Mateo 20 - Wuj Pa K'ubultzij

I tijojb'al tzij chkij i ajchakib'

¹ Are uri i Jesús xub'ij: —U'atb'al tzij i Dios aj Chikaj lik keje pacha jun rajaw tikon chi k-e we' chutzukuxik rajchakib' re molb'al uwach i uva.

² Are xeuriq umokom, xub'ij chke chi are jun denario i kajil re jun ij. Te'uri xeutaq b'i pa chak prulew.

³ X-on panoq, kolo pa taq ub'elej or re i anb'al ij, x-e pa k'ijib'al ipa kkimol wi kib' i winaq re i tinimit xeuriqa jub'an achiyab' nti kichak.

⁴ Xub'ij chke: —We kiwaj chak, jix pwulew, je imolo uwach intikon; xaq yin kintoj na pacha kmajaw chiwe, —xub'ij chke. Ike xe'ek.

⁵ Xaq keje xu'ano are tik'il ij, xaq keje xu'an che oxib' or re uqajb'al ij.

⁶ Xaq keje tan chik xu'ano are xqaj i ij, kolo jo'ob' or che uqajb'al ij: X-e pa k'ijib'al ipa kkimol wi kib' i winaq re i tinimit, xeuriqa jub'an chik achiyab' nti kichak. Xaq xub'ij chke: —¿Wach ki'an yix chi jun ij? ¿Nti b'awa ichak? —Xub'ij.

⁷ Xaq xkib'ij ike che: —Mijun usujum chak chqe —xecha. —Jix pwulew, je imolo uwach intikon —xub'ij chke.

⁸ Are ya xok a'ab', i rajaw i chak xub'ij che i kok'aw utzam i chak: “Cheasik'ij i ajchakib' xaq cheatojo. Nab'e cheatojo b'i ni'pa i xek'un k'isb'al re. Are i je oknaq nab'e k'isb'al re cheatojo b'ik”; xub'ij che.

⁹ Xe'eloq chi are i xe'ok che i jo'ob' or re i qajb'al ij, xtz'aqatsax uwach i kajil re jun ij chkijujunal xya' b'i jun saqpwaq chke.

¹⁰ Are i je oknaq nab'e xkich'ob' ike chi mas nim ni kkich'ak ike chkiwach i je oknaq k'isb'al re. Xwiri, xa jun saqpwaq xya' chke chkijujunal re jun ij.

¹¹ Are xkik'am i kajil, xe'ok chi chub'chatik chrij i rajaw i chak chi utz ti xu'an che i kajil.

¹² Xkib'ij: “I je k'unnaq k'isb'al re, xaqjun i kitojik xa'an qu' yoj. Ike, xa jun or xechakunik, i yoj lik jun ij xqach'ij i chak i xqach'ij i ij”; xkib'ij che i rajaw i chak.

¹³ Ire xub'ij che i jun, “chata pe', yin xixint'or taj. ¿Xatab'a xqayijb'a ti chqawach, chi kixchakun jun ij chwach jun saqpwaq? Lik keje ile xqab'ij.

¹⁴ Chak'ama i awajil i jat. Are i kwaj yin, kinya ni che i jun pacha i xinya chawe yet; nti ku'ano we xa pa k'isb'al re xokik.

¹⁵ ¿Xatab'a nti we yin che inpwaq, wach kwaj kin-an che? Lik olik. ¿O xa ktitat apam che chi utz xin-an yin chke i jub'an?” Keje ile xub'ij i rajaw i chak.

¹⁶ Are ke'el uri, ni'pa i je o pa k'isb'al re, are kenab'ej na, i je nab'e wo'or, je are kekanaj kan pa k'isb'al re.

I Jesús xuroxmulij ub'ixkil ukamik

¹⁷ X-on panoq, i Jesús ktijin che i b'e ku' utijoxelab', enam ke pa Jerusalén. Are uri xeusik'ij i kab'lajuj ru', i xeu'ijla kitukel:

¹⁸ —Yix iweta'am chi ya xqamaj b'i qab'e pa Jerusalén. Are kojupon chila, Yin chi xinalaxoq chwach ulew pacha winaq, kinjachtaj ni pki'ab' i kaj-atzil i rajpatan i Dios, pki'ab' i tijonelab' re ujer atb'al tzij. Ike kki'at ni tzij pinwi xaq kkib'ij na chi o uchak kinkamsaxik.

¹⁹ Te'uri kinkijach ni pki'ab' i ne te aj Israel winaq: Ike ut kinkiyo'ya, kinkich'ay na, kinkikamsaj chwach i krus. Xwiri, churox ij, kinwalij ni che i kamik —xub'ij i Jesús chke.

I Jesús kula' uwach che kichuch i ma Santiago xaq i ma Wan

²⁰ Te'uri i kichuch i ma Jacobo xaq i ma Wan, chi je uk'ojol i mam Zebedeo, xtejeb' pan ru' i Jesús je rachi'ilam i ralab'. Xxuki chwach i Jesús, tz'onb'al re jun utzil che.

²¹ I Jesús xutz'onoj che: —¿Wach kawaj yet? —Xub'ij. I ixoq xub'ij: —Are at o chik che i ajawinik re i Dios kwaj yin chi kaya chke i keb' wak'ali chi kekub'i ni pa taq atzal, jun pa wiqab'im, xaq i jun pa moxim —xub'ij i ixoq che.

²² —Yix iweta'am taj wach i kitz'onoj —xub'ij i Jesús chke—. Ni'pa i k'ax, xaq i uyej chi kinik'aw wi Yin, ¿Kixtiki yix chuch'ijik ronojel ile? —Xub'ij chke. —Kojtiki'ik —xecha.

²³ Are uri i Jesús xub'ij: —Qatzij, yix is kixik'aw ni chupam i k'axi, xaq kitij ni uyej pacha kinik'aw wi Yin. Xwiri, nti pin-ab' Yin kinb'ij pachin kkub'i pinwiqab'im xaq pinmoxim. Xwi Inqajaw o pu'ab'; Ire uyijb'am chik i k'olb'al le, Ire reta'am pachin kek'iji che, —xub'ij i Jesús chke.

²⁴ I lajuj chke utijoxelab', are xkita wach i xkib'ij i keb' le chi je katz kicha' kib', ike xpe koywal chke.

²⁵ Are uri i Jesús xeusik'ij xaq xub'ij chke: —Yix iweta'am chi i nimaq taq atol tzij chi nti Dios ku', kki'an che kib' pacha je kajaw i winaq chi je o pki'ab'; i winaq chi nimaq kipatan ke'ajawin pkiwi i kach winaq.

²⁶ Xwiri, chixol yix keje ti ki'an ile. Are i ki'an ni yix, pachin kraj ke'eloq nim u'ij, xwi chchakun uri chkij i rachi'il.

²⁷ I jun chi kraj kuya rib' chunab'eyal, chu'ana uri che rib' pacha ajtaqon chkij i rachi'il.

²⁸ Chu'ana uri che rib' pacha kin-an Yin chi Xinalaxoq chwach Ulew pacha Winaq; in k'unnaq na pacha mokom chkij i winaq; are ti ike je inmokom Yin. In k'unnaq man kinya ni wib' che i kamik, tojb'al re i kelb'al uk'iyal winaq pa k'ax —xub'ij i Jesús chke.

I Jesús xerutzirsaj keb' mawach

²⁹ Are ktijin kelik pa tinimit Jericó, je k'i i winaq je teren chrij i Jesús.

³⁰ Chila je o wi keb' mawach je kul chi b'e. Are xkita chi ktijin rik'awik i Jesús, xesik'in chub'ixkil: —¡Nim laj winaq! ¡Yet chi at umuq uxikin kan i mam David, chawila tob'al qawach! —Xecha.

³¹ I winaq chi je teren b'i chrij i Jesús xekiyajo xaq xeki'atij. Xwiri, ike lik xa mas xesik'in chub'ixkil i tziji: —¡Nim laj winaq! ¡Yet chi at umuq uxikin kan i mam David, chawila tob'al qawach! —Xecha.

³² Are uri i Jesús xtak'i'ik xaq xeusik'ij ru'. Xub'ij chke: —¿Wach kiwaj kin-an chiwe? —Xcha.

³³ Ike xkila' uwach che: —Nim laj winaq, kqaj kojtzunik —xecha.

³⁴ Are uri i Jesús k'ax xeuna'o. Xuyin i kib'a'wach, are uri lik juntir xetzunik. Te'uri ike xeterej b'i chrij i Jesús.