Miqueas 5 - Wuj Pa K'ubultzij

I Dios keukoj ni aj-atol tzij re Israel

¹ “Xwiri wo'or, tinimit Jerusalén, chayijb'a ni atob'al awib', man sutim awij xaq lik kya' ni utojb'alil che aj-atzil re i tinimit Israel.

² Xwiri yet, Belén Efrata, at ch'utin chkixol i lemajil re Judá, chawe yet kel ni jun aj-ok'al utzam re i tinimit Israel chi kpe che jun alk'uwalxel re ujer.”

³ Wo'or i Ajwal kero'taj ni kan utinimit, xwiri k'a kk'iji ni i ak'al chi kalax ni ru' jun ixoq chi b'italik. Are uri i aj Israel chi je elsam b'i pa cho'ab' chwach kulew, kkimol chik kib' ku' kach aj tinimit Israel.

⁴ I ajawinel kwalij na, re kuchajij utinimit ru' ucho'ab' xaq ru' lo'laj u'ijol re i Ajwal chi u-Dios, keje ile ike kek'iji ni pa chomb'al ib', man i Ajwal lik nim ni u'ij k'a pa taq k'isb'al rokraq re uwach i jyub' ta'aj.

⁵ Ire kuk'am na li chomb'al ib'. Are i aj Asiria kkimaj qatinimit xaq ke'ok b'i pa nimaq taq ja re i ajawinel, keqataq nu b'i chkij ike wuqub' aj-ok'al utzam i tinimit xaq wajxaqib' achiyab' chi lik o kipatan.

⁶ Ike kerajawin ni pa Asiria, i tinimit re i Nimrod, lik ru' i ch'ich' chi k'ulala o uware, kojkito ni chkiwach i aj Asiria chi xkimin kib' pqatinimit chi xaq xkimaj i qulew.

Usachik kiwach i ajch'oj

⁷ Are uri, chkixol uk'iyal taq tinimit, i jub'an chi kekanaj kanoq re utinimit i ma Jacob, je keje na pacha uxaqk'aj chi kutaq li Ajwal, keje pacha i jab' chi ktzaq puwi i es, ile lik are ti i winaq k-anawik chi kpe jab'.

⁸ Are uri, chkixol uk'iyal nimaq taq tinimit, i jub'an chi kekanaj kanoq re utinimit i ma Jacob je keje na pacha jun koj chkixol chikop aj pa taq es, pacha jun koj o pkik'ijib'al i chij, are ke'ik'aw i chij keuchapo xaq ku'an ch'aqa taq chke, lik mijun kuya che chi kk'asi kanoq.

⁹ Keje u'anik i ch'oj ile ka'an yet, Ajwal, xaq keasachsaj ni kiwach konojel i je ajch'oj chawij.

K'isb'al re i ch'oj xaq ukojik ki'ij i tiox chi xaril je antalik

¹⁰ Iri are kub'ij i Ajwal: Che taq i ij le keinkamsaj ni akaway xaq keinsachsaj ni kiwach ach'ich' re ch'oj;

¹¹ kin-an ni che i nimaq taq atinimit chi ketzaq puyej xaq kinwulijsaj ni ronojel ukowib'al;

¹² kinsachsaj ni kiwach i je ajkojol a' xaq kixkanajik nti chik ajnanel;

¹³ kinsachsaj ni kiwach ni'pa taq atiox chi xaril je antalik xaq ab'aj chi lik o ki'ij, man keje ile lik arewi kakoj ti chik ki'ij atiox chi xa yet at anawnaq.

¹⁴ Keinmich' ni ache' chi lik o u'ij xaq kinsachsaj ni uwach konojel atinimit.

¹⁵ Rumal i woywal, kin-an ni uk'exel chke i nimaq taq tinimit chi xkaj ti xekojon chwe.