Miqueas 1 - Wuj Pa K'ubultzij

U'atik tzij rumal i Dios puwi i tinimit Samaria

¹ Iri are i tzijonik chi Ajwal xub'ij che ma Miqueas re i tinimit Moreset chi xaq xuk'ut che puwach chrij i tinimit Samaria xaq i tinimit Jerusalén, che taq i ij chi ma Jotam, ma Acaz xaq ma Ezequías kerajawin pa tinimit Judá.

² Iwonojel yix tinimit, chita iri; winaq re ronojel i tinimit, chitatb'ej: I Ajwal, k'a che li lo'laj rachoch, are ni Ire ajsaqinel tzij chiwij yix.

³ I Ajwal kel na li che i k'ijib'al ipa jeqel wi xaq kb'inik kpe ni chwi nimaq taq jyub'.

⁴ Ipa kik'aw wi ire kyayur ni jyub' pacha i cera chi yatal chwi a', i uwa taq ta'aj kejaqtaj ni pa nik'aj pacha taq attal ru' ucho'ab' jun nim laj ya.

⁵ Ronojel iri rumal uqelanik i tinimit re ma Jacob, rumal umak atzalal re i ajawinik Israel. ¿Ipa o wi uqelanik i ma Jacob? ¡Pa tinimit Samaria! ¿Ipa je o wi i lo'laj taq k'ijib'al ke i tiox chi xaril je antalik re i Judá? ¡Lik chila pa tinimit Jerusalén!

⁶ Rumali kub'ij i Ajwal: “Kin-an ni che i tinimit Samaria jut'ub'aj ja wulijnaq, jun ta'aj nim uwach re tikb'al uva. Keinkichersaj nu b'i chwach taq ta'aj ab'aj re i nim laj tinimit xaq kinya na li ukub'ib'al chisaq.

⁷ Konojel i kitiox chi xaril je antalik kekanaj na lik je ch'aqa taq, xaq lik kek'atsax ni ronojel ni'pa taq i o ki'ij. Man ile xa antal ru' i pwaq chi kich'akom ixoqib' chwach kich'akul, xaq kin-an tan chik pwaq che, ke ixoqib' chi kkich'ak kimer chwach kich'akul.”

O'ej re i ma Miqueas

⁸ Kin-o' na, rumal i nim laj b'is pink'ux; rumali nti inxajab' kinb'in na xaq in ch'analik, kinwuyuyik pacha jun utiw xaq kinsik'inik pacha jun chak'nos.

⁹ Man i soktajnaq che i Samaria lik kutzir taj: O che ronojel i Judá xaq uponnaq k'a pa Jerusalén, are i nim laj tinimit ipa je jeqel wi inwinaq.

¹⁰ Mib'ij iri chke i winaq chi je jeqel pa tinimit Gat; mixok che o'ej. Chib'alk'atij iwib' rumal i uk'axk'ol pa taq uk'aj ulew re Bet-le-afra.

¹¹ ¡Yix ix winaq re i Safir, jix man ix elsam b'i pa cho'ab' chwach iwulew, ix ch'analik xaq lik ru' k'ixb'alil! ¡Ke'el ta li je jeqel chila pa Zaanán! ¡Lik o o'ej pa Betesel, yix kixkanajik, nti chik kixtowik!

¹² I jub'an chi je jeqel pa Marot kkib'ak'ek'ej kib' rumal uk'axk'ol, kkaj ike utz ni je olik, man i Ajwal u'anom chi kupon i utz taj pa taq okb'al re i Jerusalén.

¹³ Yix, chi ix winaq re i Laquis, chi xi'an qelqel che iwib' pacha i Israel, chi yix xix-anawik chi xmakun i tinimit Sion, cheiwiqa i kaway chke ikareta.

¹⁴ Chei'ijla kan pa k'isb'al re aj Moreset-gat re k-e ij saq chrij. I tinimit re Aczib kajwax na re tzaqsab'al ke i ajawinelab' re i tinimit Israel.

¹⁵ I Ajwal kub'ij: “Chiwij yix, chi ix jeqel pa Maresa, kintaq chub'i jun chik k'ak' ajch'akanel iwe, chi chatal chkixol aj Israel chi lik ko kiwach, lik keumina ni rib' pa jul re Adulam.

¹⁶ Xwiri yet, tinimit re Sion, chasolo b'i awi che ajolom k'utb'al re i k'ax, kumal awak'al chi lik k'ax keana'o. Lik chasolo b'i awi che ajolom k'a ku'an ni tz'um paja' pacha re jun k'uch, man i awak'al ke'elsax nu b'i pa cho'ab' chwach kulew.”