Mateo 28 - Wuj Pa K'ubultzij

Uwalijik i Jesús che i kamik chkixol i kamnaq

¹ Are xik'aw i ij sábado, are ya kpe i usaqirik re i nab'e ij re seman, are uri i ati Mariy Magdalena, xaq i ati Mariy jun, xe'e chrilik i jul.

² Are uri xaqte'et xpe jun nim laj kab'raqan, man o jun ángel re i Ajwal xqaj li chikaj, xresaj i ab'aj chuchi' i jul, xaq xkub'i puwi.

³ I utzunb'al ire kwalch'inik pacha urep a'; i u'u' lik saq pacha i saqb'ach.

⁴ I achiyab' chi je yij che i ch'oj, are xkil uwach, lik kesiksat rumal kixib'rikil, laj pacha taq xekamik.

⁵ Are xeupon i ixoqib', i ángel xub'ij chke: —Mixij iwib'. Yin weta'am chi xixk'un chutzukuxik i Jesús chi xkamsax chwach i krus.

⁶ Ire nti waral; walijnaq chub'ik pacha i xub'ij. Chixpetoq, choliwila i k'ijib'al ipa yatal wi te'eq.

⁷ Chib'isoj uya'ik utzijol chke i utijoxelab'. Chib'ij chke: “Ire walijnaq chik chkixol i kamnaq; ya enaq chik pa Galilea, nab'e ni chiwach yix; chila kiwil ni uwach”. Are iri kolinb'ij chiwe —xub'ij i ángel chke.

Uk'utik rib' i Jesús chke ixoqib'

⁸ Te'uri ixoqib' juntir xe'el ru' i jul. Lik xkixij kib' xe'ek, xwiri xaq lik xekikotik. Rumali pa'anem xe'e chuya'ik utzijol chke utijoxelab'.

⁹ Xaqte'et i Jesús xuk'ut chkiwach ike, xaq xuya rutzil kiwach. Ike xetejeb' ru' xaq xexuki chwach, kojb'al u'ij, xaq xkitz'ulej i raqan.

¹⁰ —Mixij iwib' —xub'ij i Jesús chke? Chib'ij chke i wachalal chi je are intijoxelab' che oj ike pa Galilea; chila kkil ni inwach —xcha.

Pwaqinik chke i ajchajal

¹¹ I ixoqib' xkimaj b'i kib'e. Are ketijin che i b'e, xaq o jujun chke i achiyab' chi je yij che i ch'oj xe'e pa tinimit chub'ixkil chke i kaj-atzil i rajpatan i Dios wach i xkilo.

¹² Are uri i kaj-atzil ajsujul sipon xe'e chub'ixkil chke i nimaq taq winaq. Xkijunamsaj i kino'oj chkiwach, wach i kki'ano. Te'uri xkiya uk'iyal pwaq chke i achiyab' chi je yij che i ch'oj,

¹³ xaq xkib'ij chke: —Chib'ij yix chi xixwar cha'ab', are uri xek'un i utijoxelab' i Jesús xaq xkel-aj b'i uch'akul ire. Keje ile chib'ij na.

¹⁴ We xuta utzijol i ku'at tzij chi aj Roma, mixij iwib'; yoj kqaqajsaj ni uk'ux ire; ire nti ku'an chiwe. Keje xkib'ij i kaj-atzil ajsujul sipon ile chke i achiyab' chi je yij che i ch'oj.

¹⁵ Are uri i achiyab' chi je yij che i ch'oj xkichap i pwaq, xaq xkib'ij na pacha b'ital chke. Xaq keje kkib'ij ni aj Judío winaq ile, k'a are o wi wo'or.

I taqanik re i Jesús chke utijoxelab'

¹⁶ Are uri i julajuj utijoxelab' xe'e pa Galilea; xe'e che jun jyub' pacha b'ital chke rumal i Jesús.

¹⁷ Chila xkiriq wi i Jesús, xaq are xkilo, xe'ok chukojik u'ij, tupu o jujun chke qas ti kkikojo we are Ire.

¹⁸ I Jesús xtejeb' pan ku' xaq xub'ij chke: —Yatal chik pin-ab' u'atik tzij puwi ronojel ni'pa i olik. O chik pin-ab' ronojel i aj chikaj, xaq ronojel i aj chwach i jyub' ta'aj.

¹⁹ Jix yix ku' i winaq ronojel uwach i jyub' ta'aj. Chib'ij intzij chke man xaq ike keu'on ni intijoxelab' Yin. Chiqajsaj ni ya pkiwi, pub'i i Ta chikaj, pub'i Uk'ojol, xaq pub'i i Lo'laj Utewal i Dios.

²⁰ Chik'utu chke chi o uchak kekojon ni che ronojel ni'pa ink'utum Yin chiwe yix. Misach pik'ux chi Yin in o ni iwu' ronojel ij saq, k'a pa k'isb'al re uwach i jyub' ta'aj.