Marcos 6 - Wuj Pa K'ubultzij

I Jesús o chila Nazaret

¹ Te'uri i Jesús xel putinimit chi Nazaret ub'i, junam ku' utijoxelab'.

² Are xuriq i ij sábado, i Jesús xok pa ja re i molb'al ib' xaq xok chuk'utik utzij i Dios chke i winaq chi je o chila. I uk'iyal winaq le are xkita wach kub'ij i Jesús, lik xkib'isoj xaq xkib'ij i tziji: —¿Ipa xutijoj wi rib' i achi le che i jalajuj taq k'utunik chi ku'ano? ¿Pachin taq xyaw i nojb'al le che? Xaq ¿Wach taq usuk' chi ku'an i nimaq taq il le?

³ ¿Xatab'a are ti ire ile chi aj-anol mexa? Chi ralab' ati Mariy; xaq ratz a Jacobo, a José, a Judas xaq a Simón. ¿Xatab'a je jeqel ti ranab' chqaxol yoj waral? —Keje xkib'ij i winaq. Rumali lik xkiya ti u'ij xaq lik xpe koywal che.

⁴ Are uri i Jesús xub'ij chke: —Xaipa koksax wi u'ij jun profeta, xwiri putinimit, chkixol i rachalal xaq chi rachoch lik koksax ti u'ij —xcha.

⁵ Mijun nim laj il xu'an i Jesús chila, xwi keb' oxib' winaq xuya u'ab' pkiwi xaq xerutzirsaj.

⁶ Rumali i Jesús lik xub'isoj man i winaq chila xekojon ti che. Rumali x-e pa taq komon naqaj chuk'utik utzij i Dios chke i winaq.

I Jesús xeutaq b'i utijoxelab' chupaxsaxik uwach utzij i Dios

⁷ I Jesús xeusik'ij i kab'lajuj utijoxelab' ru' man xuya pki'ab' chi kkesaj b'i itzel taq tew chke i winaq xaq pkakab'il xeutaq b'i pa jalajuj taq komon.

⁸ Xaq xub'ij chke chi nti kkik'am b'ik are ke'ek, mitene kiteb', mitene kiwa xaq mitene kipwaq; xwi kich'amiy kkik'am b'ik,

⁹ xwi jumolaj kixajab' kkikoj b'ik, xwiri nti ki'u' kkik'am b'ik re kkijalb'ej, lik xwi jumolaj chi kikojom.

¹⁰ Xaq xub'ij chke: —Are kixupon che jun komon we xitz'onoj iposar ru' jun ja lik chila chix-ol wi, k'a are kixel chila che i komon le te'uri kixel ru' i ja le.

¹¹ We o jun tinimit kixkik'ulaj taj xaq we kkaj ti utayik utzij i Dios, chixel uri chila, chipupa kan ulew che iwaqan, k'utb'al re chke chi o i k'ax kpe ni pkiwi.

¹² Are uri i tijoxelab' xe'e chub'ixkil utzij i Dios chke i winaq, xkib'ij chke chi o uchak kkijalwachij kinojb'al chi utz taj.

¹³ Xaq xkesaj b'i jalajuj taq itzel taq tew chke i winaq; xaq je k'i iwab'ib' xekikunaj ru' aceite.

Ukamsaxik ma Wan Ajqajsanel Ya

¹⁴ I ma Herodes, chi atol tzij pkiwi aj Israel, xuta utzijol wach i nimaq taq il ktijin i Jesús chu'anik, chi enaq chub'i utzijol xaipa. I ma Herodes xuta chi kb'ixik: “Are i etz ma Wan Ajqajsanel Ya xwalij chkixol i kamnaq, rumali ktijin chu'anik i nimaq taq il le”; kecha.

¹⁵ Xaq jub'an chik kkib'ij: “Chi are etz mam Elías chi profeta”. Xaq “o i keb'iwik chi ile are jun profeta chi kachi'il kan i profeta re ujer”.

¹⁶ Xwiri i ma Herodes are xuta ni'pa ile, xub'ij: —Ile are ma Wan chi xintaq uk'atzixik ujolom, xwiri wo'or xwalij chaloq —xcha.

¹⁷ Xa rumal ati Herodías, chi ma Herodes xutaq uminik ma Wan le prexil xaq xutaq uyut'ik ru' karena; i ati Herodías le rixoqil ma Felipe chi ucha' ma Herodes. Xwiri i ma Herodes le uminom rib' ru' i rixnam.

¹⁸ Man ma Wan le ub'im che ma Herodes: “I kattijin chu'anik le lik utz taj man ixoq chi o awu' le lik rixoqil acha'”.

¹⁹ Rumali i ati Herodías le lik tzel xril ma Wan xaq lik xraj te ukamsaxik xwiri xuriq taj wach ukamsaxik xu'ano.

²⁰ Man i ma Herodes le kuxij rib' man reta'am chi ma Wan le lik suk'ul laj winaq xaq lik ch'am uk'aslemal, rumali i ma Herodes le kuchajij uk'aslemal ma Wan, tupu are kuta utzij kuriq ti chik wach i ku'ano, xwiri lik kraj utayik utzij i ma Wan le.

²¹ I ati Herodías lik xrechb'ej i nima'ij chi xu'an ma Herodes re u'ij ire man xuk'is chik jun junab' uk'aslemal. Are uri chi xeusik'ij i je raqan u'ab', xaq i aj-atzil chke i achiyab' chi je yij che i ch'oj, xaq xeupon i nimaq kipatan re ronojel i jyub' Galilea.

²² Are ketijin konojel chwa'im i ralit ati Herodías kxajawik xok b'i chkiwach. Rumali i ma Herodes xaq konojel ni'pa ketijin chwa'im ru' lik qus xkilo wach xajawik xu'an i ali le. Rumali i ma Herodes xub'ij che ali: —Chatz'onoj chwe wach kawaj, man kinya ni chawe —xcha.

²³ Lik k'iyalmul xub'ij che ali chi chutz'onoj wach i kraj man ire kuya ni che xab'iroxik, xaq xub'ij ne che chi nti k-ono we kutz'onoj nik'aj che i jalajuj taq tinimit chi o pu'ab'.

²⁴ Are uri i ali le x-e chutz'onoxik che uchuch, xub'ij: —Nan, ¿Wach kintz'onoj che i ajawinel kab'ij yet? Are uri i uchuch xub'ij che: —Chatz'onoj ujolom ma Wan che, chi Ajqajsanel Ya.

²⁵ Are uri i ali le juntir xok la chub'i ru' i ajawinel, xub'ij che: —Kwaj chi lik wo'or chaya li ujolom ma Wan chi Ajqajsanel Ya chwe chupam jun laq.

²⁶ I atol tzij are xuta ile lik xpe ub'is, xwiri rumal i sujunik chi xu'an che ali chkiwach konojel i je usik'im chwa'im le, xuya che ali wach i xutz'onoj.

²⁷ Are uri i ajawinel le xutaq la b'i jun achi chi yij che i ch'oj chrelsaxik ujolom ma Wan chila prexil xaq kuk'am li che,

²⁸ x-e i achi chi yij che i ch'oj chila prexil xuk'atzij ujolom i ma Wan te'uri xuk'am li chupam jun lik'lik laq xaq xuya che ali, te'uri i ali le xuya che uchuch.

²⁹ I utijoxelab' ma Wan, are xkita utzijol ile, are uri xe'e chuk'amik uch'akul xaq xkimuqu.

I Jesús xeutzuq lajujwinaq kab'lajujmo' (5,000) achiyab'

³⁰ Chrijil chik ronojel ile, i apostolab' re i Jesús xkimol kib' ru', are uri xkilap che ronojel ni'pa ki'anom, xaq ni'pa utzij i Dios chi xkib'ij chke i winaq.

³¹ Are uri i Jesús xub'ij chke: —Jo' che jun k'ijib'al tz'inilik man keje ile kojuxlan jub'i', keje xraj Ire ile man i winaq lik nti kk'isik, xaq lik k-antaj ti ne chik utijawik kiwa kumal.

³² Are u'ankil uri chi Jesús xaq i rapostolab' xkimin b'i kib' chupam jun barco.

³³ Xwiri je k'i i winaq xeilawik xaq xketamaj chi are i Jesús xaq i utijoxelab' xe'ek. Are uri i winaq aj pa jalajuj taq tinimit xe'e pa'anem chi taq uchi' i semelik ya, nab'e ne tan chik xeupon ike chwach i Jesús.

³⁴ I Jesús are xel pa barco, xeril uk'iyal winaq chi je o tan chik chila. Are uri xpe jun nim laj k'axnab'al uk'ux chke man je keje pacha jub'an chij chi nti keyu'uwik. Rumali xujeq uya'ik jalajuj taq k'utunik chke.

³⁵ Are xqaj ij, i utijoxelab' xetejeb' pan ru' xkib'ij che: —Lik ya xqaj ij, waral lik jun k'ijib'al tz'inilik.

³⁶ Cheataqa b'i winaq chutzukuxik kiwa chi taq ja, xaq pa taq komon naqaj chqij chqawach —xecha che i Jesús.

³⁷ Xwiri i Jesús xub'ij chke: —Yix cheitzuqu i winaq le. Ike xkib'ij che i Jesús: —¿Kawaj b'ari Yet chi koj-e chulo'ik mas wa re trigo tzuqb'al ke i winaq le? Man we keje ile rajwaxik i mer chi kuch'ak jun are kchakun wuqub' ik'.

³⁸ I Jesús xutz'onoj chke: —¿Ni'pa wa re trigo o iwu'? Jeiwila pe'. Are xketamaj ni'pa o ku', xkib'ij che i Jesús: —O jo'ob' wa re trigo xaq keb' kar —xecha.

³⁹ Te'uri i Jesús xeutaq utijoxelab' chi kekikub'a i winaq chwa taq k'im pa taq tzob'ajil.

⁴⁰ Are uri i winaq xekub'i chwa taq k'im, xkitzob'ej kib' pa taq lajuj kawinaq (50) xaq pa taq jo'winaq (100).

⁴¹ Te'uri i Jesús xuk'am i jo'ob' wa re trigo xaq i keb' kar; are uri xtzun an chikaj xuk'amwaj xaq xutioxij che i Dios. Te'uri xupir i wa re trigo, xuya chke utijoxelab' kkijachb'ej re chke i winaq. Xaq keje xu'an che i keb' kar.

⁴² Konojel i winaq xkitij kiwa lik xenojik.

⁴³ Are xkelej wa'im konojel i winaq, i tijoxelab' xkimol uchi' i wa re trigo xaq i kar chi xk'is taj, are uri xyiji kab'lajuj chikach.

⁴⁴ Je lajujwinaq kab'lajujmo' (5,000) achiyab' xkitij i wa re trigo.

I Jesús kb'in puwi i ya

⁴⁵ Chrijil chik ile i Jesús xub'ij chke utijoxelab': Chixnab'ej b'ik, man kixok b'i chupam jun barco, kix-e ch'aqa semelik ya k'a pa tinimit Betsaida. Tz'aqat yin kein-ijla b'i winaq.

⁴⁶ Are xutzin chki'ijlaxik b'i winaq, x-e che jun jyub' chutz'onoxik che i Dios.

⁴⁷ Are xok a'ab', i barco chi je enaq utijoxelab' i Jesús chupam o chik pa nik'aj che i semelik ya. I Jesús utukel o che i jyub' le,

⁴⁸ xrilo chi lik ketiki ti chik chuminik b'i barco ipa enam wi ke, rumal i tew chi kkik'ulaj chwach. Are xsaqirik, i Jesús x-e ku' utijoxelab', kb'in chwi ya, ktijin rik'awik chkiwach ike.

⁴⁹ I tijoxelab' are xkilo chi kb'in jun winaq chwi ya, xkixij kib', xkich'ob' ike chi jun xib'inel, rumali lik xesik'inik.

⁵⁰ Man konojel xkilo rumali xkixij kib', xwiri i Jesús xub'ij chke: —¡Mixij iwib' man xa Yin, chikowirsaj ik'ux! —Xcha.

⁵¹ Te'uri xok b'i ku' pa barco; are uri i tew xuxlanik. I utijoxelab' lik xkib'isoj rumal i nim laj il chi xkilo le.

⁵² Man kitom ti ub'e i nim laj il re i wa re trigo, lik tz'apil kinojb'al.

I Jesús xeukunaj iwab'ib' aj Genesaret

⁵³ Are xki'axuj i semelik ya, xeupon chuchi' i jyub' Genesaret, chila xkixim wi kan ki-barco chuchi' i semelik ya.

⁵⁴ K'atene ktijin kelik chupam i barco i winaq chi je o chila lik juntir xkil ub'e chi are i Jesús.

⁵⁵ I winaq le lik juntir xe'e la pa'anem pa taq komon chuk'amik li kiwab'ib' chwa taq ch'at re kkik'am b'i chwach i Jesús.

⁵⁶ Xaipa kok wi Jesús, we pa taq tinimit, we pa taq komon xaq we pa taq es is kkik'am b'i iwab'ib' chwach. Xaq o ile chi xa kekiya pan kiwab' chi taq b'e xaq i iwab'ib' xkitz'onoj che i Jesús chi kya' chke chi kkiyin pan jub'i' u'u'; konojel ni'pa i xkiyin u'u' che, is xeutzirik.