Marcos 4 - Wuj Pa K'ubultzij

Tijojb'al tzij chrij i ajtikanel

¹ I Jesús xujeq chik uk'utik utzij i Dios chila chuchi' i semelik ya. Che i ij le lik je k'i winaq xemoltajik, rumali i Jesús x-an chupam jun barco chi o chwi ya xkub'i chupam. I winaq xekanaj kan chuchi' i ya.

² Are uri i Jesús lik k'i i k'utunik xujeq uya'ik chke i winaq chila ru' jalajuj taq tijojb'al tzij. Chupam uk'utunik le xub'ij iri chke:

³ Chita pe': Jun ajtikanel x-e pa tikanik.

⁴ Are xukirij b'i rija' o jub'i' xtzaq pa taq b'e; are uri xek'un i tz'ikin xkitij b'ik.

⁵ Xaq o jub'i' xtzaq pa taq ab'aj, lik juntir xalax loq man xax ulew xol taq ab'aj le.

⁶ Xwiri, are xel li ij juntir xuk'ato man naj taj qajnaq i ra', rumali xchaqijik.

⁷ Xaq o jub'i' chik xtzaq pa taq k'ix, xwiri are xek'iy i k'ix le xuji'saj i tikon; rumali i tikon le xwachin taj.

⁸ Xwiri o jub'i' chik xtzaq prutzil ulew. Ile lik xk'iyik xaq xuya chomiq taq uwach. O jujun ija xuya Lajuj juwinaq (30) uwach, xaq o jujun xuya oxwinaq (60) uwach xaq o jujun xuya jo'winaq (100) uwach; keje ile xub'ij i Jesús chke.

⁹ I Jesús xub'ij chik: “Pachin o kixikin, chkita ub'e uri wach xinb'ij” Xcha.

Wach taq uchak i tijojb'al tzij chi xub'ij i Jesús

¹⁰ Are xkanaj kan i Jesús utukel, ni'pa je o naqaj che junam ku' i kab'lajuj utijoxelab', xkitz'onoj che, Wach kraj ub'ixkil i tijojb'al tzij chi xulapo.

¹¹ Are uri Jesús xub'ij chke: Yix yatal chiwe rumal i Dios chi kita ub'e ni'pa i uwam uwach re rajawinik. Xwiri i winaq chi lik naj je o wi che i saq laj tzij, ru' tijojb'al tzij kb'ix ni chke.

¹² Man tupu lik ketzunik xwiri lik pacha taq je mawach; tupu ketanik xwiri lik pacha taq je tak. Xwiri we kkijalwachij kik'aslemal, kkuytaj uri kimak chke rumal i Dios.

I Jesús kusaqij usuk' i tijojb'al tzij chrij ajtikanel

¹³ I Jesús xub'ij chke: ¿Xaq keje yix kita ti ub'e i tijojb'al tzij le? ¿Wach utayik ub'e uri ki'an che i jub'an chik?

¹⁴ I ajtikanel ija keje pacha jun ajb'il utzij i Dios.

¹⁵ Je o jujun winaq chi je keje pacha ija chi xtzaq pa b'e: Kkita utzij i Dios, xwiri juntir kk'un Itzel chrelsaxik i utz laj tzij pkik'ux chi xkita.

¹⁶ Xaq je o jujun winaq chi je keje pacha ija chi xtzaq xol taq ab'aj: Lik kekikot chutayik utzij i Dios xaq kkik'am pkik'ux.

¹⁷ Xwiri xnak'i ti ra' pkik'ux, rumali kkich'ij ti naj are kpe i k'ax pkiwi xaq we kpe i ch'oj chkij rumal utzij i Dios, xa kkisach ukub'ib'al kik'ux che i Dios.

¹⁸ Xaq je o jujun winaq chi je keje pacha ija chi xtzaq pa taq k'ix: Kkita utzij i Dios;

¹⁹ xwiri i k'achirik re i k'aslemal chi oj o wi ri, are utzukuxik i b'eyomal chi xa ket'ortaj che xaq i urayixik i jalajuj taq b'iroxik chi xa kkirayij uwach are kchupuw i utz laj utzij i Dios pkik'ux. Rumali kwachin ti utzij i Dios pkik'aslemal.

²⁰ Xwiri o jujun winaq chi je keje pacha ija chi xtzaq prutzil ulew. Man ike kkita i utz laj utzij i Dios xaq lik kkikoj ru' ronojel kik'ux. Ike le je keje pacha jujun ija chi xuya lajuj juwinaq (30) uwach, o jujun chi xuya oxwinaq (60) uwach xaq o jujun chi xuya jo'winaq (100) uwach; keje usaqixik i tijojb'al tzij ile xu'an i Jesús chke.

I tijojb'al tzij re i tzijb'al

²¹ I Jesús xub'ij chik jun tijojb'al tzij chke i winaq: Yix are kitzij jun kantil, ¿Xatab'a kiya qaj chuxe' jun kaxa, xaq chuxe' jun ch'at? Keje ti ile ki'ano. Jun kantil rajwaxik kya' an chikaj man lik naj k-e wi utzunb'al.

²² Xaq keje ile, mijun b'iroxik uwam uwach we kel ti chisaq, ronojel ni'pa uwam uwach lik ketamax na.

²³ Pachin o kixikin, chkita ub'e uri wach xinb'ij; xcha.

²⁴ Xaq xub'ij chke: Chikojo retalil wach i kita. Man ru' i pajb'al chi kixpajan wi yix, xaq ru' i pajb'al le kixupaj wi chik yix i Dios. Xwiri k'a kuya ne chik mas uwi chiwe.

²⁵ Man jun winaq we k'i o ru' ktz'ab'ix ni uri che; xwiri jun winaq we xa jub'i' o ru' xaq kmaj ne i jub'i' le chi o ru'; keje ile xub'ij i Jesús chke.

Tijojb'al tzij chrij ija chi kk'iyik

²⁶ I Jesús xub'ij chik jun tijojb'al tzij chke i winaq: I ajawinik re i Dios keje pacha jun ajtikanel chi kutik ija pulew.

²⁷ Ire tupu kwarik xaq we k'aslik, tupu cha'ab' xaq we pa'ij xwiri i ija le chi xutiko kpo' loq xaq kk'iyik tupu ajtikanel le reta'am taj wach taq k'iyik ku'an i tikon le.

²⁸ Utukel ulew ku'an che i tikon chi kk'iyik xaq kwachinik: Nab'e kpo' li ija xaq kk'iyik, ukab': Kpe usij, te'uri kpe uwach.

²⁹ Are lik an chik uwach i tikon le kmolik, man xuriq i ij re i molonik. Keje ile xub'ij i Jesús chke.

Tijojb'al tzij chrij ija re mostas

³⁰ I Jesús xub'ij chik chke: ¿Wach nawi k-anaw i ajawinik re i Dios, o wach nawi ru' kinjunamsaj wi?

³¹ Kinjunamsaj ni ru' jun ija re i mostas chi ktik pulew. I ija le lik are ch'utin chwach ronojel ni'pa i jalajuj taq ija chi o chwach i jyub' ta'aj.

³² Xwiri we xtikik lik juntir kk'iyik, xaq lik nim kel chkiwach i jub'an chik tikon chila pa tikonb'al. I u'ab' lik nimaq, xaq kki'an ne kisok i jalajuj taq tz'ikin chupam xaq kemujan chuxe'; keje ile xub'ij i Jesús chke.

I Jesús xu'an k'utunik ru' tijojb'al taq tzij

³³ Keje uk'utik utzij i Dios ile xu'an i Jesús chke i winaq, ru' k'iyal taq tijojb'al tzij, lik k'a ipa ketiki wi chutayik ub'e.

³⁴ Xwiri i Jesús nti jun k'utunik xu'an chke i winaq we ru' ti tijojb'al tzij. Xwi chke utijoxelab' kusaqij wi wach ke'el usuk' i tijojb'al tzij le.

I Jesús xu'atij i tew xaq uretum i ya

³⁵ Are xok a'ab' che i ij le, i Jesús xub'ij chke utijoxelab': —Jo', ch'aqap che i semelik ya —xcha.

³⁶ Are uri xeki'ijla kan i winaq, xkik'am b'i Jesús ku' chupam i barco ipa ax kul wi chupam. Xaq je o jub'an chik winaq xe'e ku' chupam i jub'an chik barco.

³⁷ Are ktijin ki'enam puwi i ya, xaqte'et xpe jun nim laj jab' tew upam. I tew le lik nim man xuyak uwi i ya chikaj rumali xok i ya chupam i barco lik laj xnojik.

³⁸ Xwiri i Jesús kwar pan jub'i' chutun i barco, uya'om ujolom puwi jun pacha ch'eket. Are uri xkik'astaj xaq xkib'ij che: —¡Tijonel! ¿B'uchak chi lik nti kach'ob' che chi yoj ktijin qamuqtajik pa ya? —Xecha.

³⁹ Are uri i Jesús xwalijik, xub'ij che i tew: —¡Matjuk'uk' chik! Xaq xub'ij che i ya: —¡Chamayij elik chikaj! —Xcha. Are uri i tew juntir xuxlanik xaq i ya xsilab' ti chik.

⁴⁰ Te'uri i Jesús xub'ij chke utijoxelab': —¿B'uchak chi lik kixij iwib'? ¿Xatab'a k'amaja o ukub'ib'al ik'ux? Keje ile xub'ij i Jesús chke utijoxelab'.

⁴¹ Xwiri ike lik je oknaq il rumal kixib'rikil, are uri xkitz'onoj chkiwach: —¿B'i taq chi winaqil ire le chi lik kkojon i tew che xaq keje i ya? Xecha chkiwach.