Mateo 4 - Wuj Pa K'ubultzij

Itzel kutzukuj utzaqsaxik i Jesús

¹ Are x-on ile, i Jesús xk'am b'i rumal Lo'laj Utewal i Dios che jun tz'inilik jyub' chaqij. Xk'am b'i chila, ilb'al re we ktzaqsax chupam i mak atzalal rumal Itzel.

² Chila xuch'ij kawinaq (40) ij, kawinaq (40) a'ab', lik nti xutijo; chrijil chik ile xpe i numik che.

³ Are uri, xupon Itzel, xtejeb' ru' i Jesús, tzaqsab'al re chupam i mak atzalal. Xub'ij che: —We qatzij at Uk'ojol i Dios, chab'ij che ab'aji chi ku'an wa re trigo che rib', xub'ij che.

⁴ I Jesús xula' uwach che itzel, xub'ij: —Kin-an taj, man chupam uwuj i Dios tz'ib'talik: “Xwi ti rumal i lejom wa re trigo je k'as i winaq; xaq lik je k'as rumal ronojel utzij i Dios.”

⁵ Te'uri Itzel xuk'am b'i i Jesús che i lo'laj tinimit Jerusalén. Xuk'am b'i naj k'a puwi li rachoch i Dios.

⁶ Te'uri xub'ij che: —We qatzij at Uk'ojol i Dios, chak'aqa b'i awib' k'a pulew i katkam taj, man chupam uwuj i Dios, keje iri tz'ib'talik: I Dios kub'ij ni chke u-ángel chi lik katkichajij. Ike lik katkichap ru' ki'ab'. Lik kkiya ti chawe chi katakij awaqan che i ab'aj. Keje ile xub'ij Itzel.

⁷ I Jesús xula' chik uwach che: —Xaq tz'ib'tal chupam uwuj i Dios chi mak'am upam a Awajwal Dios, xub'ij che.

⁸ Te'uri Itzel xuk'am chub'i i Jesús che jun jyub', lik naj uwi. Chila xeuk'utu wi che ronojel i tinimit chi o chwach i jyub' ta'aj, ru' taq i kichomal.

⁹ Te'uri xub'ij che: —Ronojel iri is kinsipaj chawe, xwiri we yet katxuki chinwach chukojik in-ij. Keje ile xub'ij Itzel che.

¹⁰ I Jesús xula' chik uwach che: —¡Jat, Itzel! Man chupam uwuj i Dios keje iri tz'ib'talik: “Xwi Awajwal Dios chakojo u'ij; xwi che Ire ka'an wi apatan.” Xcha.

¹¹ Te'uri Itzel xel chwach i Jesús; are uri xek'un jub'an ángel ru', xolkito chuya'kil i rajwaxik che.

I Jesús xujeq uchak pa Galilea

¹² X-on panoq, xuta utzijol i Jesús chi ma Wan tz'apil prexil. Are xuta ile, x-e tan chik pa jyub' Galilea.

¹³ Xwiri xkanaj ti pa Nazaret xaq x-ejeqi pa tinimit Capernaum chi o chuchi' i mar; che i jyub' Zabulón, xaq i Neftalí.

¹⁴ Are xupon i Jesús pa jyub' le, xe'eloq chi lik xtz'aqatik pacha utz'ib'am kan i mam Isaías chi profeta. Keje iri kub'ij:

¹⁵ Kinb'ij chiwe wach kkil ni chila pa jyub' Zabulón xaq pa Neftalí, chila pa jyub' ipa k-e wi i b'e ru' i mar, chila pa jyub' ch'aqa ya re i Jordán, chila ut pa Galilea, ipa je o wi i ne te aj Israel, chi kikojom ti Dios.

¹⁶ I winaq chi je o te'eq pa equmal re i kamik, xkil jun nim laj saq, pacha jun usaqirb'al pkiwi ni'pa i je o chupam i equmal re i kamik. Keje ile utz'ib'am i mam Isaías ujer.

¹⁷ I Jesús o chik chila, are uri xujeq ub'ixkil chke i winaq: Chijalwachij ino'oj chwach i Dios, man i U'atb'al tzij i Dios aj Chikaj ya kjeqanik. Keje ile xub'ij i Jesús chke.

I Jesús xeusik'ij kajib' achiyab' ajchapol kar

¹⁸ Che taq i ij le, are ktijin i Jesús che i b'e chuchi' i semelik ya Galilea, xeril keb' achiyab', katz kicha' kib'. I jun are i ma Simón chi xaq ma Pedro kkib'ij che; i jun chik are i ma Andrés. Ike le je ajchapol kar, xaq ketijin chuk'aqik i kataraya pa ya.

¹⁹ I Jesús xub'ij chke: —Chixterej chwij i kin-an ni chiwe chi ix ajmolol ke i winaq, pacha ki'an chke i kar le —xcha chke.

²⁰ Are uri, ike xko'taj kan i kataraya, xe'e ru'.

²¹ Jub'i' chi panoq, i Jesús xeril chik keb' achiyab' katz kicha' kib': Are i ma Jacobo, xaq i ma Wan, je uk'ojol i mam Zebedeo. Ike je o pa barco ru' i kiqajaw, ketijin chuyijb'axik i kataraya, i Jesús xeusik'ij ru';

²² ike juntir xkikanaj kan i ki-barco, xkikanaj kan i kiqajaw, xeterej b'i chrij i Jesús.

I Jesús xeunawsaj uk'iyal winaq

²³ Te'uri i Jesús xujeq kisolixik konojel i tinimit re jyub' Galilea. Xok ru' taq ja re kimolb'al ib' ke i judío, xaq xeunawsaj i winaq chi kimolom kib' chila, xub'ij i ajawinik re i Dios, xaq xerutzirsaj iwab'ib' che i k'ax chi o chke lik nti k-ono xab'i chi k'axil.

²⁴ Xaq ronojel i jyub' Siria xkita utzijol wach ktijin i Jesús chu'ankil pa Galilea. Are uri xekik'am li konojel iwab'ib' ru'. Ni'pa o taq i yob'il chke, ni'pa o taq k'ax chke. Xaq xekik'am li o itzel tew chke, xaq ni'pa kkitij kamik rumal i atak, xaq ni'pa i je sik. I Jesús, xerutzirsaj ni'pa ile.

²⁵ Je uk'iyal winaq xeterej chrij i Jesús: Xek'un aj Galilea, aj Decápolis, aj Jerusalén, konojel i Judea, xaq xek'un aj ch'aqap re i ya Jordán.