Mateo 9 - Wuj Pa K'ubultzij

I Jesús xukuy umak xaq xrutzirsaj jun achi sik

¹ Te'uri i Jesús xok chupam jun barco xaq x-ax chik ch'aqa semelik ya xupon chik k'a putinimit.

² Are uri xk'am b'i jun achi ru', chi sikirnaq uch'akul, o chwi ch'at k'amb'al b'i re. Ni'pa i je k'amawnaq loq, lik kul kik'ux che i Jesús, xwiri ire are xril ile, xub'ij che iwab': —Wak'al, chakowij ak'ux; ni'pa i amak ya kuytajnaq chik —xcha.

³ Je o jujun ajtijonelab' re ujer atb'al tzij chi je o chila. Ike xkib'ij chkiwach: “I achi ri kuqajsaj u'ij i Dios ru' i utz ti laj tzij chi kub'ij chrij.”

⁴ I Jesús reta'am chik wach ketijin chuch'ob'ik, rumali xub'ij chke: —¿B'uchak utz ti kich'ob'o? —Xcha.

⁵ ¿Pachike lik k'ax ti ub'ixkil: “I amak kkuytaj ni chawe”. O are: “Chatwalijoq, chayaka b'i ach'at i chatb'inoq”?

⁶ Xwiri, Yin chi Xinalax chwach Ulew pacha Winaq, kin-aljinsaj ut chi o pin-ab' kinkuy ni kimak i winaq waral chwach i jyub' ta'aj —xcha i Jesús chke. Te'uri xub'ij che i achi chi sikirnaq: —Chatwalijoq, chayaka b'i asok, i jat chi awachoch.

⁷ I achi chi sik te'eq xwalijik xaq x-e chi rachoch.

⁸ I winaq are xkil ile, lik xe'ok il che xaq xkikoj u'ij i Dios man uya'om jun chke chi o pu'ab' kerutzirsaj i winaq.

I Jesús xusik'ij i ma Mateo

⁹ I Jesús xel chila; are ktijin che i b'e, xril jun ajtz'onol alkawal, ma Mateo ub'i, kul chila puk'ijib'al ipa ktoj wi alkawal che. Are uri i Jesús xub'ij che: —Chatterej chwij. Ire juntir xwalijik i xterej chrij.

¹⁰ I Jesús junam ku' utijoxelab' xe'e pa wa'im chi rachoch i ma Mateo, are je o chi mexa, xeupon jub'an chik ajtz'onol alkawal, xaq jub'an chik ajmakib', ke'e kitija kiwa ku'.

¹¹ Are xkil iri, o jujun aj fariseo winaq xkitz'onoj chke utijoxelab' i Jesús: —¿B'uchak itijonel yix kutij uwa ku' i utz ti laj taq ajtz'onol alkawal, xaq ku' ajmakib'? —Xecha.

¹² I Jesús xuta ile rumali xub'ij chke: —Kin-an iri man i je iwab'ib' rajwaxik ajkun chke, xwiri i utz kiwach lik nti uchak jun ajkun chke.

¹³ Jix chutayik ub'e wach usuk' i tziji chi tz'ib'tal kan chupam uwuj i Dios chi kub'ij: “Are i kwaj Yin are kiwil tob'al kiwach i lok'anij; are ti usujuxik i chikop chinwach.” Keje ile ub'im kan i Dios —xub'ij i Jesús chke—. Yin in k'unnaq chkisik'ixik ajmakib'. In k'unnaq ti kumal i je utz chwach i Dios —Xub'ij Jesús chke.

I tz'onb'enik chrij umayixik wa'im rumal i lapanik ru' i Dios

¹⁴ Te'uri i utijoxelab' i ma Wan Ajqajsanel Ya, xeupon ru' i Jesús i xkitz'onoj che: —Yoj lik arewi kqamayij qawa'im man lik k'iyal mul kojlapan ru' i Dios, xaq lik keje kki'an i aj fariseo. ¿B'uchak uri keje ti kki'an atijoxelab' yet ile? Xecha che i Jesús.

¹⁵ I Jesús xub'ij uri chke: —I winaq, we ke'e pa nima'ij re jun k'ulankil ¿Kmajaw taj we keb'isonik? ¿Xatab'a kkitij ti wa ru'? Lik qatzij kkitij na, tz'aqat o i achi ku' chi xk'uli'ik. Xwiri are kuriq i ij chi kelsax achi chkixol, te'uri kkimayij kiwa'im man kelapan ru' i Dios.

¹⁶ —Mijun kuk'ojoj jun u'u' el ru' jun ch'aqap k'ojb'al k'ak', man i k'ojb'al k'ak' xa ktzajik i kuraqch'ij i k'ul el; ru' ile lik xane mas ku'an nim i raqch'ijnaq che,

¹⁷ xaq mijun kuk'ol i uwa'al uva k'ak' muqb'am chupam surum el, man xa kraqch'ij uri i surum le. Ke'eloq, chi ksach uri uwa'al uva muqb'am xaq i surum. Rumali, o uchak kya' i uwa'al uva k'ak' muqb'am chupam i surum k'ak'; keje ile utz ke'el chke chekeb'. Keje ile xub'ij i Jesús chke.

Umi'al i ma Jairo xaq ixoq iwab'

¹⁸ I Jesús, are ktijin chub'ixkil ile chke, xaqte'et xupon jun achi ru', chi nim upatan chkixol i aj Judío. Xxuki chwach i Jesús, lik xuluk rib' k'a chwach ulew i xub'ij che: —Chakuyu inmak Ta, inmi'al k'a te xkamik. Xwiri, wetene kat-e yet wu', i kaya a'ab' puwi kk'un chik saq chwach —xcha.

¹⁹ I Jesús xwalijik, junam ku' utijoxelab' xe'e ru' i achi le.

²⁰ Are ketijin che i b'e, o jun ixoq chkixol i winaq chi je teren chrij. I ixoq le, ax iwab' wi; kab'lajuj junab' o chik che chi kril i rik'il lik k'i, xaq lik ktani taj. Ire xtejeb' pan chrij i Jesús xaq xuyin pan uchi' u'u' che,

²¹ man xuch'ob' puk'ux: Chi Kinutzirik wetene kinyin pan jub'i' u'u' che.

²² Are xuchap pan u'u', i Jesús xuna'o; xupiskilij rib', xutaqej pan ixoq xaq xub'ij che: —Wak'al, chakowirsaj ak'ux; man rumal ukub'ib'al ak'ux chwe ya xatutzirik —xcha. Are uri lik juntir xutzir ixoq che i or le.

²³ Xkimaj chub'i kib'e, xeupon ru' rachoch i achi chi nim upatan ke aj Judío. Xril i Jesús chi je yij chik i ajsu' xaq i je ajb'ixanel re i muqunik, xaq ni'pa i winaq is kesik'in che o'ej,

²⁴ are uri xub'ij chke: —Chixel b'i chi, man i ali kamnaq taj, xa kwarik. Are uri i winaq xa xkitze'ej i Jesús.

²⁵ Xwiri Ire xeresaj b'i winaq; te'uri xok b'i pa ja, i xuchap che u'ab' ali, are uri i ali le xwalijik.

²⁶ Rumal i u'anoj le, we' xkita utzijol i winaq re ronojel i jyub' le, chi Jesús uwalijsam i ali.

I Jesús xerutzirsaj i keb' mawach

²⁷ Are xel i Jesús chila, je o keb' mawach xeterej chrij; xesik'in che. —Nim laj Winaq, yet at umuq uxikin i mam David, chawila tob'al qawach! —Xecha.

²⁸ Are xok i Jesús ru' ja, xaq i mawach xetejeb' pan ru'. Are uri xub'ij chke: —¿Kul ik'ux chwe chi kintiki ni che ile? —Qatzij kattiki'ik, nim laj Winaq —xecha.

²⁹ Te'uri i Jesús xuyin kib'a'wach, i xub'ij chke: —Ch-antaj na, chrij pacha ukub'ib'al ik'ux chi kixutzir na —xcha chke.

³⁰ Te'uri i kib'a'wach lik xjaqtajik. I Jesús xub'ij chke: —Chi'ana kwent, milap iri chke i winaq, mixat jub'i', xub'ij.

³¹ Xwiri ike, are xe'el b'ik, xkijeq ub'ixkil chke konojel i winaq che i jyub' le wach xu'an i Jesús.

I Jesús xrutzirsaj jun winaq chi kel ti uch'awb'al

³² Are xe'el b'i je mawach te'eq, xek'un chal li jub'an winaq, kuk'am li jun achi mem. Memernaq rumal jun itzel tew o che.

³³ I Jesús xresaj b'i itzel tew che, i achi juntir xujeq ch'awik. I winaq lik xkib'isoj. Xkib'ij: —Lik qilom ti jun anik pacha ile, mitene che ronojel i jyub' Israel —xecha.

³⁴ Xwiri, i aj fariseo xkib'ij: —I achi le kresaj i itzel tew chke i winaq xa rumal ucho'ab' itzel o ru'; are i kaj-atzil itzel taq tew yawnaq i cho'ab' le che —xecha.

Lik k'i i molonik

³⁵ I Jesús xeusolij ronojel taq i tinimit, ronojel taq i komon. Is xok pa taq ja re molb'al ib' ke i judío, keutijojb'ej ke i winaq chila; x-e chupaxsaxik i utz laj tzij k'ak' chke i winaq, xub'ij chi petnaq chik i ajawinik re i Dios waral. Xaq xerutzirsaj, b'i chi k'ax, b'i chi yob'ilal o chke.

³⁶ Are xeril i winaq lik k'ax xuna puk'ux, man kek'achirik, xaq lik nti jun ketowik; xerilo pacha taq jub'an chij chi nti kok'aw utzam chke.

³⁷ Are uri xub'ij chke utijoxelab': —Lik k'i i molonik olik; xwiri, i ajchak ne te k'i.

³⁸ Rumali, chitz'onoj che i Rajaw i chak chi keutaq b'i mas mokom pa molonik, —xub'ij chke.