Mateo 3 - Wuj Pa K'ubultzij

I ma Wan chi Ajqajsanel Ya o pa tz'inilik jyub' chaqij

¹ X-on panoq, i ma Wan chi Ajqajsanel Ya, xok chub'ixkil utzij i Dios chke i winaq chi xemoltaj ru' chila pa tz'inilik jyub' chaqij re i jyub' Judea.

² ¡Chijalwachij i nojb'al chwach i Dios; man i ajawinik re i Dios aj Chikaj lik ya kk'unik! Xcha.

³ I ma Wan le are i jun chi ax ub'im wi i Dios chi kk'unik. I b'iwnaq kan ile are i profeta mam Isaías. Ire utz'ib'am kanoq: Ktataj uch'awb'al jun ksik'in pa tz'inilik jyub' chaqij; chi kub'ij na: ¡Ya kpe i Ajwal! Chiyijb'a ub'e. Chib'ut'u ni'pa taq i jul, xaq chisuk'b'a ni'pa i tanalaq pub'e i Ajwal. Keje ile tz'ib'tal kanoq.

⁴ I u'u' i ma Wan, xa are i rismal kamey antal che; i ximb'al upam xa are ch'aqap tz'um. I uk'exel uwa, lik xa are wach i xuriq pa taq es: Xa xutij uwa'al kab', xaq xeutij i ral taq sak'.

⁵ I winaq chi xeupon ru' chutayik utzij, o i je petnaq k'a pa tinimit Jerusalén, xaq o i je petnaq pa ronojel taq k'ijib'al re i jyub' Judea, xaq o i je petnaq chunaqaj i ya Jordán.

⁶ Chila xkijach wi kimak, te'uri i ma Wan xuqajsaj ya pkiwi chila chupam i raqana Jordán.

⁷ Xwiri, i ma Wan are xrilo chi je k'i i aj fariseo winaq, xaq i aj Saduceo, chi kkaj ike kqajsax ya pkiwi. Are uri xub'ij chke: —¡Yix lik ix rak'al kumatz! ¿Pachin xb'in chiwe yix chi kixtotaj chwach i tojpen chi ktijin li piwi?

⁸ Chik'utu iwib' ru' wach taq i ki'ano, we lik ijalwachim chik inojb'al chwach i Dios.

⁹ Mich'ob' yix moqxa kpe ti utojb'alil piwi, xa rumal ix umuq uxikin kan i mam Abraham. Mich'ob' yix chi lik kixtotaj rumal ile. Kinb'ij chiwe chi Dios, che i ab'aji, ktiki chu'ankil uk'iyal taq umuq uxikin i mam Abraham; keje ile xub'ij i ma Wan chke.

¹⁰ I tojpen ya kpe piwi, ikaj yij chik, k'atzb'al re i ra'. Konojel i che' chi kuya ti utz laj uwach, kk'atzix na; te'uri kporox pa a'.

¹¹ Yin, qatzij, kinqajsaj ya piwi yix, k'utb'al re we ijalwachim chik i nojb'al chwach i Dios. Xwiri, i Jun chi kk'un chwijil yin kuqajsaj ni Lo'laj Utewal i Dios piwi ru' i a'. Ire lik nim ni u'ij chinwach yin; kmajaw ti chwe we kin-an mokom che wib' chrij, mitene kwok'aj uxajab' che, man lik nim u'ij.

¹² Kolu'ata tzij pkiwi i winaq, pachin i je utz, xaq pachin i ne te utz. Ire yij chik pacha ku'an jun ru' u-pala are kupu uwach u-trigo. Are i utz kel che u-trigo, kumolo xaq kuya ni puk'olb'al. I rij, chi utz taj, kporox ni pa a' chi nti uchupik; xub'ij i ma Wan chke.

I Jesús xqajsax ya puwi

¹³ Che taq i ij le, i Jesús xel pa Galilea. Xupon chi ya Jordán ipa o wi i ma Wan; xupon chuqajsaxik ya puwi rumal ire.

¹⁴ I ma Wan xuch'ob'o chi kumaj taj we are ire kqajsaw ya puwi i Jesús. Rumali xub'ij che: —Yet ne kinatzukuj taq yin, lik are yet kmajaw chawe chi kaqajsaj ya pinwi yin. Kmajaw taj we yin kinqajsaj ya pawi yet —xcha i ma Wan.

¹⁵ I Jesús xula' uwach che: —Nti k-ono. Wo'or chaya ni kan keje ile, man kmajawik kqa'an ni ronojel pacha kraj i Dios —xcha. Te'uri i ma Wan xu'ano wach i xb'ix che.

¹⁶ I Jesús, are ya xqajsax ya puwi, xel pa ya, are uri, lik juntir xjaqtaj i kaj, x-iltaj i Lo'laj Utewal i Dios chi xqaj li suk'ulik puwi Jesús, pacha jun palomax,

¹⁷ xaq xtataj jun ch'awb'al chikaj chi xub'ij: Iri lik are i Wak'al chi k'ax kinna'o; chi lik inch'ikom rij xaq kul ink'ux che.