Mateo 17 - Wuj Pa K'ubultzij

Uyojtajik uwach utzunb'al i Jesús

¹ Waqib' ij rik'awik ile, i Jesús xeuk'am b'i i ma Pedro i ma Jacobo, xaq i ma Wan chi ucha' i ma Jacobo, i xe'e kitukel che jun nim laj jyub' naj uwi.

² Are je o chila, i utzunb'al i Jesús lik xyojtajik; i upalaj lik x-on pacha utzunb'al ij kwalch'inik; xaq i u'u' lik xu'an saq, pacha i saq re i ij.

³ Xaqte'et, xkil i etz mam Moisés, xaq i etz mam Elías, kelapan ru' i Jesús.

⁴ Are uri i ma Pedro xub'ij che i Jesús: —¡Tijonel, utz xe'eloq chi oj o chi! We kawaj, kqa'an oxib' mujb'al waral, jun awe yet, jun re i mam Moisés, xaq i jun re i mam Elías —xub'ij.

⁵ Are ktijin i ma Pedro chub'ixkil ile, xqaj li jutzob'aj sutz' pkiwi, lik kwalch'inik. I chupam i sutz' le xkita jun ch'awb'al chi kub'ij: Iri are Ink'ojol chi lik k'ax kinna'o, lik kinkikot rumal Ire. Chita ut wach i kub'ij; xub'ij.

⁶ I utijoxelab' i Jesús, are xkita ile, lik xkixij kib'; xexuki'ik lik xkiqajsaj kipalaj k'a chwach ulew.

⁷ Are uri i Jesús xtejeb' pan ku'; xeuyino i xub'ij chke: —Chixwalijoq; mixij iwib' —xub'ij.

⁸ Ike, are xetaqen anoq, nti chik xkilo; xwi chik i Jesús o ku'.

⁹ Are ketijin li kiqajik tzam jyub', i Jesús xub'ij chke: —Ni'pa i xiwil piwach, milap tan chke i winaq, k'a kuriq ni i ij are inwalijnaq chik Yin, chi Yin chi Xinalaxoq chwach Ulew pacha Winaq —xub'ij.

¹⁰ Te'uri i utijoxelab' xkitz'onoj che i Jesús: —¿B'uchak kkib'ij i tijonelab' re ujer atb'al tzij chi nab'e kk'un i mam Elías?

¹¹ I Jesús xula' uwach chke: —Qatzij i kkib'ij chi mam Elías nab'e kk'un na, koluyijb'a ni ronojel.

¹² Xwiri, Yin kinb'ij chiwe chi mam Elías ya k'unnaq chik, xwiri ike xketamaj ti uwach. Xa xki'an che ni'pa i xkaj u'anik ike. Xaq keje Yin, chi Yin chi Xinalaxoq chwach Ulew pacha Winaq, kintij ni uyej pki'ab' ike —xub'ij.

¹³ Te'uri i utijoxelab', xkita ub'e chi are i ma Wan Ajqajsanel Ya, ktijin i Jesús chulapik chke.

I Jesús xrutzirsaj jun ala chi o itzel tew che

¹⁴ Te'uri xeqaj li che i jyub' xaq xeupon chik ku' uk'iyal winaq chi je moltajnaq. Are uri o jun achi xtejeb' ru' i Jesús, xxuki chwach xaq xub'ij che.

¹⁵ —Nim laj winaq, chawila tob'al uwach i wak'al. Man o itzel tew che, xaq lik kutij kamik rumal. K'iyalmul ktzaq pa a', xaq ktzaq pa ya rumal.

¹⁶ Ink'amom li waral ku' atijoxelab', xwiri ketiki ti chi rutzirsaxik —xub'ij.

¹⁷ Te'uri i Jesús xub'ij: —¡Yix, lik nti ukub'ib'al ik'ux che i Dios; lik ix sachnaq na! ¡O tan chi ij in o iwu', xwiri lik ix nawnaq taj! ¿Ni'pa nawi chik ij rajwaxik in o iwu'? Chik'ama li ak'al waral —xub'ij.

¹⁸ Te'uri i Jesús xuyaj i itzel tew chi o che ala, rumali itzel tew xel che. I ak'al juntir xutzirik.

¹⁹ Te'uri i tijoxelab', are kitukel chik, xkitz'onoj che i Jesús: —¿B'uchak xojtiki ti yoj chrelsaxik b'i itzel tew le? —Xkib'ij.

²⁰ I Jesús xub'ij chke. —Xixtiki ti che man nti qas ukub'ib'al ik'ux che i Dios. Qatzij kinb'ij chiwe: Wetene o ukub'ib'al ik'ux che i Dios, tupu xa pich' keje pacha unimal jun ija re mostas, kixtiki uri chu'anik nim laj anik ru'. Wetene kib'ij che i jyub'i: “Chat-el chi; chat-ax jela”; kib'ij ni che, lik kel uri. Is kixtiki uri chu'anik.

²¹

I Jesús xukamulij ub'ixkil ukamik

²² X-on panoq, are keb'in i Jesús pa jyub' Galilea, xub'ij chke utijoxelab', Yin, chi Xinalaxoq chwach Ulew pacha Winaq, ya kinjachtaj ni pki'ab' i winaq.

²³ Ike kkikamsaj na; xwiri churox ij kwalij na, xub'ij. I utijoxelab', are xkita i tzij le, lik xpe kib'is.

Utojik alkawal re i rachoch i Dios

²⁴ I Jesús ku' utijoxelab', are xeupon pa tinimit Capernaum, o jujun ajtz'onol alkawal xeupon ru' i ma Pedro. Ketijin chutz'onoxik alkawal re i rachoch i Dios. Xkib'ij che i ma Pedro: —Itijonel yix ¿Xatab'a kutoj ti alkawal re i rachoch i Dios? —Xecha.

²⁵ —Lik kutojo —xub'ij i ma Pedro. Are xok i ma Pedro pa ja, i Jesús juntir xub'ij che: —¿Wach kach'ob' yet, ma Simón? I ajawinelab' re uwach i jyub' ta'aj, are kkitz'onoj alkawal chke i winaq, ¿Pachin chke kkitz'onoj wi? ¿Xatab'a kkitz'onoj chke i je ke ike? O chke i je aj naj chi je o chkixol.

²⁶ I ma Pedro xub'ij: —Qatzij. Xwi chke i ne te kach aj tinimit kkitz'onoj wi. Are uri i Jesús xub'ij: —I je uwinaq i ajawinel kkitoj ti alkawal —xcha.

²⁷ Xwiri, kqaj ti kqapetsaj koywal; rumali jat chi ya, jak'aqa axok ch'ich' pa ya. Chawesaj li nab'e kar chi kchaptaj rumal i xok ch'ich', kariq ni jun saqpwaq puchi'. Ile tojb'al re alkawal we Yin xaq awe yet. Chak'ama b'ik i chatojo kanoq —xub'ij i Jesús che.