Mateo 22 - Wuj Pa K'ubultzij

Tijojb'al tzij chrij i nima'ij re i k'ulankil

¹ I Jesús xujeq chik ub'ixkil i tijojb'al tzij chke. Xub'ij:

² —U'atb'al tzij i Dios aj Chikaj, lik keje pacha jun ajawinel chi xuyijb'a i nima'ij re uk'ulankil i uk'ojol.

³ Are xuriq i ij, xeutaq b'i umokom ku' i je sik'im chik, ke'e kib'ij chke chi ya yij chik i wa'im. Xwiri, ike xkaj ti xek'unik.

⁴ Te'uri xeutaq chub'i jub'an chik umokom chkisik'ixik. Xub'ij chke: “Chib'ij chke ni'pa i je insik'im na, chi yij chik i wa'im. Chib'ij chke chi je inkamsam chik i chikop chi je in ti'ojersam. Ronojel is yij chik; ike chepetoq, chixchoq chke.”

⁵ Xwiri, i je sik'im le, xekojon ti chke i taqon. O jun chke x-e prulew, xaq i jun chik x-e pa k'ayinik.

⁶ Xaq je o jujun xekichap i taqon re i ajawinel xaq xki'an k'ax chke k'a xekikamsaj na.

⁷ Rumali, i ajawinel lik xpe roywal che; xeutaq b'i uwinaq chi je yij che i ch'oj chkikamsaxik ni'pa i xe'anaw i kamik le, xaq chuporoxik i kitinimit.

⁸ Te'uri xub'ij chke umokom: “Ronojel is yij chik re i nima'ij, xwiri ike chi je insik'im na, xmajaw ti chke chi kepetik.

⁹ Rumali, jix yix pa nimaq taq b'e, xaq cheisik'ij che i nima'ij ni'pa i ke'iriq chila”; xub'ij chke umokom.

¹⁰ Ike is xe'el pa taq b'e, xaq xekimol ni'pa i xekik'ulaj. Xekimol i je utz laj taq winaq, xaq i ne te utz. Keje ile xkinojsaj i upaja.

¹¹ Te'uri xok i ajawinel ipa je moltajnaq wi i je usik'im ru'. Are uri xril jun achi ku' chi ukojom ti u'u' re i nima'ij.

¹² Xub'ij che: “Yet, ¿wach awokik chi, chi akojom ti a'u' re i nima'ij?” Xcha. I jun xuriq taj wach xub'ij che.

¹³ Te'uri i ajawinel xeusik'ij i umokom, xub'ij chke: —“Chixima i u'ab' i raqan, xaq chiwesaj b'i rija pa equm. Chila ko' na, xaq kuqach'ach'ej ni uware rumal ub'is”; xub'ij chke.

¹⁴ Keje ile ke'eloq man tupu je k'i i je sik'talik, ne te k'i je chatalik. Keje i tijojb'al tzij ile xub'ij i Jesús.

Tz'onb'enik puwi utojik alkawal

¹⁵ Are uri i aj fariseo xe'ek xaq xe'ok chuch'ob'ik chkiwach wach jun tzij kkitz'onoj che i Jesús tzaqsab'al re.

¹⁶ Te'uri xekicha jujun je o ku', xaq jub'an chik chi je teren chrij i ma Herodes, xaq xekitaq b'i ru' i Jesús. —Nim laj winaq —xkib'ij che are xeupon ru'—, qeta'am chi yet xwi i saq laj tzij kab'ij. Qeta'am chi yet qatzij kak'ut i utz laj b'e re i Dios, lik kakoj ti retalil che wach kkib'ij i winaq chawij. Yet kakoj ti retalil che, tupu je nimaq taq winaq.

¹⁷ Chab'ij uri chqe, wach i kab'ij yet, ¿Utz nawi, kqatoj alkawal che i ma César chi aj Roma o utz taj? —Xkib'ij che.

¹⁸ I Jesús xretamaj chi utz ti kkich'ob'o are xkib'ij ile. Xub'ij chke: —Yix, ¡xa keb' ipalaj! ¿B'uchak xa tzaqsab'al we ki'ano?

¹⁹ Chik'utu jun saqpwaq chwe, chi tojb'al re i alkawal —xub'ij. Are uri xkik'am li jun saqpwaq che.

²⁰ Are uri i Jesús xutz'onoj chke: —¿Pachin uk'exwach iri o chwach? ¿Pachin ub'i iri tz'ib'tal chwach? —Xub'ij chke.

²¹ Ike xkila' uwach che: —Ma César —xecha. —B'ay, chiya uri che i ma César ni'pa i re ire, xaq chiya che i Dios ni'pa i re Ire che —xub'ij i Jesús chke.

²² Ike, are xkita ile, lik xkib'isoj. Are uri xkikanaj kanoq i xe'ek.

Tz'onb'enik puwi i walijik che i kamik chkixol i kamnaq

²³ Xaq are i ij le, je o jujun aj Saduceo xeupon ru'. I aj Saduceo kkib'ij chi i je kamnaq kewalij ti chik. Are uri xkib'ij che:

²⁴ —Tijonel, i mam Moisés ub'im kanoq chi jun achi, we xkamik, we nti rak'al ru' kan i rixoqil, o uchak uri kk'uli i ucha' i achi ru' ixoq malkan, puk'exel i kamnaq. Keje ile o ni uri rak'al i achi chi kamnaq chwach ixoq le. Keje ile ub'im kanoq.

²⁵ B'ay, u'onom loq, chqaxol yoj je o wuqub' achiyab' chi katz kicha' kib'. I nab'e chke xk'uli'ik, xaq x-on panoq xkamik, nti rak'al. I ixoq malkan xkanaj kan ru' ukab' cha'xel.

²⁶ Te'uri i achi le xkam chik, i ixoq xk'uli chik ru' urox cha'xel. I achi le xaq xkamik. Keje xki'an i wuqub' achiyab' le.

²⁷ Xaq x-on panoq, te'uri xkam i ixoq.

²⁸ B'ay, we kewalij chik i kamnaq, ¿pachike chke i je wuqub' le chi lik saqil rachijil ke'eloq? Man is xk'uli ku' i je wuqub' achiyab' le —xecha.

²⁹ I Jesús xula' uwach chke: —Yix xa ix sachnaq na; man kita ti ub'e wach kub'ij utzij i Dios chi tz'ib'tal kanoq; xaq iweta'am taj wach i nim laj ucho'ab' i Dios.

³⁰ Are kewalij ni kamnaq ke'eloq pacha i u-ángel i Dios; kek'uli taj. I achiyab', i ixoqib' kek'uli ti chik.

³¹ I kiwalijb'al i kamnaq, qatzij olik. ¿Xatab'a iwilom ti yix wach ub'im kan i Dios chiwe? Ub'im kan ire:

³² “K'a in u-Dios i mam Abraham, xaq i mam Isaac, xaq i mam Jacob”; xub'ij. I Dios are ti ki-Dios i je kamnaq, are i ki-Dios i je k'aslik; xub'ij i Jesús chke. Keje ile xusaqij chke chi o ni kiwalijb'al i kamnaq.

³³ I winaq, are xkita ile, lik xkib'isoj che i k'utunik xu'an i Jesús.

I tzij pixab' chi lik o u'ij

³⁴ I aj fariseo, are xkita utzijol chi Jesús xtiki chula'ik uwach i kitzij i aj Saduceo, xkimol la kib'.

³⁵ O jun chke chi tijonel re ujer atb'al tzij. Xuk'am upam i Jesús, tzaqsab'al re.

³⁶ Xutz'onoj che: —Tijonel, ¿pachike i tzij pixab' chi lik mas o u'ij chi kqakojo? —Xcha.

³⁷ I Jesús xub'ij che: —“K'ax chana Awajwal Dios ru' ronojel ak'ux, ru' ronojel awanima, ru' ronojel anojb'al.”

³⁸ Are i jun le chi mas o uchak kojkojon che; are mas o u'ij ile chkiwach i jub'an chik.

³⁹ Te'uri i ukab' tzij chi o uchak kojkojon che, laj kumaj i jun le. Kub'ij: “K'ax cheana alok'anij pacha k'ax una'ik awib' yet ka'ano”.

⁴⁰ I keb' tzij pixab' le are saqil uxeb'al ronojel taq i atb'al tzij, xaq are uxeb'al ronojel taq i k'utunik kikanam kan i profeta. Keje xub'ij i Jesús ile chke.

¿Pachin chke winaqirnaq wa li i Cristo?

⁴¹ Tz'aqat k'a kimolom kib' i je aj fariseo,

⁴² i Jesús xutz'onoj chke: —¿Wach kich'ob' yix chrij i Cristo, chi Cristo iwoy-em? ¿Pachin i ratit umam? —Xub'ij chke. Ike xkib'ij: —Ire are ni umuq uxikin kan i mam David —xecha.

⁴³ Are uri i Jesús xub'ij chke: —¿B'uchak uri i mam David xub'ij “Wajwal” chrij i Cristo are xulapo? Lik rumal ni Lo'laj Utewal i Dios xub'ij ile. I mam David xub'ij i tziji:

⁴⁴ Xub'ij i Ajwal Dios che i Wajwal Cristo: “Chatkul ni pinwiqab'im, k'a kuriq ni ij keinya ni pawaqan ni'pa i je ajch'oj chawij”; —xub'ij. Keje ile utz'ib'am kan i mam David ujer.

⁴⁵ ¿Wach u'ankil uri chi Cristo umuq uxikin i mam David? ¿Wach u'ankil ile man lik are i mam David xub'ij “Wajwal” che i Cristo?

⁴⁶ Mijun chke xuriq chik ula'ik uwach che, mijupaj chik tzij. Are xu'an ile, te'uri mijun xukowij chik uk'ux chutz'onoxik mas tzij che i Jesús.