtzalij loq!” Keje ile kesik'in ni chke, xwiri mijun ktzalij loq.

⁹ ¡Chiwel-aj i saqpwaq! ¡Chiwel-aj i anpwaq! ¡Ub'eyomal i tinimit Nínive nti uk'isik!

¹⁰ Lik wulijnaq, chaqij jyub', tz'inilik jyub' o'tam, lik keje ile u'anom i tinimit Nínive. I kanima i winaq lik ksach rumal xib'rikil, lik ksiksat i kich'ek, konojel nti chik kicho'ab' xaq i kipalaj lik ksach utzunb'al.

¹¹ ¿Wach kkanaj chupam kijul i koj, chupam kisok i rak'al i koj? Chila i koj xaq i kak'al lik utz te'eq kkina'o; lik mijun te'eq kexib'iwik.

¹² I ma koj kukamsaj uti', kujach re ati koj xaq ke i rak'al, xaq kunojsaj ujul che taq i ch'aqa taq chikop chi je ukamsam.

Usachik uwach ronojel i tinimit Nínive

¹³ I Ajwal chi ronojel ktiki che kub'ij: “Chi in o wi chu'anik ch'oj chawij: Keink'atsaj ach'ich' re i ch'oj, lik kin-an ni sib' chke; keinkamsaj ni ral taq awak'al; kinsachsaj ni uwach i el-anik chi o chwach awulew, xaq lik ktataj ti chik mas i kich'awb'al i keb'iw atzij.”