Mateo 14 - Wuj Pa K'ubultzij

Ukamik ma Wan Ajqajsanel Ya

¹ Che taq i ij le, i ma Herodes, chi ajawinel re i jyub' Galilea, xuta utzijol wach ku'an i Jesús.

² Ire xub'ij chke utaqon: “Ire le, are i etz ma Wan Ajqajsanel Ya, chi walijnaq chik che i kamik.” Xcha. “Are rumal uri chi lik o ucho'ab' chu'anik i nim laj taq il le.” Xcha.

³ I ma Herodes le xutaq uchapik i ma Wan, xkiximo xaq xkik'am b'i prexil. Keje xu'an ire ile rumal ati Herodías chi rixoqil i ma Felipe, i ma Felipe le katz kicha' kib' ru' ma Herodes.

⁴ I ma Wan ub'im che i ma Herodes: “Utz taj chi ka'an awixoqil che i ixoq le”; xub'ij.

⁵ Rumali, i ma Herodes xraj ukamsaxik i ma Wan, xwiri kuxij rib' chke i winaq. Man konojel i winaq kikojom chi i ma Wan lik profeta.

⁶ Are xk'un i nima'ij re ma Herodes chi xtz'aqat chik jun junab' re uk'aslemal, xupon i ralit i ati Herodías, xxajaw chkiwach konojel i je sik'talik chi je o chila. I ma Herodes lik qus xrilo,

⁷ rumali xub'ij che i ali chi kuya ni che xa pachike taq kutz'onoj che, xaq lik xub'ij chi lik ku'ano pacha i kub'ij.

⁸ I ali, ya b'ital chik che rumal uchuch wach i kutz'onoj; are uri xub'ij che i ma Herodes: —Chaya i ujolom i ma Wan chwe chi Ajqajsanel Ya; chupam jun laq lik'lik —xcha.

⁹ I ma ajawinel xb'isonik are xuta ile. Xwiri xutaq u'anik pacha xb'ix che, man ire lik xub'ij chi lik ku'ano pacha i kub'ij. Puwi wach i xusujuj che i ali. Xaq ni'pa i je o chila ru' is xkita wach i xub'ij; rumali, xu'ano.

¹⁰ Are uri xutaq relsaxik ujolom i ma Wan prexil.

¹¹ Te'uri xkik'am b'i ujolom le chupam jun laq lik'lik, i xkiya che i ali; ire xujach che uchuch.

¹² Te'uri xeupon i utijoxelab' i ma Wan chuk'amik uch'akul; xkik'am b'ik xaq xkimuqu. Te'uri xe'e chub'ixkil che i Jesús chi xkamsax i ma Wan.

Jesús xeutzuq lajujwinaq kab'lajujmo' (5,000) winaq

¹³ I Jesús are xuta ile, xel chila utukel. Xok b'i chupam jun barco, x-e che jun jyub' tz'inilik. Xwiri, i winaq lik xkita pa x-e wi. Rumali ike xe'el pa taq kitinimit, xesutin chuchi' i ya, xe'e chuk'ulaxik i Jesús.

¹⁴ Ire, are xel pa barco, xeril tan chik uk'iyal winaq je o chila. Lik xril tob'al kiwach, rumali xerutzirsaj iwab'ib' chi je kok'am b'ik.

¹⁵ Are ya kok a'ab', i utijoxelab' xetejeb' pan ru' xaq xkib'ij che: —Ya xqaj i ij; warali nti winaq jeqel chi. Chea'ijla b'i i winaq; chaya chke ke'e pa taq komon chulo'ik wach i kkitijo —xecha.

¹⁶ I Jesús xub'ij chke: —Nti uchak ke'ek; chiya yix chke wach kkitijo —xub'ij.

¹⁷ Ike xkila' uwach che: —Nti qu' yoj wach kqaya chke; xwi o jo'ob' wa re trigo xaq keb' kar —xecha.

¹⁸ —I Jesús xub'ij chke, chik'ama li chwe waral —xcha.

¹⁹ Te'uri xub'ij chke i winaq chi kekub'i chwach taq k'im. Ire xuchap i jo'ob' wa re trigo xaq i keb' kar, xtzun chikaj xaq xutioxij che i Dios. Te'uri xupir i wa re trigo i xuya chke utijoxelab'; ike xkijach chke i winaq.

²⁰ Konojel is xkitijo, lik xenojik. Xkimol i ch'aqa taq i xkanaj kan kab'lajuj kub'an.

²¹ I uk'iyal winaq chi xetzuqik, xwi achiyab' kolo je o lajujwinaq kab'lajujmo' (5,000) chke, xaq puwi ile je o ixoqib', xaq ak'alab'.

I Jesús kb'in puwi i ya

²² Te'uri i Jesús xub'ij chke utijoxelab' chi ke'ok pa barco, man ke'ax chik ch'aqap. Xub'ij chke chi kenab'ej nu b'i chwach Ire, man tz'aqat Ire keu'ijla b'i i winaq.

²³ Xutzin ile, xel b'i Jesús chwi jun jyub' utukel chutz'onoxik che i Dios. Are xok a'ab', utukel o chila chwi jyub'.

²⁴ Are uri i utijoxelab' je o pa barco pa nik'aj ya. I retum re ya lik kel chikaj, kuroj rib' chrij i barco rumal i tew chi lik nim xpe chrij.

²⁵ Are k'a equm, i Jesús ktijin che i b'e chwi ya, ktijin ruponik ku'.

²⁶ I utijoxelab', are xkilo chi Ire kb'in chwi ya, lik xkixij kib' che. Rumali, xesik'in chub'ixkil: —¡Ile jun xib'inel! —Xecha.

²⁷ Are uri i Jesús xub'ij chke: —¡Mixij iwib'! Xa yin. ¡Chikowirsaj ik'ux!

²⁸ Te'uri i ma Pedro xu'ijla i xub'ij che: —Ajwal, we lik qatzij at are yet, chaya ni chwe kinb'in awu' puwi i ya —xub'ij.

²⁹ —Sa'aj —xcha i Jesús che. I ma Pedro xel chupam i barco i xujeq b'inik chwi ya, x-e ru' i Jesús.

³⁰ Xaqte'et xrilo chi lik nim i tew, lik xuxij rib' rumal. Are uri xutikb'a b'i sachik pa ya; rumali, xsik'in chub'ixkil: —¡Ajwal, chinato!

³¹ I Jesús juntir xuchap pan che u'ab'. Xub'ij che: —Ma Pedro, ¿Nti qas ukub'ib'al ak'ux chwe? ¿B'uchak xaxij awib'? —Xcha.

³² Are xe'ok b'i ike pa barco, i tew xuxlanik.

³³ Are uri ni'pa i je o pa barco, xexuki chwach i Jesús, xaq xkib'ij che: —¡Qatzij yet at Uk'ojol i Dios! —Xecha.

I Jesús xeukunaj iwab'ib' pa tinimit Genesaret

³⁴ Te'uri xkimaj chub'i kib'e puwi ya, xaq xeupon chuchi' i ulew Genesaret.

³⁵ I winaq chila, are xketamaj chi xupon i Jesús, xkipaxsaj utzijol che ronojel i jyub' le. Te'uri xekik'am li ni'pa iwab'ib' ru' i Jesús.

³⁶ Lik xkitz'onoj utzil chomal che, chi kuya ni chke iwab'ib' kkiyin ni jub'i' uchi' u'u'; konojel ni'pa i xkichapo, is xeutzirik.