Mateo 2 - Wuj Pa K'ubultzij

I nimaq kino'oj chi je aj prelb'al ij xeupon chrilik i Jesús

¹ Are xalax i Jesús pa tinimit Belén re i jyub' Judea, i ajawinel are i mam Herodes. I mam le o pupatan pa tinimit Jerusalén; je o jub'an nimaq kino'oj, je petnaq k'a naj prelb'al ij.

² Are xeupon pa Jerusalén, xkitz'onoj chke i winaq: —¿Ipa o wi i nim laj ajawinel ke i aj Israel winaq chi xalaxik? Ya xqil uch'umil are oj o chila prelb'al ij, rumali xojk'un chukojik u'ij —xkib'ij.

³ I nim laj ajawinel, mam Herodes, are xuta utzijol ile, lik xk'achir rumal; xaq konojel i winaq pa tinimit Jerusalén xek'achir rumal.

⁴ Te'uri i atol tzij xeusik'ij i kaj-atzil i ajsujul sipon ke aj Israel, xaq i tijonelab' re ujer atb'al tzij. Are xemoltajik, xutz'onoj chke ipa kalax wi Cristo.

⁵ Ike xkib'ij che: —Kalax pa tinimit Belén chi ukwenta i jyub' Judea. Man keje ile tz'ib'tal kan rumal i profeta ujer. Keje iri kub'ij:

⁶ Yet tinimit Belén, at ukwenta i jyub' Judá, mach'ob'o moq nti a'ij chkixol i nimaq taq tinimit re ulew le; lik o ni a'ij, man chkixol awak'al kalax ni jun nim laj ajk'amb'eyal; are ire kok'aw ni utzam chke inwinaq, aj Israel.

⁷ Te'uri i mam Herodes ani'al xeusik'ij i nimaq kino'oj chi je petnaq prelb'al ij xaq xutz'onoj chke pachike ij, xaq pachike ik' are xwinaqir i ch'umil.

⁸ Te'uri, xeutaq b'i pa Belén, xub'ij chke: —Jix chutzukuxik i ral ak'al le; na'al chitzukuj. Are kiriqo, kolib'ij chwe man xaq yin kin-e chukojik u'ij —xub'ij i ajawinel mam Herodes.

⁹ I nimaq kino'oj, are xutzin ub'ixkil ile chke rumal i ajawinel, xkimaj chub'i kib'e. I ch'umil chi xnab'ej chkiwach k'a prelb'al ij, xb'in chik chkiwach k'a xupon ipa yatal wi i ral ak'al. Chila xtak'i wi puwi i ja ipa o wi i Jesús.

¹⁰ Are xkil i nimaq kino'oj chi xtak'i i ch'umil, lik xekikotik.

¹¹ Are xe'ok ru' ja, xkiriq i ak'al ru' uchuch, ixoq Mariy, xexuki'ik, xkikoj u'ij i ak'al. Te'uri xkijaq i kikaxa, xkesaj li kisipon chi kok'am, xkiya che. Ile are an-o'oj, pom, xaq i mirra.

¹² Are xetzalij chik pkitinimit, junwi chik b'e xkimajo man xb'ix chke rumal i Dios pkiwaram chi metzalij chik ru' i mam Herodes.

Xe'anmajik, xe'e pa Egipto

¹³ Are je enaq chik i nimaq kino'oj, te'uri jun ángel re i Ajwal xwinaqir puwaram i ma José. Xub'ij che: Chatwalijoq, chak'ama b'i awak'al, xaq i uchuch, i chat-anmajoq, jat k'a Egipto. Chat-ol chila k'a kinb'ij ni chawe junpa katpetik, man i mam Herodes kutzukuj ni ak'al, kraj kukamsaj; xub'ij i ángel che.

¹⁴ I ma José xwalijik, xuk'am b'i i ak'al, xaq i uchuch, xaq xkimaj b'i kib'e cha'ab', xe'e k'a pa Egipto.

¹⁵ Chila xek'iji wi k'a xkam ni mam Herodes. Keje ile xe'eloq xaqjun ru' pacha ub'im kan i Ajwal; man i profeta utz'ib'am kan i tziji chi ub'im i Ajwal: Pa Egipto kinsik'ij wi Ink'ojol. Keje ile tz'ib'tal kanoq.

I mam Herodes xutaq kikamsaxik i ak'alab'

¹⁶ I mam Herodes, are xunab'ej chi xt'or kan kumal i nimaq kino'oj, lik xpe roywal chke. Rumal uri, xutaq kikamsaxik konojel i ral taq alab'om chi k'amaja kkichap keb' junab', chi je jeqel pa tinimit Belén, xaq che ronojel i jyub' chrij chwach. Keje ile chrij pacha i ij chi xkib'ij i nimaq kino'oj.

¹⁷ Keje ile xe'eloq pacha tz'ib'tal kan rumal i mam Jeremías chi profeta.

¹⁸ Xtataj jun nim laj ch'awb'al pa tinimit Ramá, lik are jun nim laj o'ej re uk'axk'ol, nimaq taq uk'axk'ol k'uxij, are ixoq Raquel chi ko' chke i rak'al, xaq lik xraj taj chi kkub'sax uk'ux man i kak'al ya xekamik.

I je alk'uwal xe'uxlan pa Nazaret

¹⁹ X-on panoq xkam i mam Herodes. Te'uri, chila pa Egipto, jun ángel re i Ajwal xwinaqir ru' i ma José puwaram. Xub'ij che:

²⁰ Chatwalijoq, chak'ama b'i ak'al xaq i uchuch, chixtzalij che i jyub' Israel; man ya xekam ike chi kkaj te ukamsaxik ak'al. Keje ile xub'ij i ángel che.

²¹ Te'uri i ma José xwalijik, xuk'am b'i rak'al, xaq i rixoqil xetzalij che i ulew Israel.

²² I ma José are xuta utzijol chi uk'exel i mam Herodes are uk'ojol chi ma Arquelao ub'i chi krajawin pa Judea. Ire xuxij rib' che, rumali xraj ti x-ejeqi pa jyub' Judea. Xwiri xb'ix chik che rumal i Dios puwaram wach i ku'ano; rumali, x-e pa jyub' Galilea.

²³ Are xeupon chila, x-ejeqi pa tinimit Nazaret. Keje ile xe'eloq, pacha kib'im i profeta chi Jesús aj Nazaret; kb'ix ni che.